Prishtinë, 12 shkurt - Presidenti i Republikës së Kosovës, Hashim Thaçi, priti sot me nderimet më të larta shtetërore, Presidentin e Republikës së Sllovenisë, Borut Pahor.

Pas ceremonisë shtetërore të dy presidentët mbajtën takimin e përbashkët kokë më kokë dhe më pas edhe takimin e përbashkët të të dyja delegacioneve, gjatë të cilit u vlerësua lartë bashkëpunimin i ndërsjellë në mes të dyja vendeve.

Presidenti Thaçi shprehu falënderimin në emër të tij, të institucioneve të Kosovës dhe të popullit të Kosovës Presidentit Pahor, për vizitën e  tij që po  i bënë Republikës së Kosovës, në prag të 10 vjetorit të pavarësisë së Kosovës.

Kreu i shtetit tha se u jemi shumë mirënjohës institucioneve sllovene dhe popullit slloven për mirëkuptimin që kanë treguar gjithmonë për Kosovën, për paqen dhe stabilitetin në rajon.

“Sllovenia është një nga vendet e para që e ka njohur Republikën e Kosovës. Kosova nuk do ta harroj kurrë këtë fakt, do ta respektojmë dhe do të jemi gjithmonë mirënjohës për njohjen që i keni bërë Kosovës” tha presidenti Thaçi duke shtuar tutje se “Me këtë njohje keni ndihmuar edhe popullin e Kosovës, por edhe paqen, stabilitetin në tërësi në rajonin e Ballkanit perëndimor”.

Presidenti Thaçi duke vlerësuar lartë raportet bilaterale në mes të Kosovës dhe Sllovenisë, tha se ato kanë qenë dhe vazhdojnë të mbesin të shkëlqyera, duke u bërë ftesë investitorëve sllovenë që të vijnë dhe të investojnë në Kosovë.

“Raportet tona bilaterale kanë qenë, janë dhe do të vazhdojnë të mbesin të shkëlqyera. Ne nuk kemi ndonjë çështje të hapur. Ndihem tepër mirë që investitorët sllovenë janë prej më kryesorëve në Republikën e Kosovës, shfrytëzoj rastin edhe njëherë t’i ftoj edhe të tjerët të vijnë."

"Në Kosovë është krijuar një klimë e mirë, atraktive dhe inkurajuese për investitorët ndërkombëtarë, shembullin më të mirë e kemi atë të sektorit të energjisë kohëve të fundit që u nënshkrua marrëveshja mes institucioneve të Kosovës dhe kompanive amerikane për investime në sektorin e energjisë në Kosovë, që përfshinë një investim prej 1 miliardë e 300 milionë euro, investime këto që do të jenë shumë të rëndësishme për të ardhmen zhvillimore të Kosovës”, tha Presidenti Thaçi.

I pari i vendit tha se Kosova është njohur nga 115 shtete, është anëtarësuar në rreth 200 organizata të ndryshme ndërkombëtare dhe se synimi dhe qëllimi jonë është që të jemi sa më shpejt pjesë  e NATO-s, Bashkimit Evropian dhe e Organizatës së Kombeve të Bashkuara.

“Kosova ka ndërtuar raporte të shkëlqyera me të gjithë fqinjët, edhe me Maqedoninë, edhe me Shqipërinë, edhe me Malin e Zi, e ka mirëpritur shumë anëtarësimin e Malit të Zi në NATO, si mesazhin më të mirë për paqe në rajon dhe frymës euroatlantike”, vijoi presidenti Thaçi.

Kurse sa i përket çështjes së demarkacionit, presidenti Thaçi tha se ajo problematikë i takon Kosovës, marrëveshja është e drejtë.

“Mes Kosovës dhe Malit të Zi, raportet tona janë të interesit të përbashkët, janë të shkëlqyera, janë strategjike. Po punojmë gjithashtu edhe me Serbinë që t’i implementojmë të gjitha marrëveshjet e arritura në Bruksel."

"Gjithashtu edhe gjatë këtij viti të arrijmë marrëveshjen tjetër historike atë përfundimtare që do të nënkuptonte normalizimin e plotë të marrëdhënieve edhe pajtimin mes dy vendeve tona si parakusht edhe për integrime evropiane”, shtoi presidenti Thaçi, duke vijuar tutje se “Ne do të vazhdojmë të jemi pjesë aktive në luftë edhe kundër terrorizmit dhe gjithë ekstremizmave, ndërsa natyrisht sfidat tona në të cilat do të përballemi do t’i kalojmë bashkërisht në frymën evropiane. E kemi mirëpritur strategjinë e presidentit Junker për vendet e Ballkanit Perëndimor."

"Natyrisht Kosova ka pritur pak më tepër qartësi, por edhe Kosova do t’i kryen obligimet e veta edhe sa i përket çështjes së demarkacionit në një kohë të shkurtër, shpresoj në këtë drejtim dhe jemi duke punuar intensivisht. Gjithashtu edhe sa i përket themelimit të asociacionit të komunave me shumicë serbe”.

Ai tha se po ndërtojmë pas 10 viteve të pavarësisë një Kosovë të re, evropiane, zhvillimore me fqinjësi të mirë dhe me perspektivë të sigurt euroatlantike.

Ndërsa Presidenti Pahor u zotua se bashkëpunimi ndërmjet Kosovës dhe Sllovenisë do të zhvillohet edhe më tutje, duke ndihmuar njëri-tjetrin në rajonin e Ballkanit Perëndimor do të kontribuojmë në paqe, siguri, mirëqenie dhe perspektives euroatlantike të këtij rajoni. 

Ai tha se shtetet tona janë mike, dhe se Sllovenia është një investitor i rëndësim në Kosovë.

Në fund Presidenti Thaçi tha se mbështetja dhe përvoja Sllovene është jetike për neve.

“Edhe njëherë u jam shumë mirënjohës për angazhimin tuaj personal dhe falënderues edhe në rolin tuaj si kryeministër, dhe tash si president i Sllovenisë, dhe meqë është takimi i parë fizik pas zgjedhjeve në mandatin e dytë, urimet më të mira dhe sukseset më të mira” tha presidenti Thaçi.