03 Shkurt 2023

Java e Universitetit ekspozon historinë gjysmëshekullore të UP-së

Prishtinë, 13 shkurt - Në kuadër të “Javës së Universitetit” u hap sot në Bibliotekën Kombëtare “Pjetër Bogdani” ekspozita “Mote Universitare”, e kuruar për nder të 50 vjetorit të UP-së.

E prezantuar sipas një rendi kronologjik të pesë dekadave të historisë së Universitetit të Prishtinës , ekspozita dokumentuese, me karakter historik, solli në këtë ambient fotografi, dokumente, diploma, dhe relike që lidhen me jetën universitare të UP-së.

Hapjen e ekspozitës e bëri rektori, prof. dr. Marjan Dema, i cili tha që gjysmëshekulli i UP-së karakterizohet me shumë vlera kombëtare që duhen ekspozuar dhe rikujtuar në vazhdimësi. 

“Me këto fotografi, dokumente, diploma dhe relike që lidhen me jetën universitare në tempullin e dijes, ne e prekim edhe një herë historinë tonë që na bënë krenarë, na sjellë serish në mendje rezistencën, këmbënguljen, dhe dëshirën e flaktë për dije e arsimim në këto pesë dekada që po lëmë pas” tha Dema.

Ndërkaq, kuratori i kësaj ekspozite, Ass. Durim Abdullahu tha që nga fakti që shumë relike kanë mbetur të paekspozuara, ai propozon idenë që të hapet një muze i përhershëm i Universitetit të Prishtinës, duke i shfrytëzuar reliket e kësaj ekspozite si bazament për nisjen e tij.

Në minutat në vijim, Abdullahu udhëzoi të pranishmit drejt dokumenteve, fotografive, dhe relikeve të ekspozuara në “Mote Universitare”. Të gjitha objektet e ekspozuara janë origjinale si dhe janë të nxjerra nga arkivi qendror i Rektorati i UP-së, nga arkivat e fakulteteve dhe arkivat private të profesorëve të Universitetit. 

Kalendari

Ngjarjet e datës 3 shkurt 2023  - Këshilli Gjyqësor i Kosovës mban mbledhjen e radhës. (Ndërtesa e KGjK-së, ora 9:00)

- Kuvendi Komunal i Gjilanit mban seancë të jashtëzakonshme, ku në rend dite do të jetë falja e tatimit në pronë në vlerën deri 100 euro për të gjithë tatimpaguesit e kësaj komune, për vitin 2023. (Salla e Kuvendit Komunal të Gjilanit, ora 10:00)

- Sindikata e Sektorit Privat të Kosovës mban konferencë për shtyp lidhur me gjendjen e punëtorëve teknik të Sektorit Privat te Kosovës dhe dialogu me qeverinë dhe institucionet tjera të Kosovës. (Zyrët e Sindikatës, ora 11:00)

- Lidhja Demokratike e Kosovës Dega në Prizren, mban konferencë për medie. (Selia e LDK-së në Prizren, ora 11:00)

- Komisioni për Buxhet, Punë dhe Transfere shqyrton Projektligjin për ndryshimin dhe plotësimin e Ligjit mbi ndarjet buxhetore, si dhe shqyrton listën e kandidatëve për plotësimin e një pozite për anëtar joekzekuiv të Bordit të Bankës Qendrore të Kosovës. (Kuvendi i Kosovës, salla C203, ora 13:30)

- Prezantohet puna e kryer rreth vajzave dhe grave me aftësi të kufizuara të cilat kanë folur hapur për historitë e tyre të, abuzimeve seksuale, dhunës fizike, dhunës psikike, keqtrajtimeve, ofendimeve dhe diskriminimeve. (Ndërtesa e Qeverisë, salla P38, ora 14:30)