03 Dhjetor 2020

Hungaria mbështetë institucionet në Kosovë për të reaguar ndaj Covid-19

Prishtinë, 19 nëntor - Hungaria i dhuroi institucioneve në Kosovë një numër të madh të pajisjeve mbrojtjes personale. Ushtarët hungarezë të KFOR-it mundësuan transportin e rreth 50,000 maska për fytyrën dhe 5,000 veshje mbrojtëse, i cili u bë me aeroplan të Forcës Ajrore Hungareze dhe u dorëzuan në depon qendrore të Ministrisë së Shëndetësisë në Prishtinë.

Me këtë rast, ambasadori hungarez në Prishtinë Jozsef Bencze theksoi se "donacioni është një projekt dypalësh që u promovua nga Ministri i Punëve të Jashtme Péter Szijjártó dhe homologia e tij, znj. Meliza Haradinaj-Stublla, pas takimit të mbajur në tetor, në Budapest.”

Ministri i Shëndetësisë Armend Zemaj, i cili gjithashtu mori pjesë në ceremoninë e dorëzimit të donacionit, falënderoi Hungarinë për furnizimin që do të ndihmojë kapacitetet vendore të reagojnë ndaj Covid-19.

Kontingjenti hungarez i KFOR-it lehtësoi zbatimin e projektit, i cili bëhet në kuadër të ndihmës së ofruar nga vendet aleate të NATO-s dhe partnere për institucionet në Kosovë për të reaguar ndaj pandemisë globale.

Hungaria është vendi i tretë kontribues në misionin e udhëhequr nga NATO-ja në Kosovë, me rreth 400 ushtarë që shërbejnë në Shtabin e Përgjithshëm dhe në Batalionin e Rezervës Taktike të KFOR-it, të udhëhequr nga Hungaria.

Që nga shpërthimi i pandemisë, KFOR-i ka ofruar pajisje mbrojtëse personale për institucionet shëndetësore në Kosovë, duke lehtësuar shpërndarjen e ndihmës nga vendet aleate dhe partnere, duke përfshirë Gjermaninë, Italinë, Poloninë, Turqinë dhe Austrinë.

Kalendari

Ngjarjet e datës 3 Dhjetor 2020

- Me rastin e Ditës Ndërkombëtare të Personave me Aftësi të Kufizuara, Handikos mban konferencën lansuese të Raportit vlerësues mbi qasshmërinë e fëmijëve me aftësi të kufizuara në ndërtesat shkollore të nivelit fillor dhe të mesëm të ulët në Kosovë. (Qendra e Resurseve të Handikos në Veternik, ora 9:30)

- Gjykata Themelore në Ferizaj mban seancën kundër të pandehurit Ibrahim Mustafa Keqpërdorimi i pozitës apo autoritetit zyrtar. (Gjykata Themelore në Ferizaj, ora 9:30)

- Kuvendi i Kosovës mban seancë te veçantë në të cilën do të mbahet debat parlamentar për gjendjen e të drejtave të personave me aftësi të kufizuara në Republikën e Kosovës. (Kuvendi i Kosovës, ora 10:00)

-  Komisioni për Integrim Evropian shqyrton Projektligjin për rimëkëmbjen ekonomike – COVID-19, me amendamentet e Komisionit funksional nga aspekti i përputhshmërisë me legjislacionin e BE-së. (Ndërtesa e Kuvendit, salla N302, ora 10:00)

-  Komisioni për të Drejtat dhe Interesat e Komuniteteve dhe Kthim shqyrton Projektligjin për Rimëkëmbjen Ekonomike - COVID-19, me raport amendamente të Komisionit funksional për Buxhet dhe Transfere. (Ndërtesa e Kuvendit, salla N303 Koha: 10:00  

- Për nder të Ditës Ndërkombëtarë për Personat me Nevoja të Veçanta, ushtruesja e detyres Presidentja, dr.Vjosa Osmani bashkërisht me ambasadorin Britanik, Nicholas Abbott dhe ministrin e Arsimit, Ramë Likaj  nënshkruajnë panon e zotimit për gjithëpërfshirje. Oborri i Kuvendit të Republikës së Kosovës (hyrja nga sheshi, ora 11:30)

- OJQ EC Ma Ndryshe organizon aktivitetet ndërgjegjësuese që ka qëllim të përcjell porosinë vetëdijësuese për eliminimin e pengesave që janë krijuar për shkak të mungesës së gjithëpërfshirjes. (Parku i Qytet në Prizren, ora 11:00 - Keji përballë xhamisë së “Sinan Pashës”, ora 12:00 - Marash, ora 13:00)