Zëvendëskryeministri Kuçi priti në takim lamtumirës John Allelo,
Prishtinë, 2 prill - Zëvendëskryeministri i Qeverisë së Republikës së Kosovës, Hajredin Kuçi ka pritur sot në një takim lamtumirës z.John Allelo, këshilltar i lartë për sundimin e ligjit në USAID.
Në takimin me Allelo, zëvendëskryeministri Hajredin Kuçi ritheksoi falënderimet e Qeverisë së Republikës së Kosovës, të të gjitha institucioneve tjera dhe popullit të Kosovës për mbështetjen e fuqishme që Shtetet e Bashkuara të Amerikës i kanë dhënë Republikës së Kosovës në të gjitha periudhat.
Zëvendëskryeministri Hajredin Kuçi po ashtu shprehu mirënjohjen për angazhimet e vazhdueshme dhe mbështetjen e gjithanshme të USAID-it dhe në veçanti të z.Allelo për funksionimin stabil dhe efektiv të institucioneve të Republikës së Kosovës.
Në këtë kuadër, zëvendëskryeministri Kuçi vlerësoi lartë përkushtimet e Allelo, në procesin e hartimit të Kushtetutës së Republikës së Kosovës, një kushtetutë moderne, që garanton institucione funksionale, qeverisje të mirë, sundim të rendit dhe ligjit dhe respektim afirmativ të të drejtave të komuniteteve.