23 Tetor 2018

Thaçi: Bahri Fazliu dhe Agron Rrahmani, figura të ndritura të lëvizjes kombëtare

Prishtinë, 14 maj - Presidenti i Republikës së Kosovës, Hashim Thaçi, ka marrë pjesë në Akademinë Përkujtimore për 20 vjetorin e rënies së heronjve Bahri Fazliu dhe Agron Rrahmani.

Presidenti Thaçi ka thënë se Bahri Fazliun e ka njohur qysh në fund të vitit 89, vetëm pak ditë pas rënies heroike të vëllait të tij Fahriut.

“Atë kohë Lëvizja Popullore për Republikën e Kosovës ishte organizimi i vetëm politik kundër Serbisë i shqiptarëve në ish-Jugosllavi. Ishte nder jetësor i imi që pata fatin të njoh dhe të bashkëveprojë me Bahri Fazliun dhe Afrim Zhitinë. Ata i njoha përmes Kadri Veselit, në njërën nga bazat ilegale në Prishtinë, në fillim të vjeshtës 89. Bahriu ishte i ri, energjik, inteligjent dhe shumë i lidhur me Lëvizjen Popullore. Ishte shume i lidhur me librin dhe teoritë e luftës çlirimtare”, u shpreh presidenti Thaçi.

Ai, po ashtu, ka thënë se edhe me Agron Rrahmanin janë njohur si studentë.

“Agroni ishte fjalë pak, i edukuar, por shumë trim. Në fillim të viteve 90-ta, organizimi ilegal u dobësua. Në shtëpinë e Bahriut mbanim takime. Bisedonim për nevojën e riorganizimit të lëvizjes klandestine në luftë kundër Serbisë. Me kalimin e kohës i takonim organizimeve të veçanta, por kishim një qëllim, organizimin e luftës çlirimtare. Në verë të vitin 1993 u detyruam të kalojmë në ilegalitet, edhe Bahriu, edhe Agroni, por edhe unë e shumë veprimtarë të tjerë”, ka thënë presidenti Thaçi.

Kreu i shtetit ka thënë se Bahriu me shokët e tij të idealit kishte filluar edhe përgatitjen dhe botimin e gazetës “Çlirimi”,  ndërkohë që kishin filluar aksionet çlirimtare në Drenicë kundër policisë dhe ushtrisë serbe.

 “Bahriu aq sa vepronte në Prishtinë, shihej në Tiranë, por edhe koordinonte diasporën në Perëndim. Agroni vazhdonte të ishte çdoherë pranë tij kudo. Me fillimin e pranverës 1998, u bashkuan gjitha forcat rreth Ushtrisë Çlirimtare të Kosovës. Ky ishte qëllimi dhe ideali i Bahriut e Agronit, si dhe i të gjithëve, bashkimi i të gjitha forcave kundër Serbisë”, u shpreh ai.

Presidenti Thaçi theksoi se Bahriu dhe Agroni janë ndër figurat më të ndritura të lëvizjes kombëtare.
 

Kalendari

Ngjarjet e datës 23 tetor 2018  - Presidenti i Republikës së Kosovës, Hashim Thaçi, pret në takim deputetin e Parlamentit të Gjermanisë, Peter Beyer. (Kabineti i Presidentit, ora 9:00 - vetëm pamje)

- Ministri i Mbrojtjes të Malit të Zi, Predrag Boshkoviç viziton Ministrinë për Forcën e Sigurisë të Kosovës. (Ministria për Forcën e Sigurisë të Kosovës në Prishtinë, ora 9:25)

- Misioni i OSBE-së organizon punëtori për gazetarët me titull mediat në gjykatore në Gjykatat Themelore. (Gjykata Themelore në Prizren, ora 9:30)

- Mbahet mbledhja e Komisionit për Punë të Brendshme, Siguri dhe Mbikëqyrjen e Forcës së Sigurisë së Kosovës në të cilën do të behët formimi i grupeve punuese për Projektligjin për Ministrinë e Mbrojtjes, Projektligjin për Forcën e Sigurisë së Kosovës dhe Projektligjin për Shërbimin në Forcën e Sigurisë së Kosovës. (Ndërtesa e Kuvendit, salla N204, ora 10:00)

- Presidenti i Republikës së Kosovës, Hashim Thaçi pret në takim zëvendës-ndihmës sekretarin e shtetit amerikan, Matthew Palmer.  (Kabineti i Presidentit, ora 10:00 - vetëm pamje)

- Me rastin e vizitës së zotit Peter Beyer, deputet në Bundestag, në Kosovë, Ambasada Gjermane organizon një takim me gazetarë. (Ambasada Gjermane, ora 10:00)

- Policia e Kosovës organizon hapjen e  fushatës së titulluar “Dhuna nuk arsyetohet”.  (Sheshi ”Zahir Pajaziti”, ora 10:00)

 - Mbahet mbledhja e Komisionit për Mbikëqyrjen e Agjencisë së Kosovës për Inteligjencë në të cilën do të behët shqyrtimi i propozimit për mbështetjen e punës së AKI-së. (Ndërtesa e Kuvendit, salla N 10, ora 10:00)

- Grupi për Studime Juridike dhe Politike organizon panelin e diskutimit me temë “Performanca e sistemit gjyqësor dhe prokurorial sipas këndvështrimit dhe vlerësimit të qytetarëve". (Hotel Swiss Diamond, ora 10:30)

- Kryeministri i Republikës së Kosovës pret në takim zëvendës ndihmës Sekretarin e Shtetit Amerikan, Matthew Palmer. (Ndërtesa e Qeverisë, ora 10:45)

- Ministri për Forcën e Sigurisë të Kosovës, Rrustem Berisha dhe Ministri i Mbrojtjes të Malit të Zi, Predrag Boshkoviç mbajnë konferencë për media. (Ndërtesa e Ministrisë se FSK-së, ora 10:50)

- Mbahet mbledhja e Komisionit për Zhvillim Ekonomik, Infrastrukturë, Tregti, Industri dhe Zhvillim Rajonal në të cilën do të behët shqyrtimi i Propozim - vendimit të Qeverisë për kandidatet për kryesues të Bordit të ZRRE-së. (Ndërtesa e Kuvendit, salla N 303, ora 11:00)

- Instituti Demokratik i Kosovës mban konferencën për media në të cilën do të paraqiten rekomandimet e KDI-së, lidhur me të drejtat e punëtorëve në sektorin privat dhe rreziqet me të cilat përballen në vendin e punës. (Zyrat e KDI-së, ora 11:00)

- Presidenti i Republikës së Kosovës, Hashim Thaçi, pret në takim Ministrin e Mbrojtjes të Malit të Zi,  Predrag Bošković. (Kabineti i Presidentit, ora 11:20 - vetëm pamje) 

- Qendra për Paqe dhe Tolerancë në përkrahje nga OSBE dhe në bashkëpunim me Komunën e Vitisë dhe me shkollat e mesme në këtë komunë organizon aktivitetin e pastrimit të Parkut të Qytetit në Viti. (Parku i Qytetit në Viti, ora 13:00)

 - Mbahet mbledhja e Komisionit për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit në të cilën do të behët shqyrtimi i kërkesave të Këshillit Gjyqësor të Kosovës dhe Këshillit Prokurorial të Kosovës lidhur me Projektligjin për Pagat dhe Zyrtarët Publik. (Ndërtesa e Kuvendit, salla N204, ora 13:00)

- Lëvizja Vetëvendosje mban konferencë për media. (Zyrët qendrore të Vetëvendosjes, ora 14:00)

- Kryeministri Ramush Haradinaj merr pjesë në mbledhjen e Qeverisë së Republikës së Kosovës. (Ndërtesa e Qeverisë, ora 14:00)

- Mbahet ceremonia e diplomimit të gjeneratës së parë të Shkollës së Lartë Profesionale - Cacttus Education. (Hotel Sirius, ora 15:00)