23 Tetor 2018

FSK përfundoi me sukses Ushtrimin fushor ndërkombëtarë 'Shqiponja 6'

Prishtinë, 11 maj - Udhëheqës shtetëror dhe ushtarak të Kosovës dhe shteteve partnere vizituan sot operacionet përfundimtare të Ushtrimit Fushor Ndërkombëtarë 'Shqiponja 6', në Kastriot, Batllavë dhe Koliq.

Fillimisht në takim e shkurtër në Ministri, komandanti i FSK-së, gjenerallejtënant Rrahman Rama mirëpriti gjeneralët dhe oficerët e shteteve partnere dhe drejtues të agjencioneve të Kosovës me ç’rast i falënderoi për bashkëpunimin, koordinimin dhe ndërveprueshmërinë gjatë planifikimit dhe ekzekutimit të ushtrimit fushor 'Shqiponja 6', ushtrim ky, i pari, si ushtrim ndërkombëtarë që është planifikuar dhe ekzekutuar nga FSK-ja së bashkë me agjencionet vendore dhe ushtritë partnere të shteteve të ndryshme.

Nga ana e tij, drejtori i ushtrimit fushor 'Shqiponja 6”, gjeneral brigade Naim Haziri, shpjegoi konceptin, objektivat dhe skenarin e ushtrimit më të madh vjetor të FSK-së.

Gjeneral Haziri, njoftoi për urdhrin operacional, javën akademike, mirëpritjen dhe atashimin në njësitë e FSK-së, të kontingjenteve nga shtetet mike, dislokimin e njësive, ngritjen e kampit, funksionalizimin e komandës së përparme, atë të planifikimit si dhe aktivitetet e ekzekutimit të ushtrimit ndërkombëtarë 'Shqiponja 6'.

Ministri i FSK-së, Rrustem Berisha, ambasadori i SHBA-ve, Greg Delawie, komandanti i FSK-së, gjenerallejtënant Rrahman Rama, komandanti i Gardës Kombëtare të Ajovës, gjeneral major Timothy Orr, zëvendësministri i Ministrisë së Mbrojtjes të Maqedonisë, Bekim Maksuti, zëvendësministri i FSK-së Agim Çeku, drejtori i Ekipit Këshillues dhe Ndërlidhës i NATO-s për MFSK/FSK(NALT), gjeneral brigade Ralf Hofman, atasheu amerikan në Kosovë,  kolonel Jeffry Fischer, gjeneralë të FSK-së, eprorë të lartë të Policisë së Kosovës, drejtues të Agjencive së Kosovës për Emergjenca, si dhe ushtarakë nga shtetet mike pjesëmarrëse në Ushtrim fushor, fillimisht vizituan vend incidentin e parë në Korporatën Energjetike të Kosovës në 'Kosova A', ku ishin simuluar skenarë të reagimit emergjent, pastaj vizituan lokacionin në Batllavë, tek penda ku dyshohej, sipas skenarit, për mjete eksplozive si dhe materie të rrezikshme të vendosura nga grupe kriminale.

Te Penda e Batllaves, aty ku u demonstruan operacionet përfundimtare, ministri i Forcës së Sigurisë së Kosovës, zoti Berisha tha; se me këtë ushtrim-FSK-ja po dëshmon se ka avancuar me sukses si dhe ka dëshmuar fuqishëm se është Forcë e nderveprueshme me ushtritë e vendeve partnere dhe se është e gatshme që të kontribuojë në garantimin e një ambienti të sigurisë si në vend ashtu edhe në rajon e më gjerë.

Gjithashtu edhe komandanti i FSK-së, gjenerallejtënant Rrahman Rama e vlerësoi lartë zhvillimin e të gjitha aktiviteteve të ushtrimit, duke shprehur admirimin për një bashkëpunim dhe koordinim të të gjithë akterëve në ushtrim, e sidomos ndërveprueshmërinë gjatë realizimit dhe ekzekutimit të skenarëve të ushtrimit. Në fund, komandanti i FSK-së, gjenerali Rrahman Rama, tha se suksesi i ushtrimit është edhe një dëshmi se FSK-ja është e  gatshme të marr detyra të reja.

Nga ana e tij, ambasadori i SHBA-ve, Greg Delawie deklaroi se: 'Shtetet e Bashkuara të Amerikës janë krenare që kanë punuar përkrah Forcës së Sigurisë së Kosovës, dhe së bashku edhe me gjashtë shtete tjera, për të organizuar këtë ushtrim'.

Më tej, ambasadori Delawie tha: 'Gjithsej 88 ushtarakë amerikan janë të përfshirë në ekzekutimin e ushtrimit 'Shqiponja 6' gjatë dy javëve të shkuara. Jam tepër krenar për punën e përmbushur nga ushtarakët tanë bashkë me partnerët tanë ndërkombëtarë'.

Gjatë vizitës së aktiviteteve të ushtrimit, udhëheqësit ushtarak vizituan edhe Komandën e përparme të Ushtrimit në Koliq, ku u priten nga komandanti i Brigadës për Reagim të Shpejtë, gjeneral brigade Fadil Hadergjonaj, ndërsa shkurtazi për tërë ecurinë e Ushtrimit Fushor Ndërkombëtarë 'Shqiponja 6' njoftoi komandanti i forcës për detyrën, nënkolonel Sylejman Cakaj, njëherësh edhe komandant i Batalionit të Tretë të Reagimit të Shpejtë.

Në fund të Ditë së vizitorëve, pjesëmarrësit e rreshtuar në Ushtrim i falënderuan Komandanti i FSK-së, gjenerallejtënant Rrahman Rama dhe Komandanti i Gardës Kombëtare të Ajovës, gjeneral major Timothy Orr.

Në Ushtrimin Fushor Ndërkombëtarë 'Shqiponja 6' morën pjesë me njësi ushtarake; Garda Kombëtare e Ajovës nga Shtetet e Bashkuara të Amerikës, Kroacia, Mbretëria e Bashkuar, Turqia, Maqedonia dhe Republika e Shqipërisë, kontingjentet e të cilave u atashuan në njësitë e FSK-së. Pastaj Policia e Kosovës, Agjencia për Menaxhimin e Emergjencave dhe Kryqi i Kuq i Kosovës.

Në ushtrimin fushor ndërkombëtarë 'Shqiponja 6’’ gjatë dy javëve sa zgjati ushtrimi  morën pjesë; gjithsej 1167 ushtarak me mbi 147 automjete.
 

Kalendari

Ngjarjet e datës 23 tetor 2018  - Presidenti i Republikës së Kosovës, Hashim Thaçi, pret në takim deputetin e Parlamentit të Gjermanisë, Peter Beyer. (Kabineti i Presidentit, ora 9:00 - vetëm pamje)

- Ministri i Mbrojtjes të Malit të Zi, Predrag Boshkoviç viziton Ministrinë për Forcën e Sigurisë të Kosovës. (Ministria për Forcën e Sigurisë të Kosovës në Prishtinë, ora 9:25)

- Misioni i OSBE-së organizon punëtori për gazetarët me titull mediat në gjykatore në Gjykatat Themelore. (Gjykata Themelore në Prizren, ora 9:30)

- Mbahet mbledhja e Komisionit për Punë të Brendshme, Siguri dhe Mbikëqyrjen e Forcës së Sigurisë së Kosovës në të cilën do të behët formimi i grupeve punuese për Projektligjin për Ministrinë e Mbrojtjes, Projektligjin për Forcën e Sigurisë së Kosovës dhe Projektligjin për Shërbimin në Forcën e Sigurisë së Kosovës. (Ndërtesa e Kuvendit, salla N204, ora 10:00)

- Presidenti i Republikës së Kosovës, Hashim Thaçi pret në takim zëvendës-ndihmës sekretarin e shtetit amerikan, Matthew Palmer.  (Kabineti i Presidentit, ora 10:00 - vetëm pamje)

- Me rastin e vizitës së zotit Peter Beyer, deputet në Bundestag, në Kosovë, Ambasada Gjermane organizon një takim me gazetarë. (Ambasada Gjermane, ora 10:00)

- Policia e Kosovës organizon hapjen e  fushatës së titulluar “Dhuna nuk arsyetohet”.  (Sheshi ”Zahir Pajaziti”, ora 10:00)

 - Mbahet mbledhja e Komisionit për Mbikëqyrjen e Agjencisë së Kosovës për Inteligjencë në të cilën do të behët shqyrtimi i propozimit për mbështetjen e punës së AKI-së. (Ndërtesa e Kuvendit, salla N 10, ora 10:00)

- Grupi për Studime Juridike dhe Politike organizon panelin e diskutimit me temë “Performanca e sistemit gjyqësor dhe prokurorial sipas këndvështrimit dhe vlerësimit të qytetarëve". (Hotel Swiss Diamond, ora 10:30)

- Kryeministri i Republikës së Kosovës pret në takim zëvendës ndihmës Sekretarin e Shtetit Amerikan, Matthew Palmer. (Ndërtesa e Qeverisë, ora 10:45)

- Ministri për Forcën e Sigurisë të Kosovës, Rrustem Berisha dhe Ministri i Mbrojtjes të Malit të Zi, Predrag Boshkoviç mbajnë konferencë për media. (Ndërtesa e Ministrisë se FSK-së, ora 10:50)

- Mbahet mbledhja e Komisionit për Zhvillim Ekonomik, Infrastrukturë, Tregti, Industri dhe Zhvillim Rajonal në të cilën do të behët shqyrtimi i Propozim - vendimit të Qeverisë për kandidatet për kryesues të Bordit të ZRRE-së. (Ndërtesa e Kuvendit, salla N 303, ora 11:00)

- Instituti Demokratik i Kosovës mban konferencën për media në të cilën do të paraqiten rekomandimet e KDI-së, lidhur me të drejtat e punëtorëve në sektorin privat dhe rreziqet me të cilat përballen në vendin e punës. (Zyrat e KDI-së, ora 11:00)

- Presidenti i Republikës së Kosovës, Hashim Thaçi, pret në takim Ministrin e Mbrojtjes të Malit të Zi,  Predrag Bošković. (Kabineti i Presidentit, ora 11:20 - vetëm pamje) 

- Qendra për Paqe dhe Tolerancë në përkrahje nga OSBE dhe në bashkëpunim me Komunën e Vitisë dhe me shkollat e mesme në këtë komunë organizon aktivitetin e pastrimit të Parkut të Qytetit në Viti. (Parku i Qytetit në Viti, ora 13:00)

 - Mbahet mbledhja e Komisionit për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit në të cilën do të behët shqyrtimi i kërkesave të Këshillit Gjyqësor të Kosovës dhe Këshillit Prokurorial të Kosovës lidhur me Projektligjin për Pagat dhe Zyrtarët Publik. (Ndërtesa e Kuvendit, salla N204, ora 13:00)

- Lëvizja Vetëvendosje mban konferencë për media. (Zyrët qendrore të Vetëvendosjes, ora 14:00)

- Kryeministri Ramush Haradinaj merr pjesë në mbledhjen e Qeverisë së Republikës së Kosovës. (Ndërtesa e Qeverisë, ora 14:00)

- Mbahet ceremonia e diplomimit të gjeneratës së parë të Shkollës së Lartë Profesionale - Cacttus Education. (Hotel Sirius, ora 15:00)