29 Shkurt 2020

“Vrojtuesit e lagjeve” - një përvojë e re për rritjen e sigurisë publike

Gjilan, 14 shkurt - Gjilani është njëra nga komunat e Kosovës, ku të premten ka filluar realizimi i programit “Vrojtuesit e lagjes”, si mbështetje për Strategjinë dhe planin e veprimit të policisë në bashkësi, përmes vendosjes së shenjave identifikuese në lagje, të cilat, siç ka thënë Shqipe Kastrati, koordinatore e Ekipeve Vepruese për Siguri në Bashkësi (EVSB), do të jenë ndihmesë për qytetarët që problemet t`i raportojnë në institucionet kompetente.

Lutfi Haziri, kryetar i Komunës, ka thënë se të gjithë ne jemi jashtëzakonisht të interesuar për t`i ndarë përvojat e mira që vijnë në veçanti përmes programit të ICITAP-it, në rolin dhe përgjegjësinë që mund ta kemi brenda komunitetit tonë, brenda lagjes, apo edhe në institucione.

“Vrojtuesit e lagjes”, është praktikë që ne ndoshta më pak e njohim, por përvoja e sotme ka me tregua që në të ardhmen, përveç këshillave lokalë, mund të aplikojmë edhe forma tjera të ndryshme, që e rrisin sigurinë publike, interesin publik, pjesëmarrjen publike e sidomos preventivën në rastet e veçanta, ka thënë kryetari Haziri.

Haziri falënderoi komandantin e stacionit policor në Gjilan, majorin Alban Ramushi, i cili merr pjesë në çdo mekanizëm të sigurisë, policinë në komunitet, këshillat lokalë dhe policinë në përgjithësi, e cila përkundër kapaciteteve të reduktuara që ka, në çdo rast ajo është e para që iu përgjigjet problemeve. 

Për më tepër, Haziri ka thënë se Gjilani e ka një përvojë në vrojtim që nga periudha e viteve të `90-ta, kur komuniteti ishte vetorganizuar për të përcjellë lëvizjet e forcave serbe.     

Alban Ramushi, komandat i Stacionit Policor në Gjilan, tha se shpreson që ky program, përmes vendosjes së tabelave “Vrojtuesit e lagjes” do ta ndihmojë shumë policinë që të pajiset me informata nga terreni, sepse është e pamundur që policia të jetë në çdo cep, në çdo lagje, në çdo fshat.

Përndryshe, Eldin Buzgoviq nga ICITAP-i e ka zbërthyer më hollësisht programin, duke thënë se qëllimi i “Vrojtuesit e lagjes” është ngritja e sigurisë në bashkësi, përmes bashkëpunimit me qytetarët në raportin e rasteve.

Me diskutime e komente, kanë kontribuar edhe Muhamet Hyseni (Mekanizmi Referues), Fiton Kastrati (FSK), Halit Rexhepi (KKSB) dhe të tjerë.               


 

Kalendari

Ngjarjet e datës 29 shkurt 2020 - Drejtoria e Shëndetësisë së bashku me Qendrën Kryesore të Mjekësisë Familjare, do të ofrojnë kontrolle të përgjithshme mjekësore pa pagesë për sëmundje të traktit urinar ku me pas do të ketë prononcim për media nga drejtori i Drejtorisë së Shëndetësisë, Visar Shehu. (Qendra Kryesore e Mjekësisë Familjare, ora 10:00)

- Federata e pingpongut të Kosovës do të organizojë Kampionatin Individual të Kosovës për Seniorë “Adem Jashari”. (Shkolla fillore Tefik Çanga në Ferizaj, ora 10:00)

- Mbahet Kuvendi i Punës i Federatës i Basketbollit i Kosovës (FBK). (Hotel International Prishtina & SPA, ora 10:00)

- Qendra e Levizjes në Prishtinë mban konferencë për media. (Zyret qendrore të Lëvizjes në Arbëri, ora 11:00)

Anibar International Animation Festival organizon bashkëlexim dhe diskutim në Klubin e Kinemasë “Jusuf Gërvalla” në Pejë. (Kinema “Jusuf Gërvalla”, në Pejë ora 12:00)

- Mbahet ceremonia përmbyllëse për Garën Kombëtare për Kitarë, ku do të shpallen rezultatet dhe fituesit që do ta përfaqësojnë Kosovën në Garën Ndërkombëtare që do të mbahet në Qershor 2020, në Monheim në Gjermani. (Amfiteatri i Pallatit të Rinisë, ora 18:00)