09 Korrik 2020

Shqipëria falënderuese për kontributin që ka dhënë Kosova pas tërmetit në Shqipëri

Prishtinë, 19 shkurt - Presidenti i Republikës së Kosovës, Hashim Thaçi, sot ka pritur ministrin në detyrë për Evropë dhe Punë të Jashtme të Republikës së Shqipërisë, Gent Cakaj.

Presidenti Thaçi e ka falënderuar ministrin Cakaj për vizitën që i ka bërë Kosovës, menjëherë pas festimit të 12 vjetorit të pavarësisë.

“Liria dhe pavarësia e Kosovës ndërlidhen drejtpërdrejtë edhe me kontributin e Shqipërisë. Një kontribut ky i jashtëzakonshëm historik. Por, në të njëjtën kohë edhe tash në procesin e konsolidimit të shtetit tonë, të anëtarësimit të Kosovës në organizata ndërkombëtare dhe njohjeve të reja, kërkohet një koordinim në mes Prishtinës dhe Tiranës”, ka thënë presidenti Thaçi.

Në anën tjetër, ministri në detyrë për Evropë dhe Punë të Jashtme i Republikës së Shqipërisë, Gent Cakaj, ka thënë se ka qenë i fokusuar në konsolidimin e marrëdhënieve brenda shqiptare në rajon.

“Kemi qenë, po ashtu, të angazhuar në çështjen e njohjeve të Kosovës, me të gjitha kapacitetet që kemi pasur. Jemi munduar ta bëjmë më të mirën për forcimin e subjektivitetit ndërkombëtar të Kosovës dhe në forumet shumëpalëshe jemi kujdesur që aty ku Kosova nuk ka prani, ne të jemi zëri i Kosovës dhe të adresojmë të gjitha çështjet që e ngarkojnë agjendën e saj”, ka thënë ministri Cakaj.

Ministri në detyrë për Evropë dhe Punë të Jashtme i Republikës së Shqipërisë e ka falënderuar presidentin Thaçi për kontributin që ka dhënë Kosova, pas tërmetit në Shqipëri më 26 nëntor.

“Solidariteti i popullit të Kosovës ka qenë i jashtëzakonshëm dhe puna e institucioneve të Kosovës e pashembullt. Me atë keni dëshmuar se ndonëse jemi dy shtete, ne jemi një komb i vetëm dhe se marrëdhëniet tona duhet të thellohen”, ka thënë Cakaj.

Kreu i shtetit ka thënë se ministri Cakaj i ka dhënë një dinamikë dhe një shpirt të ri frymës së afirmimit të konsolidimit të shtetit të Kosovës kudo në botë, në çdo instancë ndërkombëtare ku merr pjesë Republika e Shqipërisë.

“Në emër të institucioneve dhe popullit të Kosovës shpreh falënderim për kontributin tuaj personal, të kryeministrit Rama dhe të gjitha institucioneve të Republikës së Shqipërisë, që kanë një qëndrim unik për Kosovën”, ka thënë presidenti Thaçi.


  

Kalendari

Ngjarjet e datës 9 Korrik 2020 - Mbahet mbledhja e Qeverisë së Kosovës. (Ndërtesa e Qeverisë, ora 9:00)

- Vazhdimi i seancës plenare të Kuvendit të Republikës së Kosovës në të cilën do të behët votimi dhe shqyrtimi i disa Projektligjeve për ratifikimin e Marrëveshjeve ndërkombëtare. (Salla e Kuvendit, ora 10:00)

- Komuna e Prizrenit bën përurimin e stadiumit në Sërbicë të Poshtme, projekt i realizuar nga Drejtoria për Kulturë, Rini dhe Sport ku do të jetë i pranishëm kryetari i Komunës së Prizrenit, Mytaher Haskuka dhe drejtoresha e DKRS-së, Emilija Redzepi. (Nisja do të bëhet nga Shtëpia e Bardhë në Prizren, ora 10:30)

- Vazhdimi i seancës plenare të Kuvendit të Republikës së Kosovës në të cilën do të behët  votimi i Propozim rezolutës nga Raportimi i Kryeministrit të Republikës së Kosovës dhe debati parlamentar lidhur me dialogun Kosovë - Serbi. (Salla e Kuvendit, ora 10:30)

- Në nderim të ushtarit amerikan Alexander Blake Klass, 20 vjeçar nga Willamina e Oregonit, që ka humbur jetën në një incident, që nuk kishte të bënte me veprim të armatosur, Shoqata "Miqtë e Amerikës" do ta ulin në gjysëm shtizë flamurin amerikan. (Sheshi “Bill Clinton” në Prishtinë, ora 11:00)

- Mbahet Seanca plenare e Kuvendit të Republikës së Kosovës. (Salla e Kuvendit, ora 11:00)

- OVL e UÇK-së mban protestë gjithëpopullore me moton “Në mbrojtje të Luftës Çlirimtare”. (Prishtinë dhe qytetet e tjera të Kosovës, ora 12:00)

- Lëvizja Vetëvendosje mban konferencë për media në të cilën flet Albulena Haxhiu. (Zyret e LV-së në Arbëri, ora 13:00)

- Mbahet mbledhja e jashtëzakonshme e Kuvendit Komunal të Rahovecit, në të cilën do të behët shqyrtimi dhe aprovimi i Propozim vendimit për bartjen e mjeteve nga rezervat e buxhetit komunal, nga kategoria pozicionit të pagave në kategorinë e Investimeve Kapitale. (Salla e mbledhjeve të Kuvendit Komunal në objektin e ri të komunës, ora 14:00)

Mbledhja do të mbahet në sallën e mbledhjeve të Kuvendit Komunal, në objektin e ri të komunës.

- Mbahet një takim pune i organizuar nga Ministria e Ekonomisë dhe Ambientit në të cilin do të diskutohet dokumenti - Plani Hapësinor i Parkut Kombëtar Bjeshkët e Nemuna. (Ndërtesa e re e Qeverisë ish-Rilindja, salla e konferencave, kati XVIII, ora 15:00)