13 Dhjetor 2018

Rritet deficiti tregtar, arrin në 276 milionë euro

Prishtinë, 24 shtator - Agjencia e Statistikave të Kosovës (ASK) ka publikuar të dhënat lidhur me rrjedhat e eksportit dhe importit për muajin gusht 2018.

Të dhënat nga Tregtia e Jashtme në Kosovë tregojnë për një deficit tregtar më të lartë për 4.5% në muajin gusht 2018, në raport me periudhën e njëjtë të vitit 2017, gjegjësisht në vlerë prej 276,5 milionë Euro, krahasuar me deficitin prej 264,6 milionë Euro në vitin 2017. Eksporti mbulon importin me 9.9%.

Eksporti i mallrave në muajin gusht 2018 kishte vlerën 30,4 milionë Euro, ndërsa importi 307,0 milionë Euro, që është një rënie prej (-6.5%) për eksport dhe rritje prej 3.3% për import, duke krahasuar me periudhën e njëjtë të vitit 2017.
 
Sipas të dhënave të grupeve kryesore të eksportit: 24.9% të eksporteve e përbëjnë metalet bazë dhe artikujt prej tyre; 17.4% e përbëjnë produktet minerale; 15.0% e përbëjnë ushqimet e përgatitura, pijet dhe duhani; 12.0% e përbëjnë plastika, goma dhe artikujt prej tyre; 9.7% e përbëjnë produktet bimore; 4.2% e përbëjnë makineritë, pajisjet mekanike dhe elektrike; 3.8% e përbëjnë artikujt e ndryshëm të prodhuar, etj.

Ndërsa, sipas të dhënave të grupeve kryesore për import: 17.1% e përbëjnë produktet minerale; 14.3% e përbëjnë ushqimet e përgatitura, pijet dhe duhani; 12.0% e përbëjnë metalet bazë dhe artikujt prej tyre; 10.6% e përbëjnë makineritë, pajisjet mekanike dhe elektrike; 6.7% e përbëjnë mjetet e transportit; 6.3% e përbëjnë produktet e industrisë kimike; 6.2% e përbëjnë plastika, goma dhe artikujt prej tyre; 4.8% e përbëjnë kafshët e gjalla, produktet me origjinë kafshe etj.

Eksportet e Kosovës në vendet e BE-së arritën në 10,5 milionë Euro, ose rreth 34.5% e eksporteve të përgjithshme, me një rritje prej 31.4%. Partnerët kryesorë për eksportin e mallrave në BE janë: Gjermania (7.2%), Sllovenia (5.5%), Britania e Madhe (4.7%), Holanda (3.6%) etj.

Kurse, importet e Kosovës nga vendet e BE-së ishin rreth 128,2 milionë Euro, ose 41.8% e importeve të përgjithshme, me një rritje prej 5.0%. Importet me pjesëmarrje më të lartë ishin nga: Gjermania (11.1%), Italia (6.5%), Rumania (4.1%), Greqia (3.3%), Polonia (3.2) etj.

Në muajin gusht 2018, eksportet e Kosovës me vendet CEFTA-s arritën në 15,4 milionë Euro, ose 50.6% të eksporteve të përgjithshme, me një rënie prej (-6.2%). Partnerë kryesorë për eksport nga vendet e CEFTA-s janë: Shqipëria (19.8%), Serbia (11.5%), Maqedonia (11.1%) dhe Mali i Zi (6.2%).
 
Ndërsa, importet nga vendet e CEFTA-s në muajin gusht 2018 arritën në 90,6 milionë Euro, ose 29.5% të importeve të përgjithshme, me një rritje prej 4.2%. Vendet me pjesëmarrje më të lartë për import ishin: Serbia (14.0%), Shqipëria (7.2%), Maqedonia (5.5%) dhe B&H (2.4%).

Eksportet e Kosovës me vendet e tjera të botës arritën në 4,5 milionë Euro, ose 14.9%. Si partnerë më të rëndësishëm nga këto vende për eksport vlen të përmendet Zvicra  me 9.6%.
 
Ndërsa, importet e Kosovës me vendet e tjera të botës arritën në 88,0 milionë Euro, ose 28.7%. Vendet me pjesëmarrje më të lartë për import në këtë grup ishin: Turqia (9.0%) dhe Kina (8.8%).


 

Kalendari

Ngjarjet e datës 13 dhjetor 2018

- Mbahet mbledhja e Komisionit për Mbikëqyrjen e Financave Publike në të cilën do të behët shqyrtimi i raportit të Auditimit për pasqyrat financiare vjetore të Ministrisë së Tregtisë dhe Industrisë dhe shqyrtimi i raportit te auditimit për Pasqyrat Vjetore Financiare të Ndërmarrjes Publike Hekurudhat e Kosovës - Trainkos. (Ndërtesa e Kuvendit, salla N204, ora 10:00)

- Grupi Kombëtarë Monitorues i  Fëmijëve “Respect Our Right” mbeshtetur nga organizatat “Syri i Vizionit” në partneritet me “Save the Children”, organizojnë konferencën për  publikimin e raportit monitorues ‘’Hendeku, kurrikula dhe zbatueshmëria e saj’’. (Hotel International Prishtina, ora 10:00)

- Shërbimit Spitalor dhe Klinik Universitar të Kosovë prezanton rezultatet e punës dhe të arriturave për vitin 2018. (Hotel Emerald, ora 10:00)

- Koalicioni i OJQ-ve në kuader të Javës Anti-Korrupsion organizon tryezën lidhur me nevojen për procesin e vetingut në Kosovë dhe vullneti politik. (Hotel Sirius, ora 10:00)

- Kosova Youth Atlantic Treaty Asocation mban debatin “Transformimi i FSK-s, ndikimi në sigurinë kombëtare dhe rajonale”. (Kolegji Universum në lagjjen Ulpiana, ora 10:30)

- Ministri i inovacionit dhe ndërmarresisë, Besim Beqaj raporton para Komisionit për Zhvillim Ekonomik, Infrastrukturë, Tregti, Industri dhe Zhvillim Rajonal lidhur me punën e ministrisë për ketë vit, me theks të veçantë ndarja e fondeve dhe grandëve për start up-et dhe bizneset tjera, si dhe planifikimi i punëve për vitin e ardhshëm. (Ndërtesa e Kuvendit, salla N 303, ora 11:00)

- ADMOVERE organizon promovimin e raportit "Universiteti i Prishtinës - raportet e akreditimit, revistat dhe bibliotekat". (Hani i 2 Robertëve, ora 11:00)

- Let’s Do It do të organizojë aksion pastrimi në Ferizaj ku do të pastrohet një deponi ilegale në të cilën do të marrin pjesë edhe pjesëtarë të KFOR-it amerikan. (Magjistralja afër Mileniumit në Ferizaj, ora 11:00)

- Ministri i Ministrisë së Diasporës dhe Investimeve Strategjike, Dardan Gash raporton para Komisionit për Punë të Jashtme, Diasporë dhe Investime Strategjike. (Ndërtesa e Kuvendit, salla N 302, ora 11:00)

- Ministri i Drejtësisë, Abelard Tahiri merr pjesë në tryezë diskutimi me stafin akademik të Fakultetit Juridik për themelimin e një Gjykate Komerciale - Tregtare. (Salla e profesorëve në Fakultetin Juridik të Universitetit të Prishtinës “Hasan Prishtina”, ora 11:00)

- Nisin punimet për pastrimin e deponisë më të mëdha në Kosovë në Pasomë të komunës se Vushtrrisë. (Pasomë, ora 11:00)

- Koordinatori Nacional për Kulturë, Rini dhe Sport në Qeverinë e Kosovës, Rexhep Hoti do të nënshkruajë marrëveshje bashkëpunimi me Kryetarin e Komunës së Gjilanit, Lutfi Haziri. (Objekti i Komunës së Gjilanit, ora 11:00)

- Nën organizimin e OVL UÇK-së, SHIL UÇK-së dhe SHFD UÇK-së do të bëhet përurimi i kompleksit dhe zbulimi i plakës përkujtimore për 41 dëshmorët e kombit, Mujë Krasniqi dhe 40 bashkëluftëtarët tjerë. (Fshati Gorozhub në Prizreni, ora 12:00)

- Aleanca Kosovare e Bizneseve mban konferencën për media lidhur me ndikimin e taksës 100% në ekonominë e Kosovës. (Selia qendrore e AKB-ës, ora 13:00)

- Mbahet takimi me studentët e Fakultetit Ekonomik - Prishtinë dhe prezentimin e temës ‘’Kosova ofron perspektivë’’ , e organizuar nga kompania Al Trade Center. (Objekti i Fakultetit Ekonomik, ora 14:00)

- Swisscontact në Kosovë, organizon një takim miqesor të fundvitit me media. (Restaurant "Remember Me", ora 14:00)

- Presidenti i Republikës së Kosovës, Hashim Thaçi, inspekton trupat e Forcës së Sigurisë së Kosovës. (kazerma “Adem Jashari” në Prishtinë, ora 15:00)

- Nxënësit Kosovarë marrin pjesë në Garën Nacionale të Recitimit të Poezisë në Gjuhën Angleze. (Amfiteatri i Bibliotekës Kombëtare, ora 15:00)

- Galeria e Ministrisë së Kulturës hap ekspozitën “Një perspektivë ndryshe!” te autorit Agon Nimani. (Galeria e Ministrisë së Kulturës në kompleksin “Qafa”, ora 19:00)