18 Gusht 2022

Arrihet marrëveshja Rusi-Ukrainë, pritet eksportimi i miliona tonë grurë

Kiev, 14 korrik - Sekretari i Përgjithshëm i OKB-së, Antonio Guterres, tha të mërkurën se është rënë dakord gjerësisht për një marrëveshje midis Rusisë dhe Ukrainës, me Turqinë dhe Kombet e Bashkuara, për të eksportuar miliona tonë grurë ukrainas të bllokuar nëpër depo që kur filloi agresioni rus më 24 shkurt.

“Sot u shënua një hap i rëndësishëm dhe thelbësor,” u tha zoti Guterres gazetarëve për zhvillimet në bisedime në Stamboll midis katër palëve. “Një hap në rrugën drejt një marrëveshjeje gjithëpërfshirëse.”

Shefi i OKB-së theu heshtjen publike për negociatat, duke cituar një deklaratë të ministrit të mbrojtjes së Turqisë, i cili tha se është arritur një marrëveshje për pikat kryesore, përfshirë krijimin e një qendre koordinimi me Rusinë, Ukrainën dhe OKB-në; marrëveshje për kontrollet e grurit në porte; dhe sigurinë e anijeve që transportojnë grurin nga Odesa.

“Sigurisht, ky ishte takimi i parë,” vuri në dukje zoti Guterres. “Përparimi ishte jashtëzakonisht inkurajues. Tani, delegacionet po kthehen në kryeqytetet e tyre dhe shpresojmë se hapat e ardhshëm do të na lejojnë të arrijmë një marrëveshje zyrtare.”

Zoti Guterres nuk tha se kur do të ishte gati marrëveshja përfundimtare, por ai tha se shpresonte që palët të mblidheshin përsëri javën e ardhshme dhe të kishin një gati një marrëveshje përfundimtare.

Një zyrtar i OKB-së me dijeni për bisedimet tha se ishte një takim i rëndësishëm mes rusëve dhe ukrainasve ku ata arritën të bënin përparim të konsiderueshëm. në

Më shumë se 20 milionë tonë drithë ukrainas po mbahen në depo në portin e Odesës në Detin e Zi dhe dhjetëra anije janë bllokuar nga Rusia. Turqia tha se ka 20 anije tregtare në pritje, të cilat mund të ngarkohen shpejt dhe të dërgohen në tregjet botërore.

Marrëveshja për drithërat ka muaj që diskutohet. Zyrtarët e OKB-së ngritën alarmin pothuajse menjëherë pas fillimit të luftës për pasojat për sigurinë globale ushqimore nëse Ukraina, e cila është një nga eksportuesit kryesorë në botë të drithërave, nuk arrin të nxjerrë nga vendi eksportet.

Programi Botëror i Ushqimit thotë se 276 milionë njerëz në mbarë botën po përballeshin me urinë akute në fillim të këtij viti. Ata parashikojnë që ky numër të rritet me 47 milionë njerëz nëse konflikti në Ukrainë vazhdon./VOA

Kalendari

Ngjarjet e datës 18 gusht 2022

 - Mbahet seanca në rastin e falsifikimit të tenderit 800 mijë euro për rinovimin e objektit të PSRK-së ndaj të akuzuarit Tahir Sopa, përfaqësues i firmave “NBT ING SHPK” dhe “NPN Bajramaj”. (Pallati i Drejtësisë, ora 9:30)

- Komuna e Rahovecit mbant dëgjimi publik për buxhetin e vitit 2023 më bashkësit lokale, lagjet urbane dhe përfaqesues të shkollave. (Shtëpia e Kulturës 'Mensur Zyberaj' në Rahovec, ora 10:00)

- Bashkimi i Sindikatave të Pavarura të Kosovës mban konferencë për media e cila ndërlidhet me shpalljen e grevës së përgjithshme. (Zyrat e BSPK-së, ora 13:00)

- Fondacioni Shtatëmbëdhjetë organizon hapjen e programit Rezidenca 17. (Shtëpia e Hivzi Sulejmanit në lagjen Taslixhe, ora 18:00)