20 Shtator 2018

Ndërrohet komanda në Komandën e Doktrinës dhe Stërvitjes të FSK-së

Prishtinë, 13 mars - Në kazermën 'Skënderbeu' të FSK-së në Ferizaj, u zhvillua sot ceremonia e ndërrimit të komandës së Komandës së Doktrinës dhe Stërvitjes (KDS).

Komandanti i deritanishëm, gjeneral brigade Enver Cikaqi ia dorëzoi detyrën komandantit të sapoemëruar gjeneral brigade Irfete Spahiu.

Gjeneral brigade Irfete Spahiu është oficerja e parë grua, e graduar në këtë rang, nga radhët e Forcës së Sigurisë së Kosovës, si dhe oficerja e parë në detyrën e Komandantit të Brigadës.​

Në ceremoninë solemne ishin të pranishëm ministri i MFSK-së, Rrustem Berisha, zv. ministri Agim Çeku, komandanti i FSK-së, gjenerallejtënant Rrahman Rama, drejtori i NLAT-it, gjenerali Hofmann, ambasadorja e Turqisë, zonja Kiliq,  komandanti i Kampit Bonstell, gjeneralët e FSK-së, përfaqësues të institucioneve qendrore dhe lokale, përfaqësues të korit diplomatik të akredituar në Kosovë, përfaqësues të KFOR-it, NALT-it, përfaqësues të shoqatave të dala nga lufta dhe oficerë dhe nënoficerë të FSK-së. 

Ceremonia filloi me intonimin  e himnit shtetëror. Më pas u lexua dekret-ligji i presidentit të Republikës së Kosovës, Hashim Thaçi, për gradimet dhe emërimin e gjeneral brigade Enver Cikaqi komandant i Komandës së Forcave Tokësore dhe gjeneral brigade Irfete Spahiu komandant i  KDS-së.

Me këtë rast, ministri i FSK-së, Rrustem Berisha, pasi përshëndeti dhe përgëzoi FSK-në, për gradimet dhe të arriturat e përgjithshme të saj tha: “Jam shumë i nderuar që në dorëzim-pranimin e detyrave pas dekretimit të presidentit të Republikës së Kosovës, z. Hashim Thaçi, e fillojmë pikërisht me Komandën e Doktrinës dhe Stërvitjes."

"Jo rastësisht është marrë vendimi që ndërrimi të bëhet nga KDS-ja, për vetë faktin se është një rast i veçantë për të gjithë ne, sepse me dekretin e presidentit është dekretuar dhe është graduar një gjeneral femër e cila do të emërohet në detyrën e komandantit të Komandës së Doktrinës dhe Stërvitjes, prandaj është rast i veçantë, është rast historik për FSK-në, për gradimin e gjeneral Irfete Spahiut."

"Arsye e dytë pse kemi filluar këtu është vetë misioni i KDS-së, sepse kjo është gur themel i suksesit jo vetëm i kësaj njësie, por edhe i të gjitha njësive të FSK-së dhe Ministrisë së FSK-së. Ministri Berisha përgëzoi gjeneral Cikaqin për të gjitha të arriturat në krye të këtij institucioni, duke shtuar se “këto sukses na kanë bërë që të ndihemi krenarë dhe të mburremi me të arriturat e KDS-së”.

Në fund, ministri Berisha duke përgëzuar dhe uruar gjeneral brigade Irfete Spahiun, tha: ”Para nesh kemi shumë detyra dhe obligime.  Do të ketë edhe zhvillime të reja, që krahas misionit aktual që ka KDS-ja, duhet të përgatitet edhe për detyrat dhe përgjegjësit shtesë, që do t’i marrim pas vendimit politik për transformimin e FSK-së në Forca të Armatosura të Kosovës”.

Ndërsa, komandanti i FSK-së, gjenerallejtënant Rrahman Rama, para të pranishmëve tha: “ Kjo ceremoni për ndërrimin e komandës së KDS-së  është një ditë e veçantë për mua si komandant i FSK-së. Gjeneral Cikaqi gjatë shërbimit në FSK ka treguar një performancë të jashtëzakonshme si në aspektin profesional edhe në gatishmërinë e tij për ngritjen e kësaj njësie që nga themelimi i FSK-së."

"Si rezultat  i kësaj njësie dhe punës tuaj me trajnime të shumta  bazike apo specialistike, jemi sot këtu. Prioritet imi është qëndrueshmëria e institucionit dhe zhvillimi i mëtejmë i tij, duke bashkëpunuar ngushtë me partnerët ndërkombëtarë, në mënyrë që trajnimet tona të jenë profesionale dhe të bazuara në standardet e NATO-s, sepse ky është qëllimi dhe synimi ynë, që ne të jemi pjesë në të ardhmen e strukturave Veri- Atlantike dhe pjesë e NATO-s”.

Komandanti i FSK-së, gjeneral Rama, shtoi më tej se ” FSK-ja ofron mundësi të barabarta për të gjithë oficerët, pa dallim gjinie, race dhe përkatësie etnike”. Duke iu drejtuar gjeneral Spahiut, ai tha:  shpresoj dhe besoj se gjeneral Spahiu, do ta avancojë edhe më tutje këtë njësi për një zhvillim profesional për të gjithë pjesëtarët e FSK-së, duke marrë për bazë edhe sfidat dhe obligimet e reja shtesë”.

Pas dorëzimit të detyrës tek gjeneral brigade Irfete Spahiu, komandanti i deritashëm i KDS-së, gjeneral brigade Enver Cikaqi, falënderoi të gjithë ushtarët, oficerët dhe stafin e lartë dhe atë ndërkombëtar për përkrahjen e vazhdueshme në realizimin e detyrave të deritashme në Komandën e Doktrinës dhe Stërvitjes të FSK-së.

Gjeneral Cikaqi, me këtë rast tha: “ FSK-ja në shtatë vitet e fundit është dëshmuar si institucioni më i besueshëm. Jam shumë i sigurt se ky vlerësim nuk do të vinte pa një nivel të lartë të edukimit dhe përgatitjes profesionale të stafit të saj”. Duke iu drejtuar stafit ushtarak ai tha se ,,për të gjitha këto të arritura jeni të gjithë ju meritorë, unë jam njëri prej jush andaj ndihem krenarë”. Në fund, gjeneral Cikaqi, duke iu drejtuar gjeneral Spahiut, tha: “Unë do të jem avokat i mirë i KDS-së, sepse e di se sa punë të mira bëhen këtu dhe sa të mira i sjellë FSK-së puna e juaj. Urime gjeneral Spahiu në detyrën e re”.

Me medaljen për “Shërbim Vetëmohues” nga komandanti i FSK-së, gjenerallejtënant Rrahman Rama u nderua gjeneral Enver Cikaqi.

Në fund, gjenerallejtënant Rrahman Rama, gjeneral brigade Enver Cikaqi dhe gjeneral brigade Irfete Spahiu bënë dorëzim-pranimin e Komandës.

Kalendari

Ngajrjet e datës 20 shtator 2018

 - Këshilli i Investitorëve Evropianë në bashkëpunim me Zyren e Bashkimit Evropian në Kosovë dhe Bankën Evropiane për Rindertim dhe Zhvillim organizojn konferencën e nivelit të lartë 'Drejt një klime miqësore të biznesit dhe investimeve në Kosovë, “White Book 2018”. (Hotel Emerald, ora 8:30)

- Komuna e Gjilanit organizon aktivitetin "Dita pa Makina", që shënohet në kuadër të aksionit "Ta pastrojmë Kosovës". (Para shtatores se Rexhep Males e Nuhi Berishes, ora 10:00)

- Ministria e Kulturës, Rinisë dhe Sportit organizon konferencën “Siguria Njerëzore, Problemi dhe Reagimi Institucional”. (Salla e konferencave Orion, përballë KINO ABC, ora 10:00)

- Nën patronatin e Presidentit të Republikës së Kosovës bëhet përurimi i shtatoreve të heroit Fehmi Lladrovci dhe heroinës Xhevë Krasniqi-Lladrovci. (Sheshi “Fehmi Lladrovci” në Drenas, ora 12:00)

- Kryeparlamentari Kadri Veseli dhe Kryeministri Ramush Haradinaj merr pjesë në zbulimin e shtatoreve të Heroit Fehmi Lladrovci dhe Heroinës Xhevë Krasniqi - Lladrovci. (Sheshi “Fehmi Lladrovci”, Drenas, ora 12:00)

- Ushtruesi i Detyrës së Ministrit te Mjedisit dhe Planifikimit Hapësinor, Fatmir Matoshi do të vizitojë Komunën e Pejës dhe Kompaninë Rajonale të Ujësjellësit “Hidrodini” në Pejë. (Komuna e Pejës, ora 13:00)

- Mbahet mbledhja e Komisionit për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi në të cilën do të mbahet shqyrtimi i Projektligjit pÑ‘r Ratifikimin e Marrëveshjes për Pjesëmarrjen e Kosovës në programin Evropa Kreative për Mbështetjen e Sektorëve Kulturorë dhe Kreativë. (Ndërtesa e Kuvendit, salla N 302, ora 13:00)

- Mbahet seanca e jashtëzakonshme e Kuvendit të Republikës së Kosovës. (Kuvendi i Kosovës, ora 14:00)  

- Fillon asfaltimi i rrugëve në oborrin e Qendrës Klinike Universitare të Kosovës. (Oborri i QKUK-së, ora 15:00)

- Kryetari i Odës Ekonomike të Kosovës, Berat Rukiqi takohet me Kryetarin e Odës Ekonomike të Maqedonisë veri-perëndimore, Nebi Hoxha. (Objekti i Odës Ekonomike të Kosovës, ora 15:00)

- Fakulteti Filozofik i Universitetit të Prishtinës dhe forumZFD Programi në Kosovë organizojn konferencën tre ditore 'Rishikimi i ballafaqimit me të kaluarën dhe drejtësia tranzicionale në Ballkan' . (Fakulteti Filozofik, ora 15:30)

-  Kyetari i LDK-së Isa Mustafa mban mbledhje me kryetarë të degëve të LDK-së. (Hotel Sirius, ora 17:00)