17 Janar 2018

Autostrada Prishtinë – Hani i Elezit e gatshme në fund të 2018-s

Prishtinë, 7 nëntor - Autostrada Prishtinë - Hani i Elezit e filluar në korrik të vitit 2014, do të jetë e gatshme për qarkullim në fund të vitit 2018. Kjo autostradë, parashihet të që si qëllim final të ketë krijimin e qasjes më të lehtë në relacionin rrugorë Prishtinë – Shkup.

Ela Ruçi, zëdhënëse në konsorciumin turko-amerikan “Bechtel- Enka”, kompani fituese për ndërtimin e kësaj rruge, thotë se punimet në këtë autostradën po zhvillohen sipas dinamikës së paraparë në kontratë.

“Punët po ecën sipas një programi të paracaktuar me Ministrinë e Infrastrukturës, me të cilët kemi rënë dakord që ceremonia e hapjes finale, pra përfundimi i punimeve, të jetë në fund të vitit 2018”.

“Ky është një angazhim shumë i madh i marrë nga kompania jonë. Ky është një angazhim që ndihet në tërë stafin. Ne po punojmë me intensitet që të ta mbajmë këtë obligim që kemi marrë në raport me qytetarin dhe Qeverinë e Kosovës”, thotë Ruçi.

Autostrada Prishtinë – Hani i Elezit që lidhë Kosovën me Maqedoninë, kap shumën e rreth 600 milionë euro dhe po ndërtohet në një trase tërësisht të re, me gjatësi prej 55 kilometrash.

Ajo do të ketë dy tunele, ndërsa më i gjati do të jetë ai i Kaçanikut, me 2.2 kilometra.

Ruçi thotë se terreni në ndërtimin e kësaj autostrade është mjaft sfidues dhe i vështirë.

“Është një terren që qytetarët e Kosovës dhe atë që vinë nga Maqedonia dhe që e kanë bërë shpesh atë rrugë e njohin sa i vështirë është dhe me shumë rrëshqitje. Është në ndërtim e sipër një prej urave më të mëdha 2.7 kilometra qëshkon mbi hekurudhën ekzistuese. Sfidat teknike janë të jashtëzakonshme. Megjithatë, ne po punojmë intensivisht që puna jonë, rezultati final të jetë ai i kërkuari nga të gjithë”, thotë Ruçi.

Autostradat e Kosovës (autostrada që lidhë Kosovën me Shqipërinë, e përfunduar dhe autostrada për Maqedoni), që synojnë ta lidhin atë me vendet e tjera të rajonit, nuk kanë reflektuar një zhvillim të madh ekonomik, sado që sipas ekspertëve ato mund ta kenë nxitur këtë zhvillim.

Drejtori ekzekutiv i Odës Ekonomike Amerikanë në Kosovë, Arian Zeka në një prononcim për Radion Evropa e Lirë thotë se ndërtimi i autostradave duhet të përcillet me masa të caktuara në fushën e zhvillimit ekonomik.

“Njëri prej përftimeve më konkrete është që Kosova do të bëhet pjesë e rrjeteve rrugore evropiane dhe rrjedhimisht ndërkombëtare, dhe kjo do ta vendosë Kosovën në hartën botërore me një infrastrukturë të zhvilluar rrugore”.

“Por, ajo që vendi duhet të ketë fokusin më të madh janë përftimet në aspektin ekonomik, dhe këtu duhet të punohet në promovimin e eksporteve të Kosovës, ne mënyrë që autostradat të mos shërbenin vetëm për trafikun e njerëzve por të shërbenin edhe për qarkullimin e mallrave nga Kosova në vendet tjera, gjë që ka qenë qëllimi parësor kur ka filluar ndërtimi i autostradave”, thotë Zeka

Shkëmbimet tregtare mes shteteve që lidhin këto autostrada, sipas të dhënave zyrtare të Agjencisë së Statistikave asnjëherë nuk kanë qenë në favor të Kosovës.

Deficiti tregtar vazhdon të jetë i lartë në Kosovë.

Të dhënat zyrtare tregojnë se vlera e importit nga Shqipëria në vitin e kaluar kap vlerën e mbi 100 milionë euro, derisa vlera e produkteve të Kosovës që janë eksportuar në Shqipëri janë rreth 42 milionë euro.

Ndërkaq, importi i mallrave nga Maqedonia në Kosovë në vitin e kaluar ka qenë mbi 150 milionë euro, ndërsa, eksporti nga Kosova në Maqedoni ka qenë mbi 35 milionë euro.

/rel/

Kalendari

Ngjarjet e datës 17 Janar 2018 - Mbahet mbledhje e Komisionit për Shëndetësi, Punë dhe Mirëqenie Sociale në të cilën do të behët shqyrtimi i projektligjit për ndërmarrjet sociale. (Ndërtesa e Kuvendit, sallaN 303, ora 10:00)

- Në kuadër të organizimeve në 550-vjetorin e vdekjes së Skënderbeut dhe Vitit Mbarëkombëtar të Skënderbeut, nesër më 17 janar 2018, zhvillohen homazhe te shtatorja e Skënderbeut. (Shtatorja e Skënderbeut, ora 10:00)

- Mbahet mbledhja e Komisionit për Administratë Publike, Qeverisje Lokale dhe Media në të cilën do të behët shqyrtimi i raportit të punës së Komisionit, për vitin 2017 si dhe shqyrtimi i draft-planit të punës së Komisionit, për vitin 2018. (Ndërtesa e Kuvendit, salla N204, ora 10:00)

- Për nder të 18 vjetorit të themelimit të Administratës Tatimore të Kosovës, do të mbahet shënimin simbolik të këtij përvjetori, në të cilin pjesëmarrës do të jenë Kryeministri i Republikës së Kosovës Ramush Haradinaj, Ministri i Financave Bedri Hamza, palët e interesit dhe donatorët. (Qendra e Shërbimit të Tatimpaguesve, ish-ndërtesa e Gërmisë, ora 11:00) 

- Mbahet mbledhja e Kryesisë së Kuvendit të Republikës së Kosovës. (Ndërtesa e Kuvendit,  salla  C 301, ora 11:00)

- Prezantohen projektet e studentëve, të cilët do të pasqyrojnë punën që është bërë gjatë semestrit dimëror 2017/18. (Fakulteti i Edukimit, ora 11:00)

- Mbahet mbledhje e Komisionit për të Drejtat, Interesat e Komuniteteve dhe për Kthim në të cilën do të behët shqyrtimi i Projektligjit për Tatimin në Pronën e Paluejtshme, me raport amandamente të Komisionit funksional për Buxhet dhe Finanaca. (Ndërtesa e Kuvendit, salla N 303, ora 12:00)

- Ministri i Ministrisë së Inovacionit dhe Ndërmarrësisë, Besim Beqaj do të vizitojë kompaninë e prodhimit të produkteve farmaceutike “Trepharm”. (Hapësirat e “Trepharm” në Sllatinë, ora 12:30)

- Komuna e Gjilanit ben zbulimin e bustit te heroit Gjergj Kastrioti - Skenderbeu. (Sheshi kryesore para zyres se kryetarit ne Gjilan, ora 13:00)

- Mbahet Akademi kushtuar 550 vjetorit të Skënderbeut, me ç ‘rast do të promovohet pulla postare e Postës së Kosovës dhe Postës së Maqedonisë në të cilen do të nderohen edhe figurat e shquara të shqiptarëve, Jusuf e Bardhosh Gërvalla dhe Kadri Zeka, në 36-vjetorin e vrasjes së tyre. (Teatri Kombëtar të Kosovës, ora  15:00)

- Komuna e Gjilanit organizon akademin e Flakes se Janarit 2018, qe i kushtohet 550 vjetorit te vdekjes se heroit kombetar Skenderbeu dhe 50 vjetorit te protestave masive per flamurin kombetar. (Teatri i Qytetit, ora 16:00)

- Muzeu i Kosovës, me nismën e "Museum Illyricum" - Zvicër, organizojnë ekspozitë me libra; pulla dhe bankënota nga mesjeta e deri në vitet '30-ta. (Lapidariumin e Muzeut të Kosovës, ora 18:00)

- Hapet ekspozitë 55 portrete për 550-vjetorin e vdekjes së Skënderbeut dhe Vitit Mbarëkombëtar të Skënderbeut. (Swiss Diamond Hotel, ora 18:00)

- Në 550 vjetorin e vdekjes së heroit kombëtar Skenderbeu dhe 50 vjetorit të protestave masive për flamurin kombëtar organizon aktivitetin Peneli i Flakes. (Teatri i Qytetit të Gjilanit, ora 19:00)