10 Dhjetor 2018

IFC dhe Komisioni Evropian ndihmojnë Kosovën që të rrisë investimet

Prishtinë, 20 nëntor - IFC, anëtare e Grupit të Bankës Botërore, ka nënshkruar një Marrëveshje me Ministrinë e Tregtisë dhe Industrisë për të ndihmuar në rritje të investimeve të huaja direkte, duke përafruar më shumë politikat e saj të investimeve me praktikat më të mira ndërkombëtare, si dhe duke përmirësuar shërbimet e saj ndaj investitorëve.

Kjo është në përputhje me zotimet e bëra nga Kosova për zhvillimin e zonës ekonomike rajonale. 

Liderët e Ballkanit Perëndimor janë pajtuar, më 2017, që të krijojnë një Zonë Ekonomike Rajonale (ZER) për të mundësuar lëvizjen e lirë të mallrave, shërbimeve, investimeve dhe punëtorëve profesionalë. IFC, me kontributin financiar nga Komisioni Evropian, do të mbështesë Kosovën në implementimin e reformave kryesore të lidhura me politikat e investimeve të domosdoshme për ZER-në.

Projekti do të adresojë të gjitha fazat e ciklit jetësor të një investimi, që nga përmirësimi i procedurave për hyrjen dhe kryerjen e investimeve, si dhe përforcimi i politikave për mbajtjen e investimeve, deri tek avancimi i punës në promovim dhe tërheqje të investimeve.

“Numri i investitorëve të gatshëm për të hyrë në tregun e Kosovës është në rritje," tha Endrit Shala, Ministër i Tregtisë. “Me këtë projekt, duam të përmirësojmë klimën e investimeve për biznese, të përafrojmë politikat tona të investimeve me standardet e BE-së, si dhe të shërbejmë investitorët në mënyrë më efikase.”

Marrëveshja është pjesë e Projektit të IFC-së për Politikat dhe Promovimin e Investimeve në Rajonin e Ballkanit Perëndimor, i cili synon të shtyjë reformat e përqendruara në klimën e investimeve, për të hapur treg të ri rajonal për investime në Ballkanin Perëndimor.

“Ndërlidhja e ekonomive të rajonit me tregjet globale përmes tregtisë, transportit dhe investimeve do të ndihmojë në shtytjen e investimeve të huaja dhe rajonale, si dhe të krijojë vende të reja pune”, tha Thomas Lubeck, Menaxher Rajonal i IFC-ë për Evropën Qendrore dhe Juglindore.

“Puna jonë me Ministrinë është pjesë e një programi më të gjerë të Grupit të Bankës Botërore, të fokusuar në reformat e klimës së investimeve dhe konkurrencës në rajon.’

“Projekti do të kontribuojë në implementimin e rekomandimeve në lidhje me politikat e investimeve nga Raporti i KE-së për Vendin më 2018,” tha Riccardo Serri, Zëvendës Shef i Zyrës së Bashkimit Evropian / Përfaqësuesit Special të Bashkimit Evropian në Kosovë.

“Projekti do të mbështesë gjithashtu përpjekjet e Kosovës që të zbatojë Planin Shumëvjeçar të Veprimit për themelimin e Zonës Ekonomike Rajonale të miratuar në Samitin e Ballkanit Perëndimor 6 në Trieshte më 2017.”

Komisioni Evropian ka kontribuar me 2.5 milionë euro në Projektin e gjerë Rajonal të Politikave dhe Promovimit të Investimeve, i cili do të implementohet deri në qershor të vitit 2020. Projekti do të implementohet në partneritet me Këshillin e Bashkëpunimit Rajonal.

 

Kalendari

Ngjarjet e datës 11 dhjetor 2018 - Organi Shqyrtues i Prokurimit fillon me transmetim të drejtpërdrejtë “live stream” të sesioneve të tij, një hap ky në drejtim të një qasjeje më transparente nga ana e këtij institucioni. (Zyra e Organit Shqyrtues të Prokurimit, ish-Banka e Lubjanës, kati i 5-të, ora 10:00)

- Koalicioni i OJQ-ve “Java Kundër Korrupsionit 2018” do të mbajë tryezën e diskutimit me temë “Zbatimi i Ligjit për Parandalimin e Konfliktit të Interesit në ushtrimin e funksionit publik në pushtetin legjislativ”. (Hotel Sirius, ora 10:00)

- Shoqata “Miqtë e Amerikës” dhe Komuna e Gjakoves hapin Librin e Zisë, në nderim të Presidentit George H.W. BUSH. (Pallati i Kulturës "Asim Vokshi" në Gjakovë, ora 10:00)

- Në kuadër të Fushatës “Ta Pastrojmë Kosovën” do të organizohet aksion pastrimi në Komunën e Rahovecit. (Rruga kryesore në fshatin Zaqisht të Rahovecit, ora 10:00)

- Shefi i Zyrës së BE-së, Nataliya Apostolova, do të diskutojë me nxënësit e shkollave të mesme me temë "Të mbështesë ndryshimin kulturor: roli i gjeneratave të reja për formësimin e vlerave të së nesërmes".  (Kafiteria Dit' e Nat', ora 10:00)

- Kompania vendore 'Produktet Natyrale të Kosovës' organizon ceremoninë e inaugurimit të linjës së re me teknologji të avancuar për përpunimin e farave të kungullit. (Fabrika 'Produktet Natyrale të Kosovës' në fshatin Loxhë në Pejë, ora 11:00)

- Sindikata e Pavarur e Sektorit Privat të Kosovës të mbajë konferencë për shtyp lidhur me gjendjen e punëtorëve të sektorit privat. (Zyret te BSPK, së ora 11:00)

- Instituti Demokraci për Zhvillim organizon ngjarjen vjetore të shpërblimeve në kuadër të projektit “Leja prindërore për barazi gjinore” që financohet nga Qendra Ndërkombëtare Olof Palme dhe mbështetet nga Qeveria Suedeze. (Libraria Dukagjini, ora 11:00)

- Mbahet tryeza në të cilën do të diskutohet për pakon ligjore kundër korrupsionit, si dhe për punën e institucioneve të drejtësisë në luftën ndaj krimit të organizuar dhe korrupsionit. (Ndërtesa e Kuvendit, salla C-405, ora 11:00)

- Asociacioni i Arkitektektëve të Kosovës dhe Komunës së Gjilanit bën prezantimin e “Bienales së Arkitekturës 2018”, ku do të marrin pjesë edhe përfaqësuesit e Komunës së Gjilanit dhe arkitektët në nivel Kosove dhe ata regjional. (Gjilan, ora 13:00)

- Instituti për Politika Zhvillimore organizon konferencën për shtyp me temë “Standardizimi i produkteve vendore: Shpërndarja dhe shitja e standardeve. (Resource Center Kosovo, në lagjen Pejton, në zyre të Forumit për Iniciativa Qytetare, ora 13:00)

- Koalicioni i OJQ-ve “Java Kundër Korrupsionit 2018” do të organizoj tryezen e diskutimit me temë “Zbatimi i Ligjit për Parandalimin e Konfliktit të Interesit në ushtrimin e funksionit publik në pushtetin ekzekutiv”. (Hotel Sirius, ora 14:00)

- Partia Socialdemokrate mban konferencë për media lidhur me çështjen e dialogut me Serbinë, për të cilën do të flasin nënkryetarët Visar Ymeri dhe Dukagjin Gorani. (Zyrat e PSD-së, në lagjen "Arbëria", ora 14:00)

- Ministria e Administrimit të Pushtetit Lokal në prag të përfundimit të vitit 2018, organizon ngjarjen vjetore për shënimin e të arriturave në vetëqeverisjen lokale në Kosovë si dhe të prezantojë orientimet për vitin e ardhshëm. (Sheshi 21, ora 18:00)