23 Tetor 2020

KOMF adreson propozimet për Projekt Kodin Civil

Prishtinë, 8 tetor - Koalicioni i OJQ-ve për Mbrojtjen e Fëmijëve në Kosovë – KOMF, Zyra e UNICEF në Kosovë, SOS Fshatrat e Fëmijëve në Kosovë dhe Organizata për Fëmijët pa Kujdes Prindëror – OFAP, kanë adresuar drejt deputetëve të Kuvendit të Republikës së Kosovës propozimet për Projekt Kodin Civil, me qëllim rregullimin e kapitullit për mbrojtjen e fëmijëve pa përkujdes prindëror.

Format e mbrojtjes së posaçme të fëmijëve pa përkujdes prindëror, siç janë kujdestaria, strehimi familjar, strehimi rezidencial dhe adoptimi, kanë nevojë për plotësime dhe ndryshime. Po ashtu nevoja për forma të reja të mbrojtjes së fëmijëve pa përkujdes prindëror, sikurse Jetesa e Pavarur e Mbikëqyrur, është më se e domosdoshme.

Adoptimi si formë e mbrojtjes së fëmijëve pa përkujdes prindëror përgjatë zbatimit të tij në praktikë ka hasur në shumë vështirësi. Më shqetësuese nga të gjitha mbeten afatet e pa përcaktuara ligjore, e si rrjedhojë vonesat në nxjerrjen e vendimeve për adoptim të cilat krijojnë rrethana që mund të cenojnë zhvillimin e fëmijëve në pritje të procedurave për adoptim. Po ashtu, legjislacioni aktual nuk definon llojet e strehimit familjar, nuk rregullon dhe nuk parasheh forma të mbrojtjes në lidhje me të drejtat dhe nevojat e fëmijëve që janë pa përkujdes prindëror dhe të cilët kanë nevojë për përkujdesje shtetërore të mëtejshme pas arritjes së moshës 18 vjeçare. Si shembull i cili duhet potencuar është kur fëmija pa përkujdes prindëror arrin moshën 18 vjeçare, sipas legjislacionit në fuqi duhet të largohet nga familja strehuese. Në pamundësi që fëmija të qëndrojë në familjen e njëjtë strehuese pas moshës 18 vjeçare, Organi i Kujdestarisë është i detyruar ta vendosë fëmijët në Institutin në Shtime, gjë që ndikon negativisht në mirëqenien e përgjithshme të fëmijës. Po ashtu çështje të ndërlidhura me strehimin rezidencial, e sidomos strehimin me bazë në komunitet për fëmijët pa përkujdes prindëror kanë nevojë të rregullohen tutje në Projekt Kodin Civil.

Me qëllim të hartimit të propozimeve për Projekt Kodin Civil, organizatat e lartshënuara kanë zhvilluar një seri konsultimesh publike për të sjellë qëndrimet e akterëve kyç të shoqërisë civile dhe akterëve të institucioneve publike lidhur me hartimin e Projekt Kodit Civil, me fokus në mbrojtjen e fëmijëve.

Këto konsultime kanë mundësuar sjelljen e diskutimeve në mes të akterëve kryesorë të fushës dhe kanë ofruar mundësi për ti dhënë zë pikëpamjeve të shoqërisë civile, institucioneve publike dhe grupeve të interesit, duke hartuar kështu propozimet për mbrojtjen e fëmijëve pa përkujdes prindëror në kuadër të Projekt Kodit Civil.

Propozimet kanë për qëllim mbrojtjen dhe përmirësimin e situatës së fëmijëve pa përkujdes prindëror. Për më tepër, propozimet synojnë që të kemi një Kod Civil gjithëpërfshirës dhe sa me praktik dhe lehtë të zbatueshëm nga institucionet publike dhe organizatat tjera duke krijuar kështu mekanizma të fuqishëm në mbrojtjen e fëmijëve si dhe rritjen e llogaridhënies të institucioneve përgjegjëse për zbatimin e ligjit.

Presim që deputetët e Republikës së Kosovës të përfshinë propozimet për rregullimin e mbrojtjes së fëmijëve pa përkujdes prindëror në kuadër të Projekt Kodit Civil. Jemi të hapur për të ofruar kontributin tonë në këtë proces duke ofruar ekspertizën profesionale dhe sqarime shtesë lidhur me propozimet e dërguara.

 

Kalendari

Ngjarjet e datës 23 Tetor 2020

- Komisioni Qendror i Zgjedhjeve mban mbledhjen e radhës. (ndërtesa e KQZ-së në, kati i parë, ora 10:00) 

- Komisioni Hetimor Parlamentar mbi procesin e licencimit, operimit, mbikëqyrjes dhe aplikimit për lejet e hidrocentraleve në Republikën e Kosovës interviziton ministrin e Ekonomisë dhe Ambientit; Blerim Kuçi. (Ndërtesa e Kuvendit, salla N204, ora 11:00)

- Në kuadër të përmbylljes së “Javës  Evropiane për Siguri dhe Shëndet në Punë”, ministri i MPMS-së, Skender Reçica viziton fabrikën “NewCo Ferronikeli”. (Drenas, ora 11:00)

- Kryetari i Komunës së Prizrenit, Mytaher Haskuka do të merr pjesë në përurimin e “Memorialit të Komandant Drinit - Ekrem Rexha. (Tek parku përballë Shtëpisë së Bardhë, ora 11:00)

-  Komisioni Hetimor Parlamentar lidhur me procesin e privatizimit në Kosovë interviston ish- Zëvendës kryesuesin e Bordit të Agjencisë së Privatizimit, Naser Osmani. (Ndërtesa e Kuvendit, salla N10, ora 12:00)

-  Komisioni për Integrim Evropian takohet me Shefin e Zyrës dhe Përfaqësuesin Special të BE-së në Kosovës, Tomáš Szunyog në lidhje me Raportin për Kosovën 2020 të publikuar nga Komisioni Evropian. (Ndërtesa e Kuvendit, salla C301, ora 12:00)

-  Komisioni Hetimor Parlamentar lidhur me procesin e privatizimit në Kosovë ish Ministër i Ekonomisë dhe Financave, Haki Shatri. (Ndërtesa e Kuvendit, salla N10, ora 13:00)

- Kryeministri i Qeverisë së Republikës së Kosovës, Avdullah Hoti pritet me një ceremoni zyrtare kryeministri i Maqedonisë së Veriut Zoran Zaev. (Para Qeverisë së Republikës së Maqedonisë së Veriut në Shkup, ora 14:00)

- Kryeministri i Qeverisë së Republikës së Kosovës, Avdullah Hoti dhe kryeministri i Maqedonisë së Veriut Zoran Zaev mbajnë konferencë për media. (Konferenca do të përcillet online, ora 15:05)

- Fondacioni Shtatëmbëdhjetë organizon bisedën “Off the record: Gjendja e hapësirave të braktisura”. (Kino Armata, ora 15:00)

- Kryeministri i Qeverisë së Republikës së Kosovës, Avdullah Hoti takohet me Presidentin e Maqedonisë së Veriut, Stevo Pendarovski. (Ndërtesa e Presidencës në Shkup, ora 15:35)

- Kryeministri i Qeverisë së Republikës së Kosovës, Avdullah Hoti takohet me Kryetarin e Kuvendit të Maqedonisë së Veriut, Talat Xhaferi. (Kabineti i Kryetarit të Kuvendit në Shkup, ora 16:10)

- Kryeministri i Qeverisë së Republikës së Kosovës, Avdullah Hoti takohet me Artan Grubi, Zëvendës Kryeministër i parë i shoqëruar edhe Ali Ahmeti, Kryetar i BDI-së. (Ndërtesa e Kuvendit në Shkup, ora 16:35)

- Nënshkruhet MoU për krijimin e rrjeteve të pastra 5G në mes të Qeverisë së Republikës së Kosovës dhe Departamentit të SHBA-ve. (Ambasada e Republikës së Kosovës në Shkup, ora 17:15)

- Kryeministri i Qeverisë së Republikës së Kosovës, Avdullah Hoti takohet me Udhëheqësit e partive politike si Ziadin Sela nga Aleanca për Shqiptarët, Bilall Kasami nga Lëvizja Besa,  Afrim Gashi nga Alternativa dhe Menduh Thaqi nga PDSH. (Ambasada e Republikës së Kosovës në Shkup, ora 17:40)