19 Korrik 2019

Kryhet një operacion i rrallë tek një fëmijë në QKUK

Prishtinë, 6 maj - Një ekip mjekësor në Klinikën e Kirurgjisë së Fëmijëve ka kryer me sukses një operacion të rrallë te një fëmijë i moshës 2 vjeçare, i dyti që realizohet brenda 20 vjetëve në QKUK.

Fëmija kishte marrë lëndime në bark nga një televizor dhe, pas ekzaminimeve të nevojshme, mjekët kanë vërejtur një formacion cistik në pankreas.

Kirurgu Ali Aliu thotë se intervenimi është kryer me sukses të plotë, ndonëse i komplikuar, kurse pacienti është lëshuar për në shtëpi.

“Pas intervenimit me sukses, pacientja është liruar brenda javës për në shtëpi. Në pranim pacientja kishte 10.5 kilogramë. Këto raste janë të rralla, kanë qenë prezente edhe më herët. Për fat të mirë, këto raste kryhen në klinikën tonë dhe nuk ka nevojë për trajtim jashtë vendit”, tha Aliu.

Për të parandaluar përkeqësimin e gjendjes shëndetësore, mjekët ia kishin ndërprerë mënyrën e rregullt e të ushqyerit dhe pacienti ishte mbajtur vetëm me terapi parenterale (infuzion).

Drejtori i Klinikës së Kirurgjisë së Fëmijëve, Murat Berisha, pohon se fëmija ka qëndruar pa ngrënë më shumë se një muaj, meqë ishte konstatim i mjekëve për të shmangur komplikimet tjera.

“Është rast i ndjeshëm. Pas traumës që pëson pacienti, duhet të qëndrojë pa ushqim. Fëmija ka qëndruar pa ngrënë 5 javë. Është mbajtur me një material ushqyes që kushton shumë, por familjarët nuk kanë pasur nevojë të shpenzojnë për të, sepse ne, si Klinikë, e posedonim”, deklaroi Berisha.

Durim Kastrati, babai i pacientes, është shprehur i kënaqur me mënyrën e trajtimit të vajzës dhe ka falënderuar mjekët për punën e bërë.

 “Nuk kam menduar që mjekët tanë mund t’i kryejnë këto operacione. Sjellja e tyre ka qenë shumë e mirë. Për secilin veprim na kanë informuar. Rasti, sipas mjekëve, ka qenë i rëndë, por është kryer me sukses. Shërbimi për vajzën time ka qenë shumë i mirë”, tha ai.

Kalendari

Ngjarjet e datës 19 korrik 2019 - Ekipi i Luftimit të Brigadës së Këmbësorisë së 44-të, Garda Kombëtare e Ushtrisë së New Jersey do të marrë komandën e MNBG-E nga Ekipi i Luftës së Brigadës së 29-të të Mbrojtjes së Këmbësorisë, Gardës Kombëtare të Ushtrisë së Hawaii ku menjëherë pas ceremonisë do të mbahet një konferencë shtypi. (Camp Bondsteel, ora 9:00)

- Klinika e Kirurgjisë Vaskulare, në bashkëpunim me Katedrën e Kirurgjisë dhe Fakultetin e Mjekësisë mbajnë mbledhje komemorative, me rastin e vdekjes së Prof.dr. Gazmend Shaqiri. (Amfiteatri i Dekanatit të Fakultetit të Mjekësisë, ora 9:00)

- Komisioni për Shëndetësi, Punë dhe Mirëqenie Sociale i Kuvendit të Kosovës do të mbajë dëgjim publik për Projektligjin e Punës. (Hotel Sirius, ora 10:00)

- Mbledhja e komisionit për Mbikëqyrjen e Financave Publike në të cilën do të behët shqyrtimi i raportit të Auditimit të Kompanisë Regjionale 'KRU Prishtina', të Ndërmarrjes Publike ,,Posta e Kosovës", etj. (Ndërtesa e Kuvendit, salla N 302, ora 11:00)

- Drejtori i Përgjithshëm i ATK-së Ilir Murtezaj do të mbaj konferencë për media, në të cilën do të prezantohen të arriturat e Administratës Tatimore të Kosovës për periudhën Janar-Qershor 2019. (Zyra qendrore e ATK-së, ora 11:00)

- Kryeministri Ramush Haradinaj pret në takim një delegacion prej 56 studentësh të programit Akademia Verore, nga 28 shtete të ndryshme. (Ndërtesa e Qeverisë, ora 12:00)

- Grupi i Aktivisteve protestojnë para policisë në Fushë Kosovë për të mos lejuar që përdhunimet e vrasjet të fshihen brenda mureve të Policise dhe Prokurorise që sipas tyre më së paku i mbrojnë. (Marrshimi nis nga lagja Meshari te pazari për të vazhduar drejt stacionit policor në Fushë Kosovë, ora 14:00)

- Mbahet mbledhja e rregullt e Qeverisë së Kosovës. (Ndërtesa e Qeverisë, ora 15:00)
 
- Matt Taylor, regjisor i “Rick & Morty Exquisite Corpse”, prezanton filmat e animuar në kuadër të Festivalit Ndërkombëtarë të Filmit të Animuar - Anibar. (Kinema “Jusuf Gërvalla” në Pejë, ora 14:00)

- Në kuadër të aktiviteteve "Ditët e Diasporës 2019" në përkujdesjen e Kryetarit të Komunës së Deçanit, Bashkim Ramosaj në Deçan behët hapja e Panairit Verorë 2019. (Qendra e qytetit të Deçanit, ora 16:00)
 
- Fondacioni Lumbardhi prezanton ekspozitën 'Kino e artistit' Vladimir Miladinović. (Kinema Lumbardhi, ora 19:30)

- Fondacioni Lumbardhi organizon koncertin e këngëtares kroate te pop dhe jazz, Vesna Pisaroviç Quartet: "The Great Yugoslav Songbook". (Kinema Lumbardhi, ora 21:00)