26 Gusht 2019

Berisha pritet me nderime të larta ushtarake në Ministrinë e Mbrojtjes të Kroacisë

Zagreb, 7 nëntor - Ministri i Forcës së  Sigurisë të  Kosovës, Rrustem Berisha, me ftesë të ministrit të Mbrojtjes të Republikës së Kroacisë, Damir Krstiqevic, po qëndron për vizitë zyrtare në Zagreb, Kroaci.

Ministri Berisha, i  shoqëruar nga ambasadori i Republikës së Kosovës në Kroaci Gëzim Kasapolli, atasheu i FSK-së kolonel Skender Hoxha dhe një  delegacion i FSK-së,  zhvilloi një  takim të gjerë me homologët e Ministrisë së Mbrojtjes të Kroacisë.

Ministri Berisha dhe ministri Krstiqevic biseduan lidhur me situatën aktuale të sigurisë në të dy vendet,  në rajon dhe më gjerë,  si dhe për marrëdhëniet e shkëlqyera ndërmjet dy shteteve dhe dy ministrive, Ministrisë së FSK-së dhe Ministrisë  së Mbrojtjes të Kroacisë.

Ministri Berisha njëherësh e njohu homologun Krstiqevic edhe mbi zhvillimet aktuale në vend, me theks të veçantë mbi procesin e tranzicionit të FSK-së, procedurat ligjore dhe demokratike që po zbatohen në drejtim të përmbylljes së procesit të tranzicionit të FSK-së, krijimin e bazës ligjore për mandatin e ri të FSK-së, si dhe për detyrat që dalin pas votimit të tri projektligjeve në Parlamentin e Republikës së Kosovës.

Gjithashtu, ministri i FSK-së Rrustem Berisha në takim nënvizoi nevojën për avancimin e bashkëpunimit me Kroacinë në fushën e mbrojtjes dhe sigurisë, si dhe shprehu mirënjohje të  lartë për mbështetjen që ka dhënë shteti dhe populli kroat  në rrugëtimin e Kosovës, duke veçuar sidomos fushën e edukimit dhe arsimimit dhe atë të sigurisë dhe mbrojtjes.

Në fund të fjalës së tij, ministri Rrustem Berisha kërkoi mbështetje të fuqishme nga ministri Damir Krstiqevic për anëtarësimin e Kosovës në iniciativa rajonale dhe globale të sigurisë, duke treguar gatishmërinë e  Kosovës për të kooperuar në operacionet për mbështetjen e paqes së bashku me Kroacinë si shtet anëtar me të drejta të plota në Aleancën Veri atlantike.

Ndërsa, ministri i Mbrojtjes së Kroacisë gjatë fjalës së tij e ri-konfirmoi edhe një herë  gatishmërinë e Kroacisë për mbështetjen e gjithanshme të Kosovës.

Ai  foli edhe për eksperiencën e vendit  të tij dhe sfidat nëpër të cilat ka kaluar Kroacia. Po ashtu, ministri kroat u zotua se do ta mbështes Kosovën në zhvillimin  e kapaciteteve të saj të mbrojtjes me teknikë dhe personel, si dhe do ta përkrahë në rrugën e saj drejt anëtarësimit në iniciativat rajonale, në Iniciativën SHBA-Karta e Adriatikut-A5 dhe në Rakviak( RACVIAC).

Kalendari

Ngjarjet e datës 26 gusht 2019 - Komuna e Kumanovës dhe Komuna e Gjilanit oragnizojnë prezantimin e projektit dy vjeçar për bashkëpunim ndërkufitar Gjilan-Kumanovë për treg të përbashkët. (Biblioteka e Qytetit te Gjilanita, ora 10:00)

- Universiteti “Ukshin Hoti” në Prizren do të zhvillojë punimet e konferencës shkencore ndërkombëtare me tematika të ndryshme nga Shkencat e Natyrës dhe Teknologjia, Shkencat e Jetës dhe Teknologjia dhe nga Shkencat Inxhinierike dhe Teknologjia. (Universiteti i Prizrenit, ora 10:30)

- Ministri i Mjedisit dhe Planifikimit Hapësinor, Fatmir Matoshi, do të vizitojë komunën e Skenderajit ku do të përurojë fillimin e punimeve për rregullimi i shtratit të lumit “Klina” në Skenderaj, në vlerë prej 300 mijë euro. (Skenderaj, ora 11:00)

- Zyra e Koordinatores për Zhvillim te OKB-së nënshkruan Memorandumi Mirëkuptimit me Rrjetin e Përgjegjësisë Sociale Korporative te Kosovës. (Shtëpia e OKB-së në Kosovë, Rruga e Zagrebit 58, afër Ministrisë së Shëndetësisë, ora 11:00)

- Komuna e Kumanovës dhe Komuna e Gjilanit oragnizojnë inaugurimin e hapjen e tregut mobile për farmerët më produkte të fresketa. (Parku i lagjës “Arberia” në Gjilan, ora 11:30)

- Kryetari i Komunës së Prizrenit, Mytaher Haskuka do të mbajë konferencë për media lidhur me rastin e drejtorit të Drejtorisë për Ekonomi dhe Financa. (Shtëpinë e Bardhë në Prizren, ora 12:00)

- Ministri i Mjedisit dhe Planifikimit Hapësinor, Fatmir Matoshi, do të vizitojë komunën e Dragashit ku do të përurojë fillimin e punimeve për Rregullimi i trotuarit dhe sheshit në Dragash,  në vlerë prej 560 mijë euro. (Dragash, ora 14:30)

- Përfaqesues dhe pjësmarres të konferencës shkencore ndërkombëtare te cilen e organizon Universitei i Prizrenit takohen dhe darkojnë me 150 akademikë dhe Rektorë. (Nafron Diamondora, ora 19:30)