04 Tetor 2022

Përmbyllet programi i trajnimit për anëtarët e rinj të kuvendeve komunale

Prishtinë, 6 maj - Misioni i OSBE-së në Kosovë ka përmbyllur serinë prej 23 punëtorish për anëtarët e kuvendeve të komunave të zgjedhur për herë të parë në zgjedhjet lokale të tetorit 2021.Trajnimet u përqendruan në rolin e anëtarëve të kuvendeve në përfaqësimin e interesave të elektorateve të tyre përkatëse dhe avancimin e funksionimit të kuvendeve të komunës pjesë e së cilave janë.

Për më se një muaj e gjysmë, 310 anëtarë të rinj të kuvendeve komunale nga që të 38 komunat e Kosovës morën pjesë në punëtoritë në fjalë dhe patën rastin të diskutonin rreth mandatit të tyre legjislativ, si edhe rolit të tyre përfaqësues e mbikëqyrës. Seanca trajnimi të dizajnuara enkas u mbajtën dhe për kryesuesit e kuvendeve të komunave që kanë marrë përsipër këtë pozitë për herë të parë, me fokus në marrëdhëniet me publikun dhe komunikimin me mediat.

Gjatë punëtorive në fjalë u trajtuan po ashtu dhe pajtueshmëria me kornizën ligjore dhe parimet e qeverisjes së mirë, kriteret ligjore për buxhetimin komunal, aspekte të barazisë gjinore, si edhe mekanizmat për pjesëmarrjen dhe përfaqësimin e komuniteteve.

“Mbi 60% e anëtarëve të kuvendeve komunale janë të ri dhe mbajnë për herë të parë pozitë të zgjedhur me votë, andaj angazhimi në rolin dhe përgjegjësitë e tyre të mbikëqyrjes, madje sa më herët në mandatin e tyre që të jetë e mundur, është me rëndësi të veçantë. Kuptimi i veçantive të rolit që ata ushtrojnë do të bëjë të mundur funksionimin më efektiv të kuvendeve të komunave, të sigurojë kontroll të ndërsjellë dhe balancim ndërmjet degëve të pushtetit, si edhe t’u mundësojë që të kërkojnë llogari nga administrata komunale,” ka deklaruar Fatmir Zylfijaj, zyrtar nacional për programe në Misionin e OSBE-së në Kosovë, njëherësh menaxher i planifikimit, përmbajtjes dhe realizimit të trajnimeve fillestare.

Gjatë diskutimeve të zhvilluara në kuadër të këtyre punëtorive u shpërfaqën prioritete dhe nevoja të shumta të përbashkëta të kuvendeve të komunave, përfshirë përditësimin e rregulloreve përkatëse të punës së kuvendeve dhe përvetësimin udhëheqjes me mbledhjet e kuvendeve në pajtim me këto rregullore të punës. Gjatë muajve në vijim, Misioni i OSBE-së në Kosovë do të ofrojë mbështetje të mëtutjeshme në lidhje me këto çështje në komuna të përzgjedhura, të përshtatur sipas specifikave të secilës komunë.

Misioni i OSBE-së në Kosovë ka mandat mbrojtjen dhe promovimin e të drejtave të njeriut dhe të komuniteteve, demokratizimin si edhe zhvillimin e sektorit të sigurisë publike. Ai mbështetë komunat për ofrimin e shërbimeve më të mira komunale përmes zhvillimit të kapaciteteve komunale të menaxhimit, promovimit të angazhimit të publikut, forcimit të kontrollit të ndërsjellë dhe balancimit ndërmjet degëve të pushtetit, bashkëpunimit ndërkomunal dhe përmirësimit të bashkërendimit ndërqeveritar. 

Kalendari

Ngjarjet e datës 4 tetor 2022 - Komisioni për Punë të Jashtme dhe Diasporë takohet me delegacionin e administratës së Parlamentit të Republikës së Austrisë. (Ndërtesa e Kuvendit, salla C203, ora 8:30)

- Misioni i Organizatës për Siguri dhe Bashkëpunim në Evropë organizon ceremoninë zyrtare të nënshkrimit të Memorandumit të Mirëkuptimit ndërmjet komunave të rajonit, Prishtinës, Obiliqit, Lipjanit, Podujevës dhe Fushë Kosovës dhe Qendrës për Mbrojtjen e Grave dhe Fëmijëve në Prishtinë. (Hotel Amazona, ora 10:00)

- Instituti Demokratik i Kosovës organizon tryezën e diskutimit gjatë të cilës do të shpalosën të gjeturat nga analiza e procedurave të prokurimit publik lidhur me shpenzimet publike të realizuara nga Ministria e Shëndetësisë dhe Shërbimi Spitalor Klinik Universitar gjatë periudhës 2020 – 2022. (Restorant Boho, ora 10:00)  

- Komisioni për Mbikëqyrjen e Financave Publike shqyrton raportin e Auditorit të Përgjithshëm për Raportn Vjetor Financiar të Buxhetit të Republikës së Kosovës për vitin 2021. (Ndërtesa e Kuvendit, salla N302, ora 11:00)

- Në kuadër të aktiviteteve kulturore artistike brenda institucioneve korrektuese, nesër në Qendrën Korrektuese për Femra në Lipjan, do të shfaqet Filmi “ Sffaragette”. (Qendra Korrektuese për Femra Lipjan, ora 11:00)

- Me rastin e 4 Tetorit, “Ditës Botërore për Mbrojtjen e Kafshëve”,  Ministria e Mjedisit, Planifikimit Hapësinor dhe Infrastrukturës në bashkë organizim me Agjencia e Ushqimit dhe Veterinarisë, OJQ-në Fondacioni për Mbrojtjen e të Drejtave të Kafshëve si dhe Fondacioni për mbrojtjen e kafshëve Vier Pfoten Kosova do të shënojmë këtë ditë në Pyllin e Arinjve Prishtina. (Fshati Mramor, afër liqenit të Badovcit, ora 11:00)
 
- Qendra Kryesore e Mjekësisë Familjare në Rahovec, përgjatë gjithë muajit tetor, si muaji i ndërgjegjësimit për kancerin e gjirit, çdo ditë pune ofron shërbimin e mamografisë falas për të gjithë. (Rahovec, ora 11:00)

- Ministri i Financave, Punës dhe Transfereve, Hekuran Murati së bashku me Ministren e Financave dhe Ekonomisë të Shqipërisë, Delina Ibrahimaj, Drejtorin e Përgjithshëm të Doganave të Kosovës Agron Llugaliu dhe Doganës së Shqipërisë Genti Gazheli do të inspektojnë punët në hapësirat e përbashkëta të Portit të Durrësit. (Porti i Durrësit, ora 12:00)

- Kryetari i Kuvendit të Republikës së Kosovës, Glauk Konjufca, pret në takim ambasadorin e Francës, Olivier Guerot. (Kabineti i kryetarit, ora 12:00 - Mediat mund të marrin pamje në fillim të takimit!)

- Komisioni për Ekonomi, Industri, Ndërmarrësi dhe Tregti shqyrton në parim i Projektligjit për Sigurinë e përgjithshme të produkteve si dhe formon grupin e punës për mbikëqyrjen e zbatimit të Ligjit për komunikimet elektronike. (Ndërtesa e Kuvendit, salla N10, ora 12:00)

- Komisioni Qendror i Zgjedhjeve mban mbledhjen e radhës. (Selia e KQZ=së, ora 13:30)