24 Tetor 2021

Osmani dhe Gërvalla takuan presidentin e Guajanës, Mohamed Irfaan Ali

New York, 21 shtator - Presidentja e Republikës së Kosovës, Vjosa Osmani, dhe ministrja Gërvalla, në vazhdën e takimeve me liderë botërorë gjatë qëndrimit në Nju Jork takuan presidentin e Guajanës, Mohamed Irfaan Ali.

Në takim me presidentin Ali, Presidentja Osmani ofroi pasqyrë të zhvillimeve në Kosovë dhe në rajon, përfshirë këtu zhvillimet politike, ekonomike, por edhe sfidat me pandeminë.

Edhe në këtë takim, Presidentja Osmani i kërkoi Guajanës përkrahje për lobim te shtetet e saj fqinje në Amerikën Qendrore e Jugore për ta njohur pavarësinë e Kosovës.

Sa i përket dialogut me Serbinë, Presidentja Osmani theksoi se dialogu ka kuptim kur në fund të tij do të pasojë njohja e ndërsjellë në kufijtë aktualë dhe sipas rendit juridik aktual.

Më tej, Presidentja Osmani ka folur edhe për thellimin e marrëdhënieve ndërmjet dy shteteve. Ajo përmendi promovimin e mundësive për investime, shkëmbime tregtare dhe ekonomike.

Ministrja e Jashtme dhe e Diasporës, Donika Gërvalla, theksoi rëndësinë e bashkëpunimit në arsim, turizëm dhe fusha të tjera të interesit të dyanshëm.

Kurse presidenti Ali ka thënë se Guajana e ka përkrahur vazhdimisht Kosovën dhe shprehu gatishmërinë për thellim të raporteve mes dy shteteve. Ai theksoi gatishmërinë e institucioneve të Guajanës që t’i intensifikojnë marrëdhëniet me Kosovën dhe e ritheksoi mbështetjen e tij për procesin e anëtarësimit në organizata ndërkombëtare.

 

 

Kalendari

Ngjarjet e datës 25 Tetor 2021

- Komisioni i Pavarur i Mediave në bashkëpunim me Departamentin e Gazetarisë të UP-së, me rastin fillimit të javës globale për edukimin mbi median dhe informacionin, organizojnë tryezë diskutimi me temën: “Edukimi Medial - Përmbajtjet e papërshtatshme për fëmijë”. (Hotel Sirius, ora 10:00)

- Nën patronatin e Kryeprokurorit të Shtetit, Aleksandër Lumezi do të mbahet “Java për të Drejtat e Viktimave të Krimit”, me moton “Së bashku në mbrojtje të viktimave të krimit”. (Hotelin Emerald, ora 10:00)

- GLPS mban tryezë diskutimit me temë “Meritokracia në shërbimin e jashtëm të Kosovës: një sërë rekomandimesh që duhet marrë parasysh”. (Hotel Swiss Diamond, ora 10:30)

- Punëtorët e Lotarisë së  Kosovës mbajnë protestë në të cilën do të kërkohet miratimi i ligjit për Lotarinë e Kosovës. (Para ndërtesës së Qeverisë, ora 11:00)

- Mbahet konferencë për media lidhur me Festivalin e 12 -të i Filmit të Shkurtër Ballkani Përtej Kufijve. (Kino Armata, ora 12:45)

- Oda e Hotelerisë dhe Turizmit të Kosovës  do të mbajnë tubim për të diskutuar masat e reja. (Golden Imperial, ora 19:00)