05 Dhjetor 2022

Hapet aktiviteti 'KarrieraUP' në Universitetin e Prishtinës

Prishtinë, 28 maj - Dje është bërë hapja zyrtare e aktivitetit “KarrieraUP”, i organizuar nga Qendra për Zhvillim të Karrierës në Universitetin e Prishtinës.

Ky aktivitet, i mbajtur virtualisht, synon orientimin në karrierë dhe ndërlidhjen me tregun e punës. Në kuadër të këtij takimi u realizua prezantimi i parë virtual i këtij aktiviteti nëntë ditor, i cili do të zgjasë deri më 05 qershor.

Hapja zyrtare e aktivitetit u bë nga rektori i UP-së, prof. Marjan Dema, i cili u dëshiroj suksese studentëve pjesëmarrës në këto takime virtuale.

“Siç tashmë e dini, për disa ditë rresht, ju do të takoni virtualisht punëdhënës potencialë, të cilët do të ndajnë me ju perspektivat nga përvoja e tyre, për të ju shërbyer juve në karrierën tuaj. Urojmë që këto takime, të jenë udhërrëfyes në rrugëtimin tuaj drejt suksesit” theksoi Dema në fjalën e tij.

Dema, për realizimin e këtyre takimeve, falënderoi përfaqësuesit e tregut të punës, të cilët i janë përgjigjur pozitivisht ftesës së UP-së për të biseduar me studentët tanë rreth tematikave të aktivitetit, si dhe stafin e QZhK-së për punën e bërë.

Të pranishmëve në këtë takim virtual iu drejtua me fjalë përshëndetëse edhe prorektorja për zhvillim dhe cilësi, prof. asoc. Merita Berisha, e cila ftoi studentët që të përfitojnë nga këto takime, duke u bërë pjesë aktive e tyre.

Pjesëmarrësve të këtij takimi, të mbajtur përmes platformës Zoom, iu drejtuan edhe disa nga përfaqësuesit e institucioneve pjesëmarrëse, të do të prezantojnë ditëve në vijim.

Pas fjalëve përshëndetëse, menaxherja për Rekrutimin e Talentëve në kompaninë "Sutherland", znj. Donika Karaxha prezantoi profilin e kompanisë, mundësitë që ofrojnë për punësimin e studentëve dhe të diplomuarve të UP-së si dhe dha këshilla të vlefshme për përgatitjen e studentëve për tregun e punës.

Takimi i radhës do të zhvillohet sot ku folës do të jetë përfaqësuesi nga kompania farmaceutike “Gentipharm”, Demir Shkodra.

Gjatë ditëve në vijim do të prezantojnë institucione dhe kompani të profileve të ndryshme që mbulojnë shumicën e programeve studimore në UP. Ata janë: zAvni Syla nga kompania “Elen”, znj. Blerta Thaçi nga Open Data Kosovo, znj. Blerina Kuçi-Hoti nga ProCredit Bank, Bledion Baraliu nga ArchiEdu, Ayhan Nis nga DEKRA Arbeit, znj. Yllka Hoxha nga BIRN dhe znj. Vjosa Gjakova nga Talent Seekers and Keepers. Rreth mundësisë së pjesëmarrjes vizitoni faqen zyrtare të Qendrës për Zhvillim të Karrierës në Facebook (facebook.com/qzhkunipr)

 

Kalendari

Ngjarjet e datës 5 dhjetor 2022 - Kryetari i Kryeqytetit, Përparim Rama, do të nënshkruajë marrëveshjen me partneritet publiko privat për ndërtimin e tri shkollave të reja dhe ofrimin e shërbimeve të mirëmbajtjes dhe operimit në Komunën e Prishtinës. (Ndërtesa e Vjetër e Komunës së Prishtinës, ora 9:00)

- Instituti i Kosovës për Drejtësi, Grupi për Studime Juridike dhe Politike, Lëvizja Fol, Iniciativa për Progres, Çohu dhe Colombus organizojnë tryezë të rrumbullakët, ku do të diskutohet lidhur me “Reforma në Drejtësi”. (Hotel Sirius, ora 10:00)

- Ministrja e Drejtësisë, Albulena Haxhiu do të bëjë lansimin e Protokollit Shtetëror për Trajtimin e Rasteve të Dhunës. (Hotel Emerald, ora 11:00)

- Komisioni Hetimor Parlamentar në lidhje me procesin e vendimmarrjes në sektorin e energjisë për periudhën 2006-2022 interviston Njazi Thaçin, Luigj Imerin, Perparim Kabashin, Nagip Krasniqin, Faruk Hajrizin, Rrezarta Pllanën, Hysen Fazliun, Musa Misinin, Skender Hazirin, Ali Hamitin, Izet Rushitin dhe Krenar Bujupin. (Ndërtesa e Kuvendit, salla N204, ora 11:00)

- Presidentja e Republikës së Kosovës, Vjosa Osmani Sadriu pret në takim Ndihmës Administratoren e USAID-it, Erin E. McKee. (Kabineti i Presidentes,ora 12:00)

- Ministria e Kulturës, Rinisë dhe Sportit në bashkëpunim me UNICEF-it dhe UN Volunteers shënojnë Ditën Ndërkombëtare të Vullnetarizmit. (Kino Armata, sheshi “Zahir Pajaziti”, ora 13:00)

- Instituti i Kosovës për Drejtësi organizon tryezë të rrumbullakët, ku do të prezantohet raporti me titull “Parashkrimi i Korrupsionit”, i cili është rezultat i monitorimit sistematik që IKD i bënë sistemit Gjyqësor dhe atij Prokurorial të Republikës së Kosovës. (Hotel Sirius, ora 13:00)

- Zëvendësministri i Drejtësisë, Blerim Sallahu, do të hapë ekspozitën e të burgosurve rreth rasteve të Dhunës në Familje. (Hollin e Ministrisë së Drejtësisë, ish objekti Rilindja, ora 13:00)

- Këshilli Rinor Kosovar në bashkëpunim me Kuvendin e të Rinjëve të Ferizajt dhe Komunën e Ferizajt do të mbajë panelin e diskutimit dhe aktivitetin ‘Dita e Vullnetarizmit’ me qëllim të promovimit dhe diskutimit rreth punës vullnetare, nevojave të vullnetarëve dhe aktiviteti i tyre në këtë komunë. (Salla e Kuvendit Komunal në Ferizaj, ora 14:00)

- Lëvizja FOL në kuadër të  “Javës Kundër Korrupsion 2022” mban konferencë për media me ç’rast do të bëjë publikimin e raportit "Masat disiplinore kundër nëpunësit civil për korrupsion dhe shkelje etike". (Hotel Sirius, ora 15:15)

- Kryeministri i Kosovës, Albin Kurti pret në takim Ndihmës Administratoren e USAID-it, Erin E. McKee. (Zyra e Kryeministrit të Republikës së Kosovës, ora 15:45)            


- Komisioni Qendror i Zgjedhjeve mban mbledhjen e radhës. (Objekti i KQZ-së, ora 16:30)