15 Nëntor 2019

Posta e Kosovës shënoi 150-vjetorin e kartolinave

Prishtinë, 1 tetor - Qindra qytetarë, kryesisht fëmijë, kanë vizituar sot Postën e Kosovës dhe kanë dërguar falas kartolina, brenda dhe jashtë vendit, duke u bërë pjesë e shënimit të 150-vjetorit të kartolinave.

Posta e Kosovës u është bashkuar operatorëve postarë nga mbarë bota që me manifestime të ndryshme kanë përkujtuar dërgimin zyrtar të kartolinës së parë, që është bërë nga Posta Austriake, më 1 tetor të vitit 1869, megjithëse historia e saj daton edhe më herët.

Këtë vit jubilar, Posta e Kosovës e shënoi duke iu ofruar qytetarëve mundësinë për të dërguar kartolina falas në zyrat kryesore postare në qytetet më të mëdha: Prishtinë, Mitrovicë, Gjilan, Ferizaj, Prizren, Gjakovë dhe Pejë.

Nxënësit e klasave të katërta të Sh.F.M.U “Hasan Prishtina” të kryeqytetit, së bashku me mësueset e tyre, kanë ardhur në mënyrë të organizuar në Zyrën Postare nr. 10 dhe kanë postuar kartolina për në vende të ndryshme të Kosovës dhe botës.

Nxënësit dhe vizitorë të tjerë janë njoftuar nga zyrtarë të Postës për historinë e kartolinave, mënyrën e funksionimit të shërbimit postar, udhëtimin e dërgesave në të katër anët e botës, për kutinë dhe pullat postare.

Të gjithë nxënësit dhe qytetarë të moshave të ndryshme kanë përjetuar emocione të veçanta që u bënë pjesë e kësaj ngjarje ndërkombëtare të komunikimit me kartolina, të cilat në të kaluarën janë përdorur aq shumë baballarët dhe gjyshërit e tyre. 

Kalendari

Ngjarjet e datës 15 nëntor 2019 - Klinika e Neonatologjisë dhe Shoqata e Neonatologëve të Kosovës, organizojnë Konferencën e I-rë nderkombëtare. (Hotel Garden, ora 9:00)

- Policia e Kosovës në shënim të ditës botërore të përkujtimit të viktimave në trafikun rrugor, në bashkëpunim me Këshillin e Sigurisë në Trafikun Rrugor dhe me Shoqatën e Sigurimeve , do të mbaj tryezë për shënimin e kësaj dite. (Salla Orion në Prishtinë në afërsi të Kino ABC, ora 9:30)

- Ministria e Arsimit, Shkencës dhe Teknologjisë organizon tryezën dhe punëtorinë me temën “Status quo e Zhvillimit të Kërkimit dhe Inovacionit në Kosovë: Ide rreth së ardhmes së K&I në Kosovë”, mbështetur nga Projekti HERAS i cili përkrahet nga Qeveria e Austrisë. (Hotel Sirius, ora 9:30)

- Komisioni i Pavarur për Miniera dhe Minerale mban punëtorinë lidhur me “Udhëzuesin për miradministrimin e aktiviteteve minerare dhe mjedisore. (Hotel Amazona, ora 10:00)

- Programi i Kombeve të Bashkuara për Zhvillim në Kosovë, përmes projektit Interdev 2, organizon një panair me shoqatat e grave prodhuese për të shënuar Ditën Ndërkombëtare të Sipërmarrësisë së Grave. (Qendra Kulturore në Viti, ora 11:00)

- Ministria e Mbrojtjes organizon ceremoninë e certifikimit të rekrutëve të rinj të FSK-së, gjenerata e dytë 2019. (Kazerma 'Adem Jashari' në Komandën e Forcave Tokësore në Prishtinë, ora 11:00)

- Komuniteti artistik organizon takim përkujtimor për regjisoren Arzana Kraja. (Teatri Kombëtar, ora 12:00)

- Organizata ETEA dhe Kuvendi i të Rinjve të Prishtinës organizon ceremoninë e hapjes të minibibliotekës së lagjes Ulpiana. (Te fontana në lagjen Ulpiana, ora 12:00).

- Ministri i MMPH-së, Fatmir Matoshi, do të nënshkruajë gjashtë Udhëzime Administrative që avancojne fushën e kadastrës dhe regjistrimit të pronës. (Zyret e Agjencisë Kadastrale të Kosoves, ndërtesa e Arkivit të Kosovës, ora 14:00)

- Kryetari i Gjykatës Themelore në Gjilan, Ramiz Azizi, do të mbajë një konferencë për media në të cilën do të prezantohet raporti nga muaji korrik deri në muajin tetor për Gjykatën Themelore të Gjilanit, së bashku me Degët e saja. (Gjykata Themelore Gjilan, ora 14:30)

- Mbahet marsh përkujtimor në këmbë nga Lagja Arbëria, rrugës Fehmi Agani deri te Teatri Kombëtar ku do të bëhet ndezja e qirinjve në përkujtim të viktimave që kanë humbur jetën në aksidente në trafikun rrugor. (Kolegji i Shkencave të Aplikuara Teknike “Tempulli”, ora 18:00)

- Mbahet stërvitja e Kombëtares së Kosovës. (Stadiumi ‘Fadil Vokrri’, ora 18:00)

- Galeria e Ministrisë së Kulturës organizn hapjen e ekspozitës individuale të autores Lumjetë Havolli, e titulluar "Is This Me...Or i Do it For You Only!?". (Galeria e Ministrisë së Kulturës, ora 19:00)

- Qendra për Informim dhe Përmirësim Social feston hapjen e Linjës telefonike për parandalim të vetëvrasjes "Linja e Jetës" në Kosovë! (Menza Ramiz Sadiku, ora 21:00)