27 Janar 2023

Shkollat nga rajoni po bëhen Supershkolla

Prishtinë, 25 janar - Me rastin e Ditës Ndërkombëtare të Arsimit me temën “Ndryshimi i kursit, transformimi i arsimit”, gjashtëdhjetë shkolla të mesme nga Ballkani Perëndimor janë përzgjedhur për të marrë pjesë në programin e Supershkollave të Zyrës Rajonale për Bashkëpunim Rinor (RYCO).

Nxënësit dhe mësuesit do të kenë mundësinë të zbatojnë shkëmbimet shkollë me shkollë si dhe të marrin pjesë në aktivitete kushtuar ngritjes së kapaciteteve, rrjetëzimit dhe bashkëpunimit të tyre.

Shënimi i sivjetshëm i Ditës Ndërkombëtare të Arsimit nënvizon se arsimi është çelësi për të përcaktuar rrugën për më shumë drejtësi dhe qëndrueshmëri. Pandemia e COVID-19 ka përkeqësuar një krizë arsimore para-ekzistuese.

Pa veprime korrigjuese, mbështetje më të mirë për mësuesit dhe rritje të financimit, humbjet e të mësuarit dhe braktisja e shkollës do të vazhdojnë të rriten, duke përmbysur progresin drejt të gjitha Objektivave të Zhvillimit të Qëndrueshëm dhe duke privuar të rinjtë nga një e ardhme e dinjitetit dhe mundësive.

Kjo është arsyeja pse RYCO dhe GIZ, me mbështetjen e BEs dhe Gjermanisë, nëpërmjet investimit tek të rinjtë dhe edukimi i tyre, duan të kontribuojnë në ndërtimin e një paqeje të qëndrueshme, gjithëpërfshirëse dhe paqësore.

Gjatë thirrjes së parë të hapur për Supershkollat, RYCO mori 127 propozime për shkëmbime ndërsa më shumë se 412 shkolla nga Ballkani Perëndimor përdorën platformën online https://superschools.net/ për rrjetëzim me shkollat e tjera.

Komisioni përzgjedhës kishte detyrën e vështirë për të përzgjedhur 30 projektet më të mira që synonin mbështetjen e proceseve të ndërtimit të paqes dhe pajtimit si edhe të mësuarit ndërkulturor dhe dialogut ndërmjet shkollave, nxënësve dhe komuniteteve të tyre.

Zbatimi i projekteve do të jetë nga shkurti deri në maj 2022, kur secila shkollë do të organizojë një vizitë shkëmbimi në shkollën partnere që zgjat nga gjashtë deri në dhjetë ditë, me një grup deri në njëzet nxënës dhe një deri në dy mësues. Nëpërmjet skemës së shkëmbimit, studentët dhe mësuesit do të kenë mundësinë të udhëtojnë, të prezantojnë veten, shkollat dhe zakonet e tyre tek shkolla mikpritëse dhe të mësojnë gjëra të reja për komunitetet lokale në pjesë të ndryshme të rajonit tonë.

Supershkollat është një program për shkëmbimin e shkollave në Ballkanin Perëndimor me objektivën për të mbështetur proceset e ndërtimit të paqes dhe pajtimit, si edhe të mësuarit  dhe dialogu ndërkulturor.

Programi do të zbatohet për tre vjet dhe është pjesë e një projekti shumë donatorësh "Skema e shkëmbimit të shkollave të Ballkanit Perëndimor", e bashkëfinancuar nga Bashkimi Evropian dhe Ministria Federale Gjermane për Bashkëpunim dhe Zhvillim Ekonomik (BMZ) dhe zbatuar nga Deutsche Gesellschaft für Internationale Zusammenarbeit (GIZ) , së bashku me Zyrën Rajonale të Bashkëpunimit Rinor (RYCO). Projekti ka një buxhet total prej 5.5 milionë euro dhe kontribuon në objektivin e përgjithshëm për rritjen e aftësive dhe njohurive të të rinjve në Ballkanin Perëndimor duke përmirësuar sistemet arsimore dhe promovuar bashkëpunimin në rajon, përmes krijimit të një skeme rajonale të shkëmbimit të shkollave.
 

Kalendari

Ngjarjet e datës 27 janar 2023

 - Mbahet dita e dytë e konferencës Ndërkombëtare për Siguri Siguri Kinernetike “Cyber Zero” në të cilën diskutohet sulmet online dhe kërcenimet në sigurinë kibernetike. (Klan Arena, ora 9:00)
    
- Bordi i Komisionit të Pavarur për Miniera dhe Minerale raporton në Komisionin për Ekonomi, Industri, Ndërmarrësi dhe Tregti lidhur me vendimin për lirimin nga obligimi për rentën minerare për ndërmarrjen “Ferronikeli”. (Kuvendi i Kosovës, C203, ora 10:00)
    
- Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione takohet me përfaqësues të OJQ-së “Zëri i Romëve, Ashkalinjve dhe Egjiptasve”. (Kuvendi i Kosovës, salla N10, ora 10:00)
    
- Ministri i Financave Punës dhe Transfereve, Hekuran Murati, raporton në Komisionin për Buxhet, Punë dhe Transfere, lidhur me vendimin për rritjen e vlerës së faturave të tatimit në pronë. (Kuvendi i Kosovës, C203, ora 13:30)
    
- Në Akademinë e Kosovës për Siguri Publike (AKSP) mbahet ceremonia e diplomimit të gjeneratës së 42 të kadetëve të Shërbimit Korrektues të Kosovës (SHKK). Merr pjesë ministrja e Drejtësisë, Albulena Haxhiu etj. (Ndërtesa e re e Fakultetit të Sigurisë Publike në AKSP, Vushtrri, ora 13:30)
    
- Universiteti Publik “Kadri Zeka” në Gjilan do të nderojë me çmimin “Doctor Honoris Causa” anëtarin e Parlamentit Evropian, Lukas Mandl. (Teatri i Qytetit, Gjilan, ora 15:00)