20 Tetor 2021

Ministrja Gërvalla takon homologun e saj nga Malta

New York, 22 shtator - Në vazhdën e takimeve bilaterale në margjina të Asamblesë së Përgjithshme të Kombeve të Bashkuara në New York, ministrja e Punëve të Jashtme dhe Diasporës znj. Donika Gërvalla u takua sot me ministrin e Jashtëm dhe për Çështje Evropiane të Maltës Evarist Bartolo.

Gjatë këtij takimi palët vlerësuan se raportet mes dy vendeve janë shumë të mira dhe theksuan nevojën për të avancuar bashkëpunimin bilateral në fusha me interes si: ekonomi, arsim e kulturë.

Ministrja Gërvalla njoftoi ministrin Bartolo me angazhimin e Qeverisë së re të Kosovës për të krijuar një ambient të përshtatshëm për investitorë të huaj.

“Ne jemi tepër të përkushtuar që të forcojmë rendin dhe ligjin si parakusht për tërheqje të investimeve të huaja dhe si mundësi për krijim të vendeve të reja të punës. Andaj në Kosovë bizneset e huaja mund të gjejnë kushte tepër të mira për investim”, ka plotësuar ajo.

Po ashtu ministrja Gërvalla e falënderoi homologun e saj nga Malta për mbështetjen e shtetit të tij në përpjekjet e Kosovës për forcim të subjektivitetit ndërkombëtar si dhe në rrugën drejt integrimit evropian.

Lidhur me këtë mori rikonfirmimin e kryediplomatit të Maltës se kjo përkrahje do të vazhdojë edhe më tutje.
 

Kalendari

Ngjarjet e datës 20 Tetor 2021  - Kryeministri Albin Kurti dhe ministrja e Ekonomisë Artane Rizvanolli, vizitojnë ndërmarrjen “Trepça”. (Zyra e menaxhmentit të “Trepçës”, Parku Industrial, ora 8:00)

- Komisioni për Buxhet, Punë dhe Transfere shqyrton Raportin Vjetor Financiar te Bankës Qendrore, Fondit të Kursimeve Pensionale, raportin e Qeverisë për Buxhetin e së Kosovës dhe Agjencisë për Krahasim dhe Verifikim të Pronës. (Ndërtesa e Kuvendit, salla C203, ora 10:00)

- Mbahet mbledhja e dhjetë e Komiteti për Politik dhe Financa e Komunës së Rahovecit. (Salla e mbledhjeve të Kuvendit Komunal të Rahovecit, ora 10:00)

- Lëvizja FOL vazhdon serinë e debateve FOL Hapur me Ministren e Ekonomisë Artane Rizvanolli. (Hotel Opera në Prishtinë, ora 11:00)

- Rektori i Universitetit të Prishtinës Naser Sahiti dhe Dimitrija Sekovski, përfaqësues i SKAT Consulting nënshkruajnë marrëveshje bashkëpunimi për implementimin e programit studimor Master në Menaxhimin e Integruar të Resurseve Ujore në Kosovë. (Rektorati i UP-së, ora 11:00)

- Koalicioni ad-hoc i organizatave të shoqërisë civile dhe aktivistëve mjedisor ju ftojnë në konferencën për media, ku do të njoftoheni me zhvillimet e fundit që ndërlidhen me paditë për shpifje të ushtruara kundër aktivistëve Shpresa Loshajt dhe Adriatik Gacaferi, nga kompania Kelkos si dhe operimet e kësaj kompanie në Deçan. (Para objektit të Qeverisë ish-Rilinjda, ora 13:00)

- Baleti Kombëtar i Kosovës mban konferencë për medie me rastin e Premierës së shfaqjes “Tanzminiaturen” & “Tangata” me koreografi nga Ricardo Fernando.  (Teatri Kombëtar i Kosovës, ora 13:00)