21 Tetor 2021

Projekti i BE-se, duhet të përmbyllet me përfshirjen e shteteve të Ballkanit

Brdo, 6 tetor - Kryeministri i Republikës së Kosovës, Albin Kurti, mori pjesë në Samitin ndërmjet Bashkimit Evropian dhe Ballkanit Perëndimor në Brdo të Sllovenisë, i organizuar nga presidenca sllovene e Këshillit të BE-së.

Riafirmimi i perspektivës evropiane të Ballkanit Perëndimor, si një zgjedhje e përbashkët strategjike, ishte tema kryesore e samitit.

Kryeministri Kurti theksoi rëndësinë që Ballkani Perëndimor dhe Bashkimi Evropian kanë për njëri-tjetrin.

Projekti politik dhe procesi historik i paqes dhe prosperitetit, Bashkimi Evropian, duhet të përmbyllet me përfshirjen e gjashtë shteteve të Ballkanit Perëndimor, theksoi ai.

Diskutimet në sesionet plenare u përqendruan në intensifikimin e bashkëpunimit rajonal dhe eksplorimin e bashkëpunimit të mëtejshëm në çështjet politike dhe të sigurisë me interes reciprok për Bashkimin Evropian dhe Ballkanin Perëndimor.

Zbatimi i Planit Ekonomik dhe të Investimeve, i cili përcakton një paketë të konsiderueshme investimesh, u vlerësua se do të gjenerojë rritje më të qëndrueshme, nga e cila do të përfitojë rajoni dhe Evropa në tërësi.

Në sesionet plenare, kryeministri Kurti mori pjesë krahas liderëve të rajonit dhe aktorëve kryesorë për rajonin, përfshirë Presidentin e Parlamentit Evropian, Këshillin për Bashkëpunim Rajonal, Bankën Evropiane të Investimeve, Bankën Evropiane për Rindërtim dhe Zhvillim dhe Bankën Botërore.

Fokusi ishte në intensifikimin e angazhimit të Bashkimit Evropian për të nxitur rimëkëmbjen socio-ekonomike të rajonit të Ballkanit Perëndimor.

Me udhëheqësit nga BE dhe Ballkani Perëndimor u bisedua për mundësitë e thellimit të dialogut politik, bashkëpunimin e sigurisë dhe angazhimin strategjik, duke riafirmuar angazhimin e përbashkët. U diskutua edhe se si të sigurohet stabiliteti i rajonit, të forcohet bashkëpunimi rajonal dhe të zgjidhen konfliktet rajonale.

Së bashku me kryeministrin Kurti, në samit morën pjesë edhe zëvendëskryeministrja, njëherësh Ministrja e punëve të jashtme, Donika Gërvalla dhe Ministri i Financave, Punës dhe Transfereve, Hekuran Murati.

Ky samit BE-Ballkan Perëndimor mblodhi udhëheqës nga shtetet anëtare të BE-së dhe gjashtë partnerët e Ballkanit Perëndimor: Kosova, Shqipëria, Bosnja dhe Hercegovina, Serbia, Mali i Zi dhe Republika e Maqedonisë së Veriut. Bashkimi Evropian në këtë samit u përfaqësua nga Presidentja e Komisionit Evropian, Ursula von der Leyen dhe Presidenti i Këshillit Evropian, Charles Michel.

 

Kalendari

Ngjarjet e datës 22 Tetor 2021 - Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione takohet me shoqaten e Familjeve të Heronjve dhe Dëshmorëve të Kombit për zgjidhjen e statusit të veprimtarëve invalidëve të plagosur para luftës çlirimtare në Kosovë. (Ndërtesa e Kuvendit, salla N10, ora 10:00)

- Shoqata për Teknologji të Informacionit dhe Komunikimit të Kosovës - STIKK organizon edicionin e 10-të të festivalit të teknologjisë “KosICT”. (Ambientet e “ITP Park” në Prizren, ora 10:00)

- Instituti Demokratik i Kosovës organizon konferencën “Ndikimi i dialogut me Serbinë në politikën e jashtme të Kosovës”. (Hotel Emerald, ora 10:30)

-  Komisioni Ad hoc për përzgjedhjen e kandidatëve për anëtar të Bordit të RTK-së shqyrton listën e kandidatëve të propozuar për anëtarë të Bordit të RTK-së. (Ndërtesa e Kuvendit, salla C203, ora 11:00)

- Ministria e Mbrojtjës organizon ceremoninë e betimit të rekrutëve të rijnë. (Kazerma e FSK-së “Skënderbeu” në Ferizaj, ora 11:00)

- Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit miraton listën e ngushtë të kandidatëve për Drejtor të Agjencisë Kundër Korrupsionit. (Ndërtesa e Kuvendit, salla N204, ora 14:00)

- Mbahet edicioni i trtë i festivalit Lahuta, Okarina Polifionia. (Ambientet e Qendrës për zhvillimin e kultures tradicionale në Prishtinë, Rruga Xheladin Hana nr. 98, ora 18:30)