17 Shkurt 2019

Qeverisë i kërkohet të ndal politizimin e shërbimit civil

Prishtinë, 14 shkurt - Instituti INDEP, Instituti GAP dhe Grupi për Studime Juridike dhe Politike (GLPS) shprehin shqetësimin e thellë me Qeverinë e Kosovës për mosrespektimin e Memorandumit të Mirëkuptimit me Ambasadën Britanike dhe për vazhdimin e politizimit të emërimeve në pozitat e larta në Qeveri dhe borde.

Kjo praktikë sipas tyre duhet ndalur menjëherë dhe të gjitha pozitat për të cilat kompania profesionale britanike ka shprehur kundërshtim të hapur duhen revokuar.

"Kur në tetor të vitit të kaluar, Qeveria Haradinaj kishte vendosur të vazhdoj Memorandumin me Ambasadën Britanike, Kryeministri kishte thënë se kjo po bëhet në mënyrë “që të sigurohet një proces ligjor dhe kredibil”!"

"Jo vetëm që kjo nuk ka ndodhur, por në të kundërtën, Qeveria ka injoruar përfundimet dhe rekomandimet e kompanisë profesionale duke dëmtuar rëndë kredibilitetin e gjithë procesit. Personi i 4-të në listë është emëruar Sekretar i Përgjithshëm në Ministrinë e Tregtisë dhe Industrisë", theksojn keto organizata.

Në të njëjtën kohë, Qeveria i ka kërkuar kompanisë britanike të mos përfshihet në emërimin e Bordit Mbikëqyrës të Trepçës.

Më tutje, Qeveria ka emëruar sekretarin e përgjithshëm të MASHT, edhe pse qartazi ishte kërkuar anulimi i procesit për shkak të jo-kredibilitetit (tërheqje të 8 nga 11 kandidatëve nga intervistimi), dhe mospërmbushjes së kritereve nga kandidatët e intervistuar.

Pa e njoftuar ambasadën, janë proceduar Komisioni për Provimin e Jurisprudencës, Trusti Pensional i Kosovës, Guvernatori i Bankës Qendrore, Anëtarët e Bordit të Bankës Qendrore dhe Agjencia Kosovare e Privatizimi.

Politizimi në pozita të larta në Qeverinë e Kosovës dhe në bordet e agjencive të pavarura dhe agjencive qeveritare është shndërruar në një problem kronik. Emërimi dhe zgjedhja e anëtarëve politikë dhe jomeritorë në pozita kyçe në institucione dhe agjenci është jo vetëm e kundërligjshme por edhe dëmton rëndë barazinë para ligjit dhe konkurseve publike. Të zgjedhurit e politikës nuk do t’i shërbejnë interesit publik.

Përkundrazi, në vend të profesionalizmit ata do t’i shërbejnë interesave të ngushta partiake në dëm të institucionit ku veprojnë. INDEP, GAP dhe GLPS i bëjnë thirrje Qeverisë së Kosovës ta ndalojë këtë proces të shëmtuar të degradimit të pavarësisë së administratës dhe institucioneve të pavarura.

Politizimi nuk rrënon thjeshtë një memorandum me një Ambasadë që deshi të kontribuonte në krijimin e një kulture të drejtësisë në emërime.

Ai mbi të gjitha shkelë parimet kushtetuese të sundimit të së drejtës, të barazisë së të gjithë qytetarëve para konkursit publik, shkelë prioritetin 6 të shtyllës së parë të Agjendës Evropiane të Reformave dhe legjislacionin vendor që rregullon institucionet subjekte të proceseve të emërimit.

Politizimi i agjencive shtetërore në dëm të profesionalizmit ngadalëson progresin e gjithëmbarshëm shoqëror të integrimit dhe zhvillimit ekonomik.

Bëhet vetëm për të përmbushur apetitet e partive në koalicion qeverisës, edhe kur kjo nënkupton shkeljen e të drejtave të njeriut të personave meritor, të papunë të Kosovës. INDEP, GAP dhe GLPS ftojnë edhe Këshillin e Pavarur Mbikëqyrës të Shërbimit Civil të Kosovës, Agjencinë Kundër-Korrupsionit, prokurorinë dhe organet e rendit që të hetojnë këto shkelje dhe të mbrojnë ligjshmërinë dhe demokracinë në vend.

Në të njëjtën, INDEP, GAP dhe GLPS e konsiderojnë si hap të duhur krijimin e një komision hetimor parlamentarë për të hetuar politizimin dhe shkeljet në konkurset për pozita të larta në shërbimin civil dhe institucione të pavarura, si mjet për të vendosur kontrollin parlamentar mbi institucionet ekzekutive.

Duke politizuar shërbimin civil dhe duke shkelur pavarësinë e institucioneve të pavarura, Qeveria rrezikon që t’i humbas fondet e Bashkimit Evropian të destinuara për reformën e administratës publike të cilat kapin shumën e 22 milionë eurove.

"Edhe njëherë, i bëjmë thirrje Qeverisë të ndërpresë politizimin e agjencive dhe pozitave të rëndësishme në Qeveri dhe t’u përmbahet rekomandimeve të komisioneve vlerësuese dhe kompanisë britanike sipas Memorandumit të Nënshkruar".

"Në fund të fundit, mbrojtja e ligjshmërisë dhe të drejtave të të gjithë aplikuesve nuk duhet të jetë e varur nga vullneti për të implementuar një memorandum mirëkuptimi, por një domosdoshmëri që veçse është e garantuar në Kushtetutë, ligje dhe marrëveshje ndërkombëtare."
 

Kalendari

Ngjarjet e datës 17 shkurt 2019 - Qeveria e Kosovës mban mbledhje festive për nder të 11-vjetorit të Pavarësisë. (Ndërtesa e Qeverisë, ora 8:00)

- Ngritja solemne e Flamurit të Republikës së Kosovës për nder të 11-vjetorit të Pavarësisë në të cilën marrin pjesë presidenti Hashim Thaçi, kreu i Kuvendit, Kadri Veseli dhe kryeministri Ramush Haradinaj. (Hapësira mes ndërtesës së Kuvendit dhe Qeverisë, ora 8:30) 

- Presidenti Thaçi, kryeparlamentari Veseli dhe kryeministri Haradinaj vendosin kurora lulesh te shtatorja e ish-presidentit Ibrahim Rugova. (Sheshi “Ibrahim Rugova”, para Kuvendit, ora 8:45) 

- Presidenti Thaçi, kryeparlamentari Veseli dhe kryeministri Haradinaj vendosin kurora lulesh në Kompleksin Memorial “Adem Jashari” në Prekaz. (Prekaz, ora 9:40)

- Në 11 vjetorin e shpalljes së pavarësisë të Kosovës, anëtarë të kryesisë së LDK-së bashkë më struktura të saj, bëjnë homazhe te varri i Presidentit Historik të Kosovës, Dr. Ibrahim Rugova. (Velani, ora 10:00)

- Komuna e Gjilanit organizon homazhe  te varrezat e dëshmorëve. (Gjilan, ora 10:00)

- Federata e Ping-Pongut e Kosovës (FPPK) organizon turneun “Dita e Pavarësisë”.  (ShMU “Tefik Çanga”, Ferizaj, ora 10:00)

- “Star Kids” do të performojnë në sheshin “Skënderbeu” për nder të Pavarësisë. (Sheshi “Skënderbeu” në Prishtinë, ora 10:00)

- Kuvendi i Kosovës mban seancë solemne për nder të 11-vjetorit të Pavarësisë. (Kuvendi i Kosovës, ora 10:45) 

- Komuna e Gjilanit organizon akademi solemne dhe program artistik nga Shkolla e Muzikës në Gjilan. (Teatri i Qytetit, ora 11:00)

- Trupat e Forcës së Sigurisë së Kosovë parakalojnë me rastin e 11-vjetorit të Pavarësisë së Kosovës. (Prej Sheshit “Nënë Tereza” deri te Sheshi “Ibrahim Rugova”, ora 12:20)

- Me rastin e 11-vjetorit të Pavarësisë së Kosovës organizohet koktej për të gjithë të ftuarit në Parakalimin e Trupave të FSK-së. (Hotel “Swiss Diamond”, ora 13:00)

- Dega e Lidhjes Demokratike të Kosovë në Gjilan bën përurimin e bustit të ish-presidentit Ibrahim Rugova (Gjilan, ora 13:00)

- Përfaqësues të organizatave studentore organizojnë një “protestë artistike” në lidhje me vonesën e liberalizimit për qytetarët e Kosovës. (Sheshi “Zahir Pajaziti”, ora 13:00) 

- Komuna e Vushtrrisë organizon manifestimin qendror për shënimin e 11-vjetorit të Pavarësisë. (Kalaja e Qytetit, Vushtrri, ora 13:00)

- Kryeministri Ramush Haradinaj pret në takim deputetët nga Mbretëria e Bashkuar, John Grogan dhe Martin Vickers. (Ndërtesa e Qeverisë, ora 14:00)

- Shoqata e Gastronomëve të Prishtinës, në bashkëpunim me Qeverinë e Kosovës, organizon një event simbolik për Pavarësi. (Sheshi “Skënderbeu”, ora 14:00) 

- Kryetari i Kuvendit të Kosovës, Kadri Veseli, dhe ministri i Kulturë, Rinisë dhe Sportit, Kujtim Gashi, përurojnë Palestrën Sportive në Shtime. (Shtime, ora 15:00)

- Kryeministri Ramush Haradinaj pret në takim delegacionin 17-anëtarësh nga Shtetet  e Bashkuara të Amerikës, të kryesuar nga Senatori James Inhofe. (Ndërtesa e Qeverisë, ora 15:00) 

- Komuna e Lipjanit organizon koncert festiv për 11-Vjetorin e Pavarësisë. (Qendra e Kulturës “Tahir Sinani”, Lipjan, ora 15:00)

- Ansambli Kombëtar i Këngëve dhe Valleve “Shota” mban koncert festiv për Pavarësi. (Sheshi “Zahir Pajaziti”, Prishtinë, 18:00)

- Për 11-vjetorin e Pavarësisë së Kosovës bëhet ndezja e organizuar e fishekzjarrëve. (Sheshi “Zahir Pajaziti”, Prishtinë, ora 18:30)

- Me rastin e 11-vjetorit të Pavarësisë së Kosovës organizohet pritja shtetërore nën përkujdesjen kryeministrit Ramush Haradinaj. (Hotel “Venus”, magjistralja Prishtinë-Ferizaj, ora 19:30)

- Mbahet koncerti festiv për nder të 11-vjetorit të Pavarësisë së Kosovës. (Sheshi “Zahir Pajaziti”, Prishtinë, ora 20:00)