19 Janar 2022

Nga 1 dhjetori Australia do t'i hapë kufijtë për të huajt me dy doza të vaksinës

Canberra, 23 nëntor - Kryeministri i Australisë, Scott Morrison tha se kufijtë ndërkombëtarë të vendit që janë të mbyllur që nga marsi i vitit 2020 në kuadër të luftës kundër COVID-19, do të hapen duke filluar nga 1 dhjetori për personat që posedojnë viza.

Morrison në konferencën për media në kryeqytetin Canberra tha se kanë lejuar që në fillim të muajit nëntor australianët me dy doza kundër COVID-19 të mund të udhëtojnë në vendet e huaja, ndërsa nga 1 dhjetori do të lejojnë hyrjen e të gjithë studentëve, mbajtësit e vizave të biznesit dhe migrantëve në Australi nëse janë vaksinuar plotësisht.

Ai e cilësoi si "një hap të rëndësishëm" hapjen e kufijve. "Kthimi i punëtorëve të kualifikuar dhe studentëve në Australi është një moment historik i rëndësishëm në rrugën tonë për t'u kthyer në normalitet", u shpreh ai.

Me këtë hap do të lejohet hyrja e turistëve të vaksinuar nga Koreja e Jugut dhe Japonia. Australia e cila ishte e mbyllur për gati 20 muaj, me rihapjen e kufijve ka ofruar 235 mijë viza, të cilët priten të hyjnë në vend gjatë muajve dhjetor dhe janar.

Personat që do të arrijnë në vend duhet të dorëzojnë tek autoritetet dokumentin që tregon vaksinim të plotë me njërën nga vaksinat e miratuara nga Administrata e Produkteve Terapeutike.

Gjithashtu personat duhet të sigurojnë teste negative PCR jo më të vjetra se 72 orë ndërsa kur do të arrijnë në vend t'i respektojnë rregullat e karantinës së shtetit.

Deri më tani 199.651 persona janë diagnostikuar me COVID-19 ndërsa 1.948 e kanë humbur jetën. Vendi ende ka 12.647 raste aktive. Sipas informacioneve përqindja e dy dozave të administruara në vend është 85.1 për qind kurse e tyre me një dozë 91.5 për qind.
 

Kalendari

Ngjarjet e datës 19 janar 2022

- Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit shqyrton Projektligjin për ndryshimin dhe plotësimin e Ligjit për Shitjen e Banesave për të cilat ekziston e Drejta Banesore, shqyrton raportin e grupit punues në lidhje me zbatimin e mbikëqyrjes së Ligjit për përgjegjësinë disiplinore të gjyqtarëve dhe prokurorëve, etj. (Ndërtesa e Kuvendit, salla N303, ora 10:00)

- Instituti i Kosovës për Drejtësi me përkrahje të Departamentit të Shtetit Amerikan - Byrosë Ndërkombëtare për Çështje të Narkotikëve dhe Zbatimit të Ligjit dhe NED-it mban konferencë për media në të cilën do të prezantohet analiza me titull “Konfiskimi i pasurisë së pajustifikueshme: problemet juridike të Projektligjit aktual”. (Hotel Sirius, ora 10:00)

- Komisioni për Shëndetësi dhe Mirëqenie Sociale shqyrton draft raportin e monitorimit të Ligjit për Shëndetin Mendor dhe diskuton për punën e Këshillit për Objektivat e Zhvillimit të Qëndrueshëm. . (Ndërtesa e Kuvendit, salla N302, ora 10:00)

- Komisioni për Mbikëqyrjen e Financave Publike inicon procedurat lidhur me auditimin e raporteve vjetore financiare dhe raportet e deklarimit financiar të fushatës, së subjekteve politike, për vitin 2021. (Ndërtesa e Kuvendit, salla N10, ora 10:00)
 
- Lëvizja FOL vazhdon serinë e debateve FOL Hapur me Ministren e Industrisë, Ndërmarrësisë dhe Tregtisë, Rozeta Hajdari. (Hotel Sirius, ora 11:00)

- The British School of Kosova organizon shfaqjen edukativo - arsimore për fëmije  "Mushkonjat dhe Princi". (Teatri "Faruk Begolli" në Kolegjin AAB, ora 11:00)

- Administrata Tatimore e Kosovës mban ceremoninë e themelimit të 22 vjetorit të saj në të cilën do të marrin pjesë Ministri i Financave, Punës dhe Transfereve Hekuran Murati dhe drejtues nga odata ekonomike, përfaqësues nga institucionet ndërkombëtarë, si dhe përfaqësues nga organizatat e kontabilitetit. (Qendra e Shërbimit për Tatimpagues, ish-ndërtesa e Gërmisë, sheshi Skënderbeu, ora 14:00)

- Në kuadër të manifiestimit 'Flaka e Janarit' hapet ekspozitë memoaresh e kujtimesh "Dhoma e Kadriut, Jusufit dhe Bardhoshit". (Muzeu Etnologjik i qyteti të Gjilanit, ora 16:00)

- Partia Socialdemokrate do të mbaj tubim me qytetarë ku do të shpaloset Manifesti - dokumenti i parë i partisë. (Hotel Grand, ora 17:00)