24 Shtator 2018

Kosova ishte shembulli më i mirë i reagimit të NATO-s

Prishtinë, 13 nëntor - Presidenti i Republikës së Kosovës, Hashim Thaçi ka marrë sot pjesë në hapjen e Konferencës: ‘NATO dhe Ballkani Perëndimor: Dinamikat rajonale në erën e sfidave globale të sigurisë’.

Me këtë rast, Presidenti ka theksuar se Kosova ishte shembulli më i mirë i reagimit të NATO-s ndaj sfidës më të madhe të sigurisë në atë kohë në Evropë.

Sipas tij, liria e Kosovës ishte vlerë që na bashkoi neve, si politikanë dhe qytetarë të Kosovës, me vlerën supreme të sigurisë ndërkombëtare, atë të paktit NATO, pikërisht në ditëlindjen e pesëdhjetë të saj.

“KFOR-i, i cili është garant i stabilitetit në Kosovë, është misioni më i suksesshëm i paqës në botë për dekada me radhë. Kosova sot është një shtet stabil, i qëndrueshëm dhe me synime të qarta”, ka theksuar ai.

Megjithëkëtë, Presidenti vuri në dukje se Kosova edhe më tutje po përballet me paradokse të llojit të veçantë.

Sipas tij, Kosova është pa kurrfarë dyshimi shteti më proevropian, më pro NATO dhe më pro amerikan në botë, ndërsa është njëkohësisht shteti më i izoluar.

Ai ka thënë se Kosova është kampion në rajon në luftimin e ekstremizmit të dhunshëm dhe terrorizmit përkundër faktit se jemi të anashkaluar dhe ende nuk jemi bërë anëtar të Interpolit.

“Kosova është shembull jo vetëm në këtë anë të Evropës, për tolerancë ndër fetare dhe ndër etnike, mirëpo fatkeqësisht ne nuk ende nuk jemi të anëtarësuar në UNESCO, për shkak të pengesave politike të Serbisë dhe shteteve tjera që e keqpërdorin UNESCO-n për qëllime politike”, ka shtuar ai.

Presidenti më tej ka thënë se Kosova është vendi i vetëm në Ballkanin Perëndimor që kohë më parë, lansoi dialogun për pajtimin historik midis shqiptarëve dhe serbëve, përmes krijimin të Komisionit për paqen dhe të vërtetën.

“Përkundër tragjedisë së madhe që na është shkaktuar në vitet e luftës, unë si President i Kosovës, por edhe politikanë të tjerë të këtij vendi, duam ta mbyllim kapitullin e armiqësive me Serbinë, duke normalizuar, përmes dialogut të Brukselit, marrëdhëniet me këtë shtet fqinj”, ka thënë ai.

Duke folur për procesin e transformimit të FSK-së, Presidenti ka paralajmëruar se, duke siguruar mbështetjen për ndryshimet e Kushtetutës për transformimin e Forcave të Sigurisë së Kosovës, Kosova në partneritet të plotë me SHBA-në dhe NATO-n, do t’i krijojë Forcat e Armatosura të Kosovës.

“Natyrisht, Kosova mbetet e gatshme për të dhënë kontributin e vet modest kudo në botë, duke marrë pjesë në misionet paqeruajtëse, sepse qëllimi ynë është që të bëhemi pjesë përbërëse e Partneritetit Për Paqe (PFP), dhe të anëtarësohemi në NATO”, ka thënë ai.

Viti i ardhshëm sipas tij, mund të jetë determinues për perspektivën euroatlantike të shteteve të Ballkanit Perëndimor.

Ai ka shtuar se mundësi e tillë, në masë të madhe do të varet nga aftësia, guximi dhe gatishmëria e vet shteteve tona respektive, për të tejkaluar problemet ende të hapura ndërmjet nesh.

“Unë jam duke punuar shumë në këtë aspekt, sepse nuk mendoj se ka asgjë më të rëndësishme se sa paqja, pajtimi dhe marrëdhëniet e mira fqinjësore. Prandaj, besoj se gjatë vitit të ardhshëm, ne duhet të arrijmë të nënshkruajmë marrëveshjen historike me Serbinë për normalizim dhe pajtim”, ka thënë ai.

Në fund, presidenti Thaçi ka theksuar se Kosova ka qenë, është dhe do të mbetet rrëfimi më i mirë i mundshëm i partneritetit midis një populli të një vendi të vogël, pra Kosovës, me NATO-n, BE-në dhe Perëndimin në përgjithësi.

Kalendari

Ngajrjet e datës 24 shtator 2018

- Mbahet mbledhja e Komisionit për Administratë Publike, Qeverisje Lokale dhe Media në të cilën do të behët shqyrtimi i Projektligjit për Transmetuesin Publik të Kosovës, shqyrtimi i Projektligjit për Pagat në Sektorin Publik, etj. (Ndërtesa e Kuvendit, salla N204, ora 10:00)

- Misioni i OSBE-së do të publikojë dy raporte që kanë të bëjnë me legjislacionin dygjuhësh dhe respektimin e të drejtave gjuhësore në Policinë e Kosovës, në kuadër të aktiviteteve të shumta për shënimin e Ditës Evropiane të Gjuhëve. (Swiss Diamond Hotel, ora 10:30)

- Grupi për Studime Juridike dhe Politike organizon tryezën e Diskutimit me temë "Monitorimi i Planit Strategjik të KPK-së: Ku po qëndron sistemi prokurorial në luftën kundër korrupsionit dhe krimit ekonomik?". (Hotelin Swiss Diamond, ora 10:30)

- Ministria e Kulturës, Rinisë dhe Sportit mban ceremonin e ndarjes së certifikatave për të rinj për shkathtësitë e buta. (Salla e konferencave Orion, përballë Kino ABC, ora 10:30)

- Në kuadër të Javës së Sportit Evripian Federate e çiklizimit te Kosovës organizon garën e hapur çiklistike për të gjitha kategoritë dhe grupmoshat nga 20 deri 100 km. (Gjilan, ora 11:00)

- Ministri i Arsimit, Shkencës dhe Teknologjisë, Shyqiri Bytyqi do të shoqëroj Drejtoreshën e Korpusit të Paqës, Dr. Darlene Grant, gjatë vizitës ku ata do të përcjellin një Vullnetare të Korpusit të Paqës në punë në shkollën e saj në një fshat të Kosovës. (Shkolla fillore “Nëna Tereza”, fshati Vranidoll, ora 11:15)

- Organizata ETEA, në bashkëpunim me Komunën e Prishtinës, do ta organizojë “Ditën e Librit të Ndaluar” me temën “Librat digjen, (por) idetë jo”, si përgjigje ndaj cenzurës, me theks të veçantë te cenzurimi i librave. (Sheshi “Zahir Pajaziti”, ora 12:00)

- Kryetari i LDK-së, Isa Mustafa mban mbledhje me Grupin Parlamentar të LDK-së. (Hotel Sirius, ora 12:00)

- Mbahet mbledhja e Komisionit për Shëndetësi, Punë dhe Mirëqenie Sociale në të cilën do të behët shqyrtimi i Projektligjit për ratifikimin e Marrëveshjes për sigurime sociale ndërmjet Republikës së Kosovës dhe Konfederatës së Zvicrës, ndërmjet Republikës së Kosovës dhe Mbretërisë së Belgjikës. (Ndërtesa e Kuvendit, salla N 302, ora 13:00)

- Kryetari i LDK-së, Isa Mustafa mban mbledhje me kryesinë e LDK-së. (Hotel Sirius, ora 14:00)

- Ministri i Financave Bedri Hamza dhe drejtoresha për Eksport në UniCredit Bank Austria AG Sabina Eder do të nënshkruajnë marrëveshjen për kredi në vlerë prej 5.349 milionë euro për financimin e projektit të trajtimit të ujërave të zeza në Komunën e Podujevës. (Ndërtesa e  Qeverisë, kati 11, ora 15:00)

- Mbahet diskutim i hapur me shkrimtarin dhe publicistin Veton Surroi mbi temën “Librat digjen, (por) idetë jo” me moderim nga Liridona Sijarina. (Lapidariumi i Muzeut Kombëtar të Kosovës, ora 15:00)

- Anëtarët e Komisionit për të Drejtat e Njeriut, Barazi Gjinore, për Persona të Pagjetur dhe Peticione takohen me Robert Gajda, Komisioner për Mbrojtjen nga Diskriminimi në Republikën e Shqipërisë.  (Ndërtesa e Kuvendit, salla N 302, ora 15:00)

- Partia Socialdemokrate bën hapjen e zyrave në qytetin e Mitrovicës. (Zyrat gjenden në afërsi të Raiffeisen Bank dhe IPKO-s, ora 18:00)

- Organizohet shfaqja e filmit “Fahrenheit 451” në bashkëpunim me “Film n’park”. (Parku i Qytetit të Prishtinës, ora 19:00)