24 Tetor 2017

Kërkohet reduktimi i boshllëkut të shkathtësive në tregun e punës

Prishtinë, 11 tetor - Ndërlidhja më e mirë e sektorit të arsimit me sektorin privat duhet të jetë prioritet kryesor gjatë hartimit të reformave në sektorin e arsimit në vend, me qëllim që të reduktohet boshllëku i shkathtësive në tregun e punës në Kosovë.

Kështu u tha sot në tryezën e organizuar nga Oda Ekonomike Amerikane në Kosovë në bashkëpunim me projektin e Rritjes së Punësimit të të Rinjëve, ku edhe u prezantuan të gjeturat kryesore të një hulumtimi në këtë temë.

Arian Zeka, Drejtor Ekzekutiv i Odës Amerikane vlerësoi se gjetja e kuadrove të kualifikuara për profile të caktuara është identifikuar si një problem serioz për shumë kompani në sektorin privat, gjë që drejtpërdrejt ndikon në konkurrueshmërinë e tyre.

Kjo edhe ka nxitur nevojën e kryerjes së një hulumtimi të tillë, me qëllim të identifikimit të atyre shkathtësive të cilat më së shumti nevojiten në sektor privat, dhe të përpilohen rekomandime që mund të ndihmojnë në përmirësimin e dialogut mes institucioneve arsimore dhe kompanive private.

Patrick Etienne, Drejtor i Agjencisë Zvicrane për Zhvillim dhe Bashkëpunim në Kosovë, shprehu kënaqësinë e tij me hulumtimin e realizuar, duke konsideruar të gjeturat si shumë të rëndësishme dhe si indikatorë të rëndësishëm për eliminimin e problemeve me të cilat përballet sektori privat në aspektin e fuqisë punëtore.

Ai kërkoi nga ministritë përkatëse të marrin në konsideratë të gjeturat e hulumtimit dhe që të promovojnë trajnimet profesionale në mesin e të rinjve, në vend të drejtimeve akademike, për të cilat mund të mos ketë kërkesa në tregun e punës.
 
Në prezantimin e raportit, Visar Hapçiu, Menaxher i Politikave në Odën Amerikane, sqaroi se hulumtimi ka përfshirë një anketë me 200 kompani në shtatë rajone të Kosovës, me fokus në tre sektorë të ekonomisë, gjegjësisht sektorin e prodhimit, tregtisë dhe shërbimeve.

Sipas këtij studimi, boshllëku më i madh i shkathtësive është paraqitur në sektorët e prodhimit dhe shërbimeve, veçanërisht në profile teknike që zakonisht mësohen në shkolla të arsimit dhe aftësimit profesional.

Për më shumë, studimi vë në pah edhe mungesën e komunikimit të vazhdueshëm mes sektorit arsimor dhe atij privat, gjë që ka krijuar një situatë ku kurrikulat e institucioneve arsimore nuk janë në përputhje me kërkesat e kompanive për fuqi të kualifikuar punëtore.
 
Ministri i Arsimit, Shkencës dhe Teknologjisë, Shyqiri Bytyqi, tha se këto të gjetura do t’i hyjnë në punë ministrisë që ai drejton në hartimin e planeve apo reformave për sektorin e arsimit.

Ai sqaroi se arsimi profesional do të jetë prioritet kryesor i ministries gjatë viteve në vijim, meqenëse është identifikuar si pike kryesore e intervenimit për të krijuar kuadro sipas nevojave të sektorit privat.

Bytyqi poashtu përmendi edhe disa nga sfidat kryesore me të cilat shkollat profesionale ballafaqohen, duke përfshirë këtu edhe vështirësitë financiare, si dhe u bëri thirrje bizneseve për bashkëpunim dhe komunikim më të shpeshtë me këto institucione.
 
Skender Reçica, Ministër i Punës dhe Mirëqenies Sociale, prezantoi planet e ministrisë në këtë fushë, duke potencuar se synimi kryesor i tyre është që falë përgatitjes më të mirë profesionale dhe rritjes së mundësisë së punësimit, në Kosovë të ketë sa më pak familje në asistencë sociale.

Reçica u zotua se në ministri do të krijohen grupe të punës për të analizuar të gjeturat e studimit dhe të shihet se si mund të përdoren ato për hartimin e politikave cilësore për aftësim profesional.

Ai poashtu përmendi edhe punën e qendrave të aftësimit profesional që funksionojnë në kuadër të Agjencisë së Punësimit, duke theksuar potencialin që ato kanë në përgatitjen e fuqisë punëtore. 
 
Konferenca vazhdoi me diskutime të mëtejme mes bizneseve, insitucioneve arsimore dhe organizatave të ndryshme vendore dhe ndërkombëtare, ku dakordimi kryesor ishte se reforma e sistemit arsimor duke u bazuar në nevojat e sektorit privat është tejet e rëndësishme për zhvillimin ekonomik afatgjatë në Kosovë.

Kalendari

Ngjarjet e datës 24 Tetor 2017 - Zyra e Bankës Botërore në Kosovë organizon tryezën e rrumbullakët ne tëmën “Vendet e punës dhe pengesat për krijim të punësimit në Kosovë”. (Hotel Swiss Diamond, ora 9:00)

- Ministri i Forcës së Sigurisë së Kosovës, Rrustem Berisha informon Komisionin për Punë të Brendshme, Siguri dhe Mbikëqyrjen e Forcës së Sigurisë së Kosovës lidhur me prioritetet dhe sfidat e kësaj ministrie. (Ndërtesa e Kuvendit, salla N204, ora 10:00)

- Ministri i Drejtësisë,  Abelard Tahiri raporton para Komisioni për Integrime Evropiane lidhur me përmbushjen e obligimeve në kuadër të agjendës evropiane. (Ndërtesa e Kuvendit, salla N 225, ora 10:00)

- Shefi Observer i Misionit të Vëzhgimit të Zgjedhjeve të Bashkimit Evropian, Alojz Peterle mban një konference shtypi në të cilën do të japë një deklaratë mbi gjetjet paraprake të Misionit . (Hotel Swis Diamond, ora 10:30)

- Ministri i Inovacionit dhe Ndërmarrësisë, Besim Beqaj raporton para Komisionit për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi lidhur me programin legjislativ dhe prioritetet e Ministrisë së Inovacionit. (Ndërtesa e Kuvendit, salla N 302, ora 11:00)

- Zëvendës shefi i misionit të Eulex-it në Kosovë, Bernd Thran mban një ligjeratë ku do të diskutohet është ''Roli i EULEX-it në zbatimin e sundimit të ligjit'. (Objekti i kolegjit, ora 11:00)

- Mbahet mbledhja e Komisionit i për Zhvillim Ekonomik, Infrastrukturë, Tregti, Industri dhe Zhvillim Rajonal në të cilën do të bëhët shqyrtimi i Raportit vjetor të Autoritetit Rregullativ të Komunikimeve Elektronike dhe Postare. (Ndërtesa e Kuvendit, salla S-I, ora 11:00)

- Mbahet mbledhja e Komisionit për Punë të Jashtme, Diasporë dhe Investime Strategjike ku do të bëhët formimi i grupit punues për hartimin e Planit për zhvillimin e diplomacisë parlamentare. (Ndërtesa e Kuvendit, salla N 302, ora 13:00)

- Mbahet mbledhja e Komisionit për Buxhet dhe Financa në të cilën do të bëhët shqyrtimi i Raportit financiar të Radiotelevizionit të Kosovës për periudhën janar-shtator 2017 dhe Programit të Shpenzimeve të RTK-së, për periudhën tetor-dhjetor 2017. (Ndërtesa e Kuvendit, salla C 203, ora 13:00)

- Mbahet takimi i 140 -të i Këshillit Prokurorial të Kosovës. (Objekti i Prokurorisë së Shtetit, ora 14:00)

- Ministri i Drejtësisë Abelard Tahiri raporton para Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit në lidhje me Marrëveshjen për Drejtësinë të datës 10 shkurt 2015. (Ndërtesa e Kuvendit, salla N sallën S-I, ora 14:00)

- UBT mban konferencen për të ardhmen Euro-Atlantike të Kosovës. (Kampusi i UBT-së në Lipjan, ora 17:30)

- Kisha Protestante Ungjillore e Kosovës mban akademi solemnje në prag të shënimit të 500 vjetorit të Reformacionit Protestant. (Hotel Swis Diamond, ora 18:00)