08 Dhjetor 2021

Së shpejti nis edicioni i 8-të i konferencës më të madhe teknologjike në Ballkan

Prishtinë, 19 tetor - Nën sloganin “Dare to Be the Change” [Guxoni të jeni ndryshimi], një ndër konferencat më të mëdha të teknologjisë në Ballkan, Doku.Tech, këtë vit do të shënojë Edicionin e 8-të me radhë.

Doku.Tech – të cilin e sjell IPKO Foundation – edhe këtë vit për shkak të rrethanave pandemike, vjen tek audienca me një program të kombinuar mes virtuales dhe fizikes, i cili përmban: fjalime nga sipërmarrës të suksesshëm ndërkombëtarë dhe lokalë, punëtori 48 orëshe për krijimin e lojërave, e njohur si Game Jam, si dhe Sfidën “Do It Yourself [DIY]”.

Ky edicion i Doku.Tech do të nis më 31 tetor 2021, me programin e folësve dhe do të vazhdojë me aktivitetet e tjera gjatë tërë muajit nëntor. Fjalimet inspiruese të folësve të këtij edicioni do të vijnë tek ju përmes ekranit të RTV Dukagjini dhe Kallxo.com, çdo të diel, nga ora 20:30, për tri javë rresht.

Programi i folësve nis Rob Flaherty, Drejtor i Strategjisë Dixhitale në Shtëpinë e Bardhë, i cili ka qenë edhe Drejtor Dixhital i Kampanjës Presidenciale të Joe Biden në vitin 2020.

Programi do të vazhdojë me ligjëruesin akademik për bazën e të dhënave dhe menaxhimin e projekteve, Naim Hoxha, i cili është edhe një prej të parëve të angazhuar në Sektorin e IT-së në Kosovë.

Në mesin e të ftuarve të këtij edicioni është edhe Drejtori Ekzekutiv dhe bashkëthemeluesi i Kompanisë “Cyborg Nest”, Liviu Babitz, i cili me ndihmën e teknologjisë së avancuar ka gjetur një mënyrë për të zgjeruar përceptimin tonë për botën me një shqisë të re.

Edicioni i sivjetëm sjell edhe Hana Zeqa, e cila është themeluese e ‘Fight or Flight’, një studio e Modës së Ngadaltë & Teknologjisë së Modës në Prishtinë.

Në mesin e shumë temave të tjera, edicioni i sivjetëm i Doku.Tech sjell edhe idetë inovative dhe risitë më të fundit nga industria e ushqimit.

Në mesin e të ftuarve e kemi Albana Rama, themeluese e Kompanisë “The Rainforest Company”, lidere në Tregun Evropian për produktet e Açaí-it, me origjinë nga Amazona. Përveç Albanës, për risitë dhe inovacionet në këtë industri, do të flasin edhe vëllezërit Edin dhe Sead Haliti, bashkëthemelues të Mudro Bioindustry në Kroaci.

Pra, këtë vit jemi fokusuar tek rrëfimet e njerëzve që shquhen për të arriturat e tyre në fushën e teknologjisë, njerëz që kanë lënë gjurmë me idetë dhe lëvizjet e tyre.

Një edicion më shumë, përmes të cilit do shkëmbejmë njohuri, trajtojmë teknologjinë dhe aspektet e saj shoqërore, si dhe do inspirojmë të rinjtë që të bëhen liderë të kësaj fushe në të ardhmen.

Për sloganin e këtij viti “Dare to Be the Change” [Guxoni të jeni ndryshimi], ne jemi inspiruar tek lëvizjet që janë bërë pikërisht në Kosovë, shumë vite më parë. Kujtojmë se viti 2021 shënon 30 vjetorin e Referendumit për Pavarësi në Kosovë.

"Pra, ua rikujtojmë njerëzve fuqinë e një shoqërie aktive; fuqinë e një komuniteti që koordinon veprimet dhe nxitë ndryshimet që do t’i shoh në një shoqëri. Kësisoj, ne marrim gjërat ‘në duart tonë’, në vend se t’ju kërkojmë të tjerëve të marrin vendime dhe të veprojnë për ne."

Pikërisht, folësit e këtij edicioni, janë ata që kanë përshpejtuar ndryshimin jo vetëm në komunitetin e tyre, por në mbarë botën, duke marrë vendime për vetën e tyre dhe duke jetuar sipas thënies së famshme të një prej emrave më të njohur në fushën e shkencave kompjuterike, Grace Hopper, sipas të cilit: “Gjithmonë mbani mend se është shumë më e lehtë të kërkosh falje sesa të marrësh leje," ... "Në këtë botë kompjuterash, gjëja më e mirë për të bërë është ta bësh atë.”

Edicioni i 8-të i Doku.Tech po përkrahet nga Ambasada e Shteteve të Bashkuara të Amerikës në Kosovë, GIZ Kosova, Ministria e Kulturës, Rinisë dhe Sportit dhe Komuna e Prishtinës.
 
 

Kalendari

Ngjarjet e datës 8 dhjetor 2021

- Komisioni për të Drejtat dhe Interesat e Komuniteteve dhe Kthim shqyrton Projektligjin për tregtinë me produkte të naftës dhe karburante të ripërtërishme, dërgimin e Forcës së Sigurisë së Kosovës jashtë vendit, etj. (Ndërtesa e Kuvendit, salla N225, ora 10:00)

- Ambasada Franceze, Aleanca Franceze e Prishtinës dhe Espace Campus France, në bashkëpunim me Universitetin e Prishtinës dhe Universitetin AAB organizojnë hapjen e Panairit Universitar Francez në Kosovë i cili do tu mundësoj studentëve kosovarë të zbulojnë programet akademike të ofruara nga 30 universitete dhe 16 webinare nga Franca. (Universitetin AAB, ora 10:00)

- Ministri i  MMPHI Liburn Aliu raporton para Komisionit për Mbikëqyrjen e Financave Publike lidhur me raportin e auditimit të përformancës "Mbledhja, trajtimi dhe asgjësimi i mbeturinave komerciale”. (Ndërtesa e Kuvendit, salla N10, ora 10:00)  

- VentureUP në partneritet me Sustainability Leadership Kosova dhe financuar nga UNDP organizon ditën e garës finale e eko-startup-eve të Programit Green Hub. (Amfiteatri i objektit të Administratës Qendrore të Universitetit të Prishtinës, ora 10:00)

- Komisioni për Çështje të Sigurisë dhe Mbrojtjes shqyrtimin raportin me propozim-amendamente për Projektligjin për ndryshimin dhe plotësimin e Ligjit për Deminim Humanitar. (Ndërtesa e Kuvendit, salla N302, ora 11:00)

- Mbahet mbledhja e Kryesisë së Kuvendit të Republikës së Kosovës. (Ndërtesa e Kuvendit, salla C 301, ora 12:00)

- Të rinjte e iniciatives “Hajde në shkollë” organizojnë forum teatrin që ka për qëllim vetëdijësimin dhe parandalimin e braktisjes së shkollimit në mesin e të rinjve në komunën e Klinës. (Shtëpia e kulturës “Jehona e Dukagjinit” në Klinë, ora 14:00)

- Kosovo 2.0 dhe Fondacioni 17  organizojnë diskutimin lidhur me mobilizimin e komunitetit për ruajtjen dhe rikthimin e hapësirave të përbashkëta publike, me fokus në historinë e tri kinemave që i shpëtuan privatizimit. (Kino Armata, ora 17:00)

- OJQ “Zëri i Romëve, Ashkalive dhe Egjiptianëve” organizojnë diskutimin "Le të flasim" i cili synon të sjellë vëmendjen dhe ndërgjegjësimin tek audienca në lidhje me diskriminimin racor, martesat e hershme, gjuhën e urrejtjes në institucionet publike dhe rrugën e edukimit mbi dy dekada. (Kino Armata, ora 19:00)