09 Dhjetor 2022

Kriza në veriun e Kosovës më e rënda dhe më e rrezikshmja që nga viti 2013

Bruksel, 14 nëntor - Shefi i politikës së jashtme të Bashkimit Evropian Josef Borrell tha të hënën se ka thirrur kryenegociatorët e Kosovës dhe Serbisë në Bruksel për të filluar dialogun në gjetjen e një zgjidhje për situatën në veriun e Kosovës, që sipas tij, paraqet krizën më të rrezikshme që nga viti 2013.

Ai i bëri këto komente pas takimit të Këshillit të Jashtëm të Bashkimit Evropian përgjatë punimeve të të cilit është diskutuar për Ballkanin Perëndimor, me theks të posaçëm në situatën në veriun e Kosovës.

“Pala e Kosovës vjen sonte, jam i gatshëm të bisedoj me udhëheqësit, nëse negociatorët arrijnë te një zgjidhje praktike të çështjes së targave dhe atë para 21 nëntorit, që është afati i fundit. Nuk mund të arrijmë këtë datë pa një marrëveshje, ose do të jemi në prag të situatës së rrezikshme. E dini se tërheqja e serbëve nga institucionet në veri nga policia, gjyqësori, nga kryetarët e komunave ka krijuar një boshllëk dhe në këtë situatë më e keqja mund të ndodhë, pra të dyja palët duhet të tregojnë më shumë fleksibilitet”, tha zoti Borrell.

Ai tha se shtetet evropiane në Këshill kanë qenë të qartë dhe kërkojnë përparim të qartë në dialogun ndërmjet Kosovës dhe Serbisë.

“Serbët e Kosovës duhet të kthehen në institucione të Kosovës, autoritetet e Kosovës duhet të tregojnë fleksibilitet për targat, e të punojnë në zbatimin e marrëveshjes për Asociacionit të komunave me shumicë serbe pa vonesa”, tha ai duke nënvizuar se kriza të tilla e kanë shtyrë Bashkimin Evropina të dal me një propozim për normalizimin e marrëdhënieve ndërmjet Kosovës dhe Serbisë.

“Propozimin që kemi paraqitur dhe Franca e Gjermania kanë qenë mbështetës për këtë propozim, i ashtuquajturi propozimi franko-gjerman është në fakt mbështetje franko-gjermane për propozimin e paraqitur nga unë dhe Miroslav Lajçak, është propozim evropian”, tha zoti Borrell.

“Në dy-tre vjetët e fundit jam marrë vazhdimisht me menaxhim të krizave, nga një krizë te tjetra, duke zgjidhur krizën dhe duke pritur për krizën e ardhshme qofshin targat apo çfarëdo qofshin ato. Nuk është kjo mënyra se si zgjidhen problemet. Duhet të vazhdojmë me një qasje më strukturore duke kërkuar çështje më të thella dhe duke provuar që të parandalojmë krizat. Këto janë hapa para, një qasje e re. Dua të them se të dyja palët, nuk do të thosha se pajtohen, por nuk e refuzojnë propozimin. Kjo do të thotë shumë”, tha zoti Borrell.

Kalendari

Ngjarjet e datës 9 dhjetor 2022 - Kryeministri i Republikës së Kosovës, Albin Kurti, presidentja Vjosa Osmani-Sadriu dhe kryetari i Kuvendit, Glauk Konjufca, marrin pjesë në dëgjimin publik për Projektligjin për Liritë Fetare. (Ndërtesa e Qeverisë, ora 9:00)

- Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit shqyrton Raportit për Projektligjin Agjencinë Kosovare për Krahasim dhe Verifikim të Pronës, Projektligjin për Bujqësi dhe Zhvillim Rural, etj. (Ndërtesa e Kuvendit, salla N302, ora 9:30)

- Komisioni për të Drejtat dhe Interesat e Komuniteteve dhe Kthim shqyrton Projektligjin për parandalimin dhe kontrollin e integruar të ndotjes, me raport amendamente të Komisionit funksional për Mjedis, Ushqim, Bujqësi, Planifikim dhe Zhvillim, etj. (Ndërtesa e Kuvendit, salla N10, ora 9:45)

- Instituti i Kosovës për Drejtësi organizon konferencë për media, ku do të publikohet raporti me titull “Qeverisja me duar të pastërta”, raport ky mbi deputetët, ministrat dhe kryetarët e komunave, të cilët kanë probleme me ligjin. (Hotel Sirius, ora 10:00)

- Gjykata Kushtetuese organizon “Ditën e Gjykatës së Hapur” në shënim e Ditës Ndërkombëtare të të Drejtave të Njeriut. (Gjykata Kushtetuese, ora 10:00)

- Për të shënuar 9 dhjetorin, Ditën Ndërkombëtare kundër Korrupsionit, Koalicioni i Organizatave të Shoqërisë Civile dhe Mediave, do të mbajnë një konferencë me temën “Fuqizimi i Kapaciteteve të Shoqërisë Civile për luftimin e korrupsionit”. (Hotel Sirius, ora 10:00)

- Kuvendi i Republikës së Kosovës vazhdon seancën plenare. (Kuvendi i Kosovës, ora 10:00)

- Ministrja e Drejtësisë, Albulena Haxhiu bashkëbisedon me studentët e Kolegjit AAB për temën mbi dhunën në bazë gjinore. (Kolegji AAB, ora 10:30)

- Rreth 60 punëtor teknik dhe ata te sigurimit fizik qe punojnë në Qendrat e Mjekësisë Familjare disa shkolla te Prishtinës  do te protestojnë me kërkesën për rritje të pagave. (Para komunës se Prishtinës, ora 11:00)

- Këshilli Rinor Kosovar organizon Kuvendin Zgjedhor të Këshillit të Nxënësve të Kosovës në nivel vendi. (Amfiteatri i Ministrisë së Drejtësisë, ora 13:00)

- Instituti i Kosovës për Drejtësi organizon aktivitet me studentët e Klinikës Ligjore të IKD– së, ku do të bëhet prezantimi i shpalljes së simuluar të një aktgjykimi të një rasti të korrupsionit. (Sheshi Skënderbeu në Prishtinë, ora 13:30)

- Lidhja Demokratike e Kosovës mban konferencë për medie. (Selia qendrore e LDK-së, ora 13:30)

- Ministrja e Drejtësisë, Albulena Haxhiu merr pjesë në një tryezë me gratë në Komunën e Mitrovicës. (Restaurantin "Va Piano", ora 15:00)

- Me rastin e 5 vjetorit të ndarjes nga jeta të artistit, Blerim Peci, Komuna e Mitrovicës, në bashkëpunim me artistë, familjarë e miq të ish të ndjerit organizojnë takimin përkujtimor për të ndarë së bashku kujtime të bukura e të pashlyeshme për të. (Qendra e Kulturës "Rexhep Mitrovica", ora 17:00)

- Ministrja e Drejtësisë, Albulena Haxhiu merr pjesë në shfaqjen e filmit "Zgjoi". (Kino Armata, ora 17:00)