19 Korrik 2019

Rritet numri i koronarografive dhe stentimeve në QKUK

Prishtinë, 13 maj - Shërbimi i Kardiokirurgjisë me Kardiologji Invazive në Qendrën Klinike Universitare e Kosovës ka rritur theksueshëm numrin e trajtimit të rasteve me probleme në zemër, pas vendimit për shërbim 24 orësh nga shkurti i vitit të kaluar.

Brenda 3 muajve të parë të vitit 2019 mjekët specialistë kanë vendosur 507 stenta tek pacientët, dyfish më shumë se në vitin 2018, i cili, për këtë periudhë kohore, arrinte në 285 sosh.

Drejtori i Kardiokirurgjisë me Kardiologji Invazive, Tefik Bekteshi, pret që shifrat për rastet e intervenimeve të tilla të jenë më të mëdha këtë vit.

Në vitin 2018 kardiologët kanë bërë 1640 stentime.

“Ka një progres të numrit të trajtimit të rasteve këta tre muaj. Besoj që me këtë trend do t’i tejkalojmë numrat e vitit të kaluar nga aspekti i diagnostikës, domethënë angiografisë koronare, por  edhe nga aspekti i stentimeve në infarktin akut të miokardit, çka është edhe synim i këtij institucioni”, thotë Bekteshi.

Sipas raportit 3 mujor të punës për vitin 2019, në QKUK janë kryer edhe 719 koronarografi, derisa vitin e shkuar 543.

Kardiologu Bekteshi thotë se listë klasike të pritjes për koronarografi nuk ka.

Megjithatë, ai u tërheq vërejtjen mjekëve, të cilët, sipas tij, shpeshherë kërkojnë koronarografi pa nevojë dhe kështu zgjasin pritjet për pacientët.

Me hapjen e sallës së dytë, brenda pak muajsh, Bekteshi shpreson që lista e pritjes të bie deri në 3 javë.

“Pritet të biem në nivel të pritjes më së shumti 15 deri në 20 ditë, duke potencuar se rastet akute shkojnë përmes rrugës tjetër, shkojnë përmes shërbimit të njësisë koronare, përmes Klinikës së Kardiologjisë”, pohon Bekteshi.

Në Klinikën e Kardiologjisë Invazive, gjatë vitit 2017 janë vendosur 768 stenta për 651 pacientë, gjersa janë realizuar 1114 koronarografi.

Kalendari

Ngjarjet e datës 19 korrik 2019 - Ekipi i Luftimit të Brigadës së Këmbësorisë së 44-të, Garda Kombëtare e Ushtrisë së New Jersey do të marrë komandën e MNBG-E nga Ekipi i Luftës së Brigadës së 29-të të Mbrojtjes së Këmbësorisë, Gardës Kombëtare të Ushtrisë së Hawaii ku menjëherë pas ceremonisë do të mbahet një konferencë shtypi. (Camp Bondsteel, ora 9:00)

- Klinika e Kirurgjisë Vaskulare, në bashkëpunim me Katedrën e Kirurgjisë dhe Fakultetin e Mjekësisë mbajnë mbledhje komemorative, me rastin e vdekjes së Prof.dr. Gazmend Shaqiri. (Amfiteatri i Dekanatit të Fakultetit të Mjekësisë, ora 9:00)

- Komisioni për Shëndetësi, Punë dhe Mirëqenie Sociale i Kuvendit të Kosovës do të mbajë dëgjim publik për Projektligjin e Punës. (Hotel Sirius, ora 10:00)

- Mbledhja e komisionit për Mbikëqyrjen e Financave Publike në të cilën do të behët shqyrtimi i raportit të Auditimit të Kompanisë Regjionale 'KRU Prishtina', të Ndërmarrjes Publike ,,Posta e Kosovës", etj. (Ndërtesa e Kuvendit, salla N 302, ora 11:00)

- Kryeministri Ramush Haradinaj pret në takim një delegacion prej 56 studentësh të programit Akademia Verore, nga 28 shtete të ndryshme. (Ndërtesa e Qeverisë, ora 12:00)

- Grupi i Aktivisteve protestojnë para policisë në Fushë Kosovë për të mos lejuar që përdhunimet e vrasjet të fshihen brenda mureve të Policise dhe Prokurorise që sipas tyre më së paku i mbrojnë. (Marrshimi nis nga lagja Meshari te pazari për të vazhduar drejt stacionit policor në Fushë Kosovë, ora 14:00)

- Mbahet mbledhja e rregullt e Qeverisë së Kosovës. (Ndërtesa e Qeverisë, ora 15:00)
 
- Matt Taylor, regjisor i “Rick & Morty Exquisite Corpse”, prezanton filmat e animuar në kuadër të Festivalit Ndërkombëtarë të Filmit të Animuar - Anibar. (Kinema “Jusuf Gërvalla” në Pejë, ora 14:00)

- Në kuadër të aktiviteteve "Ditët e Diasporës 2019" në përkujdesjen e Kryetarit të Komunës së Deçanit, Bashkim Ramosaj në Deçan behët hapja e Panairit Verorë 2019. (Qendra e qytetit të Deçanit, ora 16:00)
 
- Fondacioni Lumbardhi prezanton ekspozitën 'Kino e artistit' Vladimir Miladinović. (Kinema Lumbardhi, ora 19:30)

- Fondacioni Lumbardhi organizon koncertin e këngëtares kroate te pop dhe jazz, Vesna Pisaroviç Quartet: "The Great Yugoslav Songbook". (Kinema Lumbardhi, ora 21:00)