07 Korrik 2020

BE i kërkon Facebook t'i përshtatet standarteve evropiane

Bruksel, 17 shkurt - Komisioneri i Bashkimit Evropian (BE) për industrinë, Thierry Breton, tha të hënën se i takon Facebook-ut t’i përshtatet standardeve të Evropës, e jo anasjelltas.

Ai i kritikoi si të pamjaftueshme rregullat e reja të propozuara nga gjiganti amerikan i mediave sociale.

Komentet e drejtpërdrejta u bënë pas një takimi të shkurtër që zoti Breton pati me kreun ekzekutiv të kompanisë Facebook, Mark Zuckerberg, dhe dy ditë para se ai të paraqesë serinë e parë të rregulloreve që synojnë të frenojnë gjigantin amerikan të teknologjisë dhe kompanitë kineze të subvencionuara nga shteti.

"Nuk na takon neve t’i përshtatemi kësaj kompanie, i takon asaj të na përshtatet neve,” tha për median zoti Breton, ish-Drejtor Ekzekutiv i kompanisë Orange të Telekomit Francez, dhe i kompanisë teknologjike Atos.

Zoti Zuckerberg u kishte thënë më parë gazetarëve se ai kishte patur një bisedë të gjerë dhe të mirë me zotin Breton.

Breton tha ndërkaq se ai do të vendosë deri në fund të vitit nëse do të miratohen rregulla të ashpra si pjesë e ligjit për shërbimet dixhitale për rregullimin e platformave në internet dhe përgjegjësive të tyre.

Ai hodhi poshtë një dokument diskutimi të publikuar nga firma Facebook të hënën që hedh poshtë ato që dokumenti i cilëson si rregullore ndërhyrëse.

Shefja e drejtësisë e BE-së, Vera Jourova, e cila gjithashtu u takua me zotin Zuckerberg, u shpreh po aq këmbëngulëse lidhur me rolin që duhet të luajë Facebooku në luftën kundër gjuhës së urrejtjes, dezinformimit dhe manipulimit të zgjedhjeve në internet.

"Facebook nuk mund të heqë dorë nga të gjitha përgjegjësitë dhe Zuckerberg duhet t'i përgjigjet pyetjes se çfarë lloj kompanie duan të jenë dhe cilat vlera dëshirojnë të promovojnë," tha ajo në një deklaratë.

Komisioneri i BE-së për industrinë, Breton, do t’i njoftojë propozimet të mërkurën.

Kalendari

Ngjarjet e datës 7 Korrik 2020 - Dr. Basri Sejdiu do të mbajë konferencë për media lidhur me vendimin e Bordit Drejtues për shkarkimin nga detyra e drejtorit të përgjithshëm të SHSKUK. (QKUK, ora 11:00)

- Ministri i Drejtësisë Selim Selimi do të vizitoje Komunën e Prishtinës. (Ndërtesa e Komunës së Prishtinës, ora 11:00)

- Kryetari i Sindikatës së Pavarur të Sektorit Privat të Kosovës, Jusuf Azemi do të mbaj takim me Ministren e financave, znj. Hikmete Bajrami me të cilën do të bisedoj lidhur me pagesën e pagave të  punëtorëve nga pakoja emergjente, tërheqjen e mjeteve për punëtorë nga fondi i kursimeve si dhe eliminimin e gabimeve teknikeve gjatë  aplikimit për pakon fiskale emergjente. (Kabineti i ministres Bajrami, ora 11:00)

- Kryetari i Sindikatës së Pavarur të Sektorit Privat të Kosovës, Jusuf Azemi pas takimit me Ministren e financave, znj. Hikmete Bajrami do të mbaj konferencë për shtyp, ku do të ju njoftojë lidhur me këtë takim. (Zyret e Sindikatës në objektin e ish Gërmisë, ora 11:45)

- Lëvizja Vetëvendosje! mban konferencë për media në të cilën flet nënkryetari Besnik Bislimi. (Zyret e LV-së në Arbëri, ora 12:00)

- Ministri i Drejtësisë, Selim Selimi, do të  mbajë konferencë për media për Kodin Civil. (Holli i Ministrisë së Drejtësisë, ora 14:00)

- Organizatat e dala nga Lufta e UÇK-së dhe Shoqata e ish të Burgosurve Politik, që janë Këshill Organizues i Protestave mbajnë sot konferencë për medie. (Selia qendrore e Organizatës së Veteranëve të Luftës së UÇK-së në Prishtinë, ora 14:00)

- Me hapjen e ekspozitës multimediale në hapësirat e SENSE Qendrës në Pulë, Qendra për Drejtësi Tranzicionale në bashkëpunim me Fondin për të Drejtën Humanitare Kosovë nisin kampanjën me titull: Srebrenica 25: Së bashku kundër virusit të mohimit në ditën kur në vitin 1995 ka rënë Srebrenica. (Transmetim direkt livestream http://srebrenica.sensecentar.org, ora 17:00)

- Komuna e Rahovecit mban dëgjim publik me banorët të fshatrave Malësi e Vogël dhe Gexhë. (Objekti i Shkollës Fillore të Mesme të Ulët “Skender Kastrati” në fshatin Malësi e Vogël, ora 19:00)

- Komuna e Rahovecit mban dëgjim publik me banorët të fshatrave Ratkoc, Dejnë, Vrajak dhe Bratotin. (Objekti i Shkollës  Fillore të Mesme të Ulët “4 Dëshmorët” në fshatin Ratkoc, ora 20:00)