16 Nëntor 2018

Pullat postare “Fauna - Zogjtë e Kosovës”

Prishtinë, 31 janar - Nga sot Filatelia e Postës së Kosovës lëshon në qarkullim të rregullt postar emisionin e pullave postare të titulluar “Fauna - Zogjtë e Kosovës”.

Zogjtë që shfaqen në këto pulla postare janë shtegëtarë, të përhapur në Shqipëri, Kosovë dhe kryesisht në Evropën Veriperëndimore.

Upupa Epops - Pupëza

Koka e pupëzës është e zbukuruar me pendë të gjatë që duket si një kurorë, me një sqep të hollë dhe të gjatë. Ngjyra e ndryshkut në trup, krahët dhe bishti me ngjyrë të zezë dhe me lara të bardha, i jep bukuri të rrallë. Ushqimi i tyre i preferuar mbeten kandrra dhe larvat.

Falco tinnunculus – Skifteri (sokol)

Sokoli apo Skifteri gjendet në hapësira të gjëra, nëpër fusha, ara të mbjella, këneta, etj. Ushqim i tyre i preferuar mbeten insektet dhe fluturat. Lisi është vendi ku sokoli formon folenë.

Sturnus vulgaris – Starlind, Cerloi i zi pikalosh

Shumohet në koloni me të tjerët dhe mund të thuhet se janë të adaptuar shumë mirë me jetën në qytete, me ç ‘rast në qiellin e hapur formësojnë figura të ndryshme atraktive. Foletë e tyre gjenden në vende të ndryshme: në zgavrat e lisave, në hapësirë të ndryshme të shkëmbinjve, etj.

Podiceps cristatus – Kredharaku kurorëmadh

Ky lloj është më i njohuri i familjes së kredharakëve. Mashkulli në kokë ka kreshtë, bisht të shkurtër, pendët e dendura dhe këmbët e përshtatshme për notim. Ushqehet me peshq, larva të amfibeve, kandrra të ujit, etj. Çerdhen e formon në ujë në mes të bimëve të kënetës ose të liqenit.

Oriolus oriolus – Bengu

Mashkulli i kësaj specie është kryesisht me pendë të verdhë dhe të zezë, ndërsa femra dallohet me ngjyrën e saj të gjelbër. Janë të turpshëm, kanë fluturim të fortë dhe të drejtë me disa ulje të cekëta. Njihen për këngët e tyre të bukura.

 

Kalendari

Ngjarjet e datës 16 nëntor 2018 - Mbahet takimi i radhës i Grupit Ndërministror për të Drejtat e Njeriut në Republikën e Kosovës. (Ndërtesa e Qeverisë, salla P-38, ora 9:00)

- Kryeministri Ramush Haradinaj merr pjesë në takimin e Grupit Koordinues Ndërministror për të Drejtat e Njeriut në Republikën e Kosovës. (Ndërtesa e Qeverisë, ora 9:00)

- Zyra e BE-së dhe Këshilli i Evropës do të bashkëorganizojnë një konferencë në kuadër të projektit të përbashkët kundër Krimit Ekonomik e cila do të përqëndrohet në rezultatet e vlerësimit pajtueshmërinë e Kosovës me standardet evropiane dhe ndërkombëtare në fushat e anti-korrupsionit, pastrimit të parave dhe luftimit të financimit të terrorizmit. (Swiss Diamond Hotel, ora 9:15)

- Mbahet seanca e jashtëzakonshme e Kuvendit të Republikës së Kosovës në të cilën do të mbahet debat parlamentar sipas kërkesës së 42 deputetëve për mbajtjen e seancës së jashtëzakonshme lidhur me dështimet dhe skandalet në politikën e jashtme të Republikës së Kosovës. (Kuvendi i Kosovës, ora 10:00)

- Koalicioni i Organizatave për Mbrojtjen e Fëmijëve organizon konferencën për avancimin e shërbimeve sociale. (Hotel Sirius, ora 10:00)

- Universiteti “Isa Boletini” nga Mitrovicë në bashkëpunim me Universitetin “Aleksandër Mosisiu” nga Durrësi organizojnë konferencën ndërdisiplinore ndërkombëtare "Vazhdimësia historike dhe ndryshimi: Ballkani në kontekst evropian dhe global". (Kampusi i ri i Universitetit “Isa Boletini” në Mitrovicë, ora 10:00)

- Koordinatori Nacional për Kulturë, Rini dhe Sport, Rexhep Hoti do të mbajë takim informues me Drejtorët Komunalë të Arsimit në Republikën e Kosovës ku do të shpaloset Programi Nacional për Rininë. (Hotel International në Veternik, ora 10:00)

- Ministria e Administrimit të Pushtetit Lokal organizon ceremoninë solemne për projektet e përzgjedhura për financim në kuadër të Thirrjes së Parë të Programit IPA BNK Mali i Zi – Kosovë 2014-2020. (Hotel International Prishtina, ora 12:00)

- Shfaqet për gazetarë premiera vendore të filmit të metrazhit të gjatë “Nëntori I ftohtë/Cold November” me regji të Ismet Sijarina ku pas shfaqes se filmit do të zhvillohet një konferencë për media ku prezent do të jenë disa prej protagonisteve kryesor. (Cineplexx në Albi Mall, ora 12:00)

- Sindikata e Pavarur e Sektorit Privat mban takim me punëtorët e Llamkosit. (Salla e Kuvendit Komunal të Vushtrrisë, ora 13:00)

- Lëvizja Vetëvendosje mban konferencë për media. (Zyrët qendrore te Vetëvendosjes, ora 14:00)

- Mbahet takimi i deputetëve të Kuvendit të Republikës së Kosovës me qytetarë të Drenasit. (Shtëpia e Kulturës në Drenas, ora 14:00)

- Kryeministri Ramush Haradinaj merr pjesë në inaugurimin e fillimit të punimeve të rrugës së qarkores së Gjakovës. (Rruga Gjakovë - Prizren, ish Fabrika e Elektromotorëve, ora 14:00)

- Muzeu i Kosovës organizon hapjen e ekspozitës “Moti i Madh” kushtuar Heroit të Kombëtar të shqiptarëve Gjergj Kastrioti-Skënderbeu. (Muzeu i Kosovës, ora 18:00)