01 Dhjetor 2020

Lansohet loja 2D “Be in my shoes” e krijuar nga fëmijët me nevoja të veçanta

Prishtinë, 20 nëntor - Këshilli Rinor Kosovar ka bërë sot lansimin e lojës elektronike dydimensionale (2D) “Be in my shoes”, e krijuar nga fëmijët me nevoja të veçanta, si pjesë e projektit "Mos supozo nevojat e mia".

Loja elektronike 2D është bërë me qëllim të identifikimit të nevojave kryesore të fëmijëve me nevoja të veçanta në arsimin fillor në Kosovë dhe adresimin e tyre tek organet kompetente për të mundësuar gjithëpërfshirje arsimore.

Nëpërmjet kësaj loje, janë shkruar shtatë nevoja kryesore të fëmijëve, të cilat janë zbuluar pas intervistimit të rreth 210 fëmijëve nga 50 shkolla të rajoneve të ndryshme të Kosovës.

Koordinatorja e këtij projekti, Rina Gosalci tha se loja është bërë me përjetim të tri shqisave njerëzore.

"Një tjetër karakteristikë e kësaj loje është që ka mekanikë të plotë të kontekstit të niveleve. Domethënë secili nga nivelet mund të përmbushet në një formë mekanike. I përfshinë aktivizimin e tri shqisave përgjatë këtyre niveleve. Kemi shqisën e të pamurit, shqisën e të dëgjuarit dhe të prekurit. Me këtë kemi dashur të ofrojmë një lojë që është e thjeshtë por në të njëjtën kohë përcjellë një mesazh, përmes krijimit të figurave dhe gjithashtu edhe bashkëngjitjes edhe të zërave të ndryshëm në mënyrë që t’u përshtatet nevojave të fëmijëve", tha Gosalci.

Disa nga nevojat e gjetura për të cilat është krijuar edhe kjo lojë elektronike, sipas Gosalcit është nevoja për përfshirje dhe mbështetje në procesin mësimor, nevoja për përdorim të metodave konkrete gjatë orës mësimore, nevoja për shoqëri dhe aktivitete jashtë-shkollore.

Fokusi i kësaj loje është i bazuar në eksperiencë dhe jo në karaktere të lojës ndërsa ka disa nivele, si niveli Labirinti – që vë në pah nevojën për shoqëri dhe infrastrukturë; Ylberi – që vë në pah nevojën për diagnozë të saktë; Pishtari – që vë në pah nevojë për aktivitete jashtëshkollore.

"Be in my shoes" është një fushatë që ka për qëllim ngritjen e ndjeshmërisë tek njerëzit përmes lojës 2D me po të njëjtin emër, të krijuar në bazë të nevojave kryesore të fëmijëve me nevoja të veçanta në arsimin fillor në Kosovë.


Kalendari

Ngjarjet e datës 1 Dhjetor 2020

- Komisioni Hetimor Parlamentar lidhur me procesin e privatizimit në Kosovë në të cilën do të behët plotësimi i listës së dëshmitarëve. (Ndërtesa e Kuvendit, salla N10, ora 9:00)

- Drejtorit të AKI-së raporton para Komisionit për Mbikëqyrjen e Agjencisë së Kosovës për Inteligjencë lidhur me gjendjen e sigurisë në vend. (Ndërtesa e Kuvendit, salla N204, ora 9:30)

- Campus France, Ambasada Frnceze në Kosovë, Aleanca Franceze e Prishtinës dhe Universiteti i Prishtinës organizojnë Panairin e tretë Universitar Francez në Kosovë. (online -https://tourneebalkanskosovo.com, ora 10:00)

- Mbahet edicioni i 5-të virtual i Green Business Expo. (Businessexpo.greenkosovo.com, ora 10:30)

- Ministri i Shëndetësisë Armend Zemaj raporton para Komisionit për Mbikëqyrjen e Financave Publike lidhur me raportin e auditimit për Pasqyrat Vjetore Financiare të vitit 2019, për Ministrinë e Shëndetësisë. (Ndërtesa e Kuvendit, salla N302, ora 11:00)

- Komisioni për Ekonomi, Punësim, Tregti, Industri, Ndërmarrësi dhe Investime Strategjike diskuton lidhur me rekomandimet e dala nga “Raporti për vendin për vitin 2020, i Komisionit Evropian” me të ftuar ministrat dhe përfaqësuesit e agjencive të pavarura. (Ndërtesa e Kuvendit, salla N506, ora 11:00)

- Komisioni Hetimor Parlamentar mbi procesin e licencimit, operimit, mbikëqyrjes dhe aplikimit për lejet e hidrocentraleve në Republikën e Kosovës interviston drejtorin e Departamentit të mjedisit dhe ujërave Muhamet Malësiu dhe drejtorin e Autoritetit të Rajonit të Pellgjeve Lumore, nga Ministria e Ekonomisë dhe Ambientit, Gani Berisha lidhur me lejet e lëshuara për operimin e dy hidrocentraleve nga kompania “Kelkos Energy”. (Ndërtesa e Kuvendit, salla N225, ora 11:00)

- Nënkryetari i Partisë Demokratike të Kosovës, njëkohësisht, kryetari i Degës së PDK-së në Prizren, Shaqir Totaj, i shoqëruar nga deputetja Eliza Hoxha, mbajnë konferencë për media në të cilën do të flasin për shtatoren e re të Skënderbeut, punën e dobët artistike dhe lokacionin jo adekuat. (Zyret e PDK-së në Prizren, ora 11:00)  

- Komisioni Hetimor Parlamentar mbi procesin e licencimit, operimit, mbikëqyrjes dhe aplikimit për lejet e hidrocentraleve në Republikën e Kosovës interviston kryetarin e Komunës së Deçanit, Bashkim Ramosaj. (Ndërtesa e Kuvendit, salla N225, ora 13:00)

- Partia Demokratike e Kosovës, Dega në Prishtinë, do të mbajë konferencë për medie. (Te stacioni i autobusëve urbanë “Katedralja”, ora 13:00)

- Zyrtarët e Agjencisë së Ushqimit dhe Veterinarisë raportojn para Komisionit për Bujqësi, Pylltari, zhvillim Rural, Infrastrukturë dhe Mjedis rreth importimit të vajit të palmës. (Ndërtesa e Kuvendit, salla N204, ora 13:00)

- Instituti Demokratik i Kosovës organizon diskutimin online "Kuvendi përballë dialogut Kosovë-Serbi”, me deputetët e Kuvendit të Kosovës. (Paltforma Zoom dhe Live në faqen e KDI-së në Facebook, ora 13:00)

- Instituti Demokraci për Zhvillim (D4D) mban diskutimin “Rimëkëmbja nga viti 2020: Si të rindërtojmë ekonominë dhe politikat sociale në vitin 2021?”. (Hotel Sirius, ora 17:00)

- Kryeministri Avdullah Hoti mban konferencë për media lidhur me menaxhimin e situatës me pandeminë Covid-19. (Ndërtesa e Qeverisë, ora 17:00)