03 Shkurt 2023

ORCA kërkon që të ndalen presionet në Agjencinë e Akreditimit

Prishtinë, 3 mars - Organizata për Rritjen e Cilësisë në Arsim (ORCA) ka vlerësuar se ndërhyrjet politike në Këshillin Shtetëror të Cilësisë dhe parregullsitë në mbarëvajtjen e punës në Agjencinë e Kosovës për Akreditim, po vazhdojnë ta pengojnë procesin e akreditimit në vendin tonë.

Në tryezë u tha se mungesa e infrastrukturës ligjore po vazhdon ta cenojë pavarësinë e këtyre institucioneve.

Ushtruesi i detyrës së drejtorit të AKA-së, Shkëlzen Gërxhaliu tha se agjencia po përballet me mungesën e stafit, mungesën e databazave të cilat do t’ua lehtësonin punën, si dhe me ndërhyrjet të kohëpaskohshme të cilat sipas tij, nuk po i ndihmojnë procesit të akreditimit të programeve dhe institucioneve.

Anëtarja e KShC-së, Rozafa Koliqi deklaroi se ndërhyrjet në këshill kanë qenë publike dhe se konsideron se ato janë presion i drejtpërdrejtë në punën e tyre, duke u bërë thirrje veçanërisht ambasadorëve që të qëndrojnë larg Këshillit Shtetëror të Cilësisë.

E pranishme në këtë tryezë ishte edhe ish-kryetarja e KShC-së, Ferdije Zhushi, sipas të cilës, anëtarët e KShC-së duhet t’u rezistojnë ndërhyrjeve në punën e tyre, çfarëdo qofshin ato.

Ndërkohë që drejtori i ORCA-s, Rron Gjinovci përmendi rastin e arrestimit të Henri Çili, pronarit të universitetit privat UET në Shqipëri, i cili ka lëshuar doktorata për vite të tëra, të cilat kanë akredituar shumë programe të kolegjeve private në Kosovë. Andaj sipas Gjinovcit, bizneset private në arsimin e lartë duhet të ndalohen me ligj.

ORCA do të vazhdojë monitorimin e Këshillit Shtetëror të Cilësisë ndërsa përmes QAINT do të ofrohet mbështetje për Agjencinë e Kosovës për Akreditim.

 

Kalendari

Ngjarjet e datës 3 shkurt 2023  - Këshilli Gjyqësor i Kosovës mban mbledhjen e radhës. (Ndërtesa e KGjK-së, ora 9:00)

- Kuvendi Komunal i Gjilanit mban seancë të jashtëzakonshme, ku në rend dite do të jetë falja e tatimit në pronë në vlerën deri 100 euro për të gjithë tatimpaguesit e kësaj komune, për vitin 2023. (Salla e Kuvendit Komunal të Gjilanit, ora 10:00)

- Sindikata e Sektorit Privat të Kosovës mban konferencë për shtyp lidhur me gjendjen e punëtorëve teknik të Sektorit Privat te Kosovës dhe dialogu me qeverinë dhe institucionet tjera të Kosovës. (Zyrët e Sindikatës, ora 11:00)

- Lidhja Demokratike e Kosovës Dega në Prizren, mban konferencë për medie. (Selia e LDK-së në Prizren, ora 11:00)

- Komisioni për Buxhet, Punë dhe Transfere shqyrton Projektligjin për ndryshimin dhe plotësimin e Ligjit mbi ndarjet buxhetore, si dhe shqyrton listën e kandidatëve për plotësimin e një pozite për anëtar joekzekuiv të Bordit të Bankës Qendrore të Kosovës. (Kuvendi i Kosovës, salla C203, ora 13:30)

- Prezantohet puna e kryer rreth vajzave dhe grave me aftësi të kufizuara të cilat kanë folur hapur për historitë e tyre të, abuzimeve seksuale, dhunës fizike, dhunës psikike, keqtrajtimeve, ofendimeve dhe diskriminimeve. (Ndërtesa e Qeverisë, salla P38, ora 14:30)