19 Nëntor 2018

Palestra Sportive në Samadrexhë do të përfundoj brenda këtij viti

Vushtrri, 4 korrik - Ministri i Kulturës, Rinisë dhe Sportit, Kujtim Gashi, ka vizituar sot vendpunishten e Palestrës Sportive në fshatin Samadrexhë të Vushtrrisë. Gjatë kësaj vizite, ministri Gashi u takua me kryetarin e Komunës së Vushtrrisë, Xhafer Tahiri.

Pas inspektimit të punimeve, ministri Gashi në një prononcim për media u zotua për sigurimin e fondeve për finalizimin e projektit brenda këtij viti.

“Ka qenë një projekt i paraparë në faza për tri vite por jemi të përkushtuar që ta përmbyllim brenda këtij viti si dhe do të zotohemi që t’i sigurojmë buxhetin  e nevojshëm për finalizimin e këtij projekt."

"Sipas projektit dhe sipas organit mbikëqyrës janë edhe rreth gjysmë milionë euro që do t’i sigurojmë për ta përfunduar këtë projekt. Ne një pjesë të mjeteve e kemi të siguruar por sigurisht që edhe me rishikim të buxhetit por edhe alternativa të tjera jemi zotuar që këtë punë ta përfundojmë këtë vit dhe fondin do ta sigurojmë deri në tetor dhe nëntor ta kemi të gatshëm për finalizimin e projektit”, u shpreh ministri Gashi.

Ai po ashtu nga organet mbikëqyrëse kërkoi që t’i intensifikojnë punimet: “ Ne kemi kërkuar sot nga organet mbikëqyrëse që t’ intensifikojnë punimet dhe unë i inkurajoj kryetarin e Komunës edhe drejtoreshën që të jenë çdo ditë në vizitë te ky objekt në mënyrë që të informojnë për dinamikën e punimeve”.

Ndërkaq kryetari i Komunës së Vushtrisë, Xhafer Tahiri, tha se “ky është një projekt kapital sportiv për qytetin e Vushtrrisë i cili është i domosdoshëm për të rinjtë, për sportistët e komunës sonë që do të jetë në funksion të zhvillimit të sportit. Fshati Samadrexhë është i njohur për sportin, për hendbollin në veçanti. Besoj që shumë shpejt do të kompletohet e që Ministria të përgjigjet shumë shpejt me fonde që të përfundohet dhe kompletohet objekti”. 

Kalendari

Ngjarjet e datës 19 nëntor 2018 - Kuvendi i Republikës së Kosovës shënon Diten e Konventës Ndërkombëtare për të Drejtat e Fëmijëve.(Ndërtesa e Kuvendit, salla C 405, ora 10:00) 

- Kryeparlamentari Kadri Veseli merr pjesë në Ditën e Konventës Ndërkombëtare për të Drejtat e Fëmijëve. (Ndërtesa e Kuvendit, salla C 405, ora 10:00)

- Mbledhja e Kryesisë së Kuvendit me kryetarët e grupeve parlamentare. (Ndërtesa e Kuvendit, salla  C-301, ora 11:00)

- Programi i Kombeve të Bashkuara për Zhvillim do të përurojë impiantin i për trajtimin e ujërave të zeza në vise rurale në fshatin Kramovik, Komuna e Rahovecit. (Fshati Kramovik, ora 11:00)

- Ministri i Mjedisit dhe Planifikimit Hapësinor, Fatmir Matoshi, do të marrë pjesë në ceremoninë e inaugurimit të Impiantit për Trajtimin e Ujërave të Zeza - moçalishtë e ndërtuar në Kramovik të komunës së Rahovecit. (Fshati Kramovik, ora 11:00)

- Koordinatori Nacional për Kulturë, Rini dhe Sport në Qeverinë e Kosovës, Rexhep Hoti, do të nënshkruajë marrëveshje bashkëpunimi me Kryetarin e Komunës së Ferizajt, Agim Aliu për avansimin e pozitës së të rinjve në sport, kreativitet kulturor dhe mendim kritik dhe në dituri. (Objekti i Komunës së Ferizajt, ora 11:00)

- Kryeparlamentari Kadri Veseli merr pjesë në mbledhjen e Kryesisë së Kuvendit. (Ndërtesa e Kuvendit, salla C 301, ora 11:00)

-  Mbahet ceremonia e nënshkrimit të marrëveshjes së bashkëpunimit ndërmjet Ministrisë së Integrimit Evropian dhe Norvegjisë, me ç’rast nënshkruhet projekti përkrahës i Norvegjisë për ngritjen e kapaciteteve të shërbyesve civilë për zbatimin e MSA-së. (Ndërtesa e Qeverisë, salla e Konferencave P-32, ora 11:00)

- Kryeparlamentari Kadri Veseli pret në takim të përbashkët ministrin e Financave, ministrin e Drejtësisë dhe kryeshefin e Agjencisë Kundër Korrupsionit në Kosovë. (Kabineti i Kryeparlamentarit, ora 13:00)

- Kryetari i Nismës Socialdemokrate, Fatmir Limaj, mban takim me të rinjtë e Nismës në Shtime. (Shtëpia e Kulturës në Shtime, ora 16:00)
 
- Kryetari i Nismës Socialdemokrate, Fatmir Limaj, mban takim me të rinjtë e Nismës në Lipjan. (Golden Day në Lipjan, ora 18:00) 

- Galeria Kombëtare e Kosovës organizon hapjen e ekspozitës “Muzeu i tri pikave” të artistit Lulzim Zeqiri. (Galeria Kombëtare e Kosovës, ora 20:00)