21 Tetor 2020

Kuvendi i Kosovës dhe Fakulteti Juridik nënshkruan memorandum bashkëpunimi

Prishtinë, 16 tetor - Kryetarja e Kuvendit të Republikës së Kosovës, Vjosa Osmani, ka pritur sot në një takim dekanin e Fakultetit Juridik të Universitetit të Prishtinës “Hasan Prishtina”, Avni Puka, me të cilin ka nënshkruar një memorandum bashkëpunimi ndërmjet këtyre dy institucioneve.

Nëpërmjet këtij memorandumi hapet rruga për bashkëpunim profesional ndërmjet trupave punuese të Kuvendit dhe Fakultetit Juridik.

Nënshkrimin e memorandumit, kryetarja Osmani e vlerësoi të rëndësishëm për Kuvendin, pasi që sipas saj, ky institucion ka nevojë për hulumtime në disa fusha, ndaj për këtë çështje do të kenë mundësi të përdoren ekspertët e Fakultetit Juridik.

“Përderisa Kuvendi ka nevojë shumë për hulumtime në shumë fusha, tanimë e kemi bashkëpunimin e drejtpërdrejtë dhe nuk i kemi problemet me të cilat jemi ballafaquar në të kaluarën, kur, nëse kemi dashur ta angazhojmë një profesor të një fushe të caktuar, është dashur që nëpërmjet OJQ-ve t’u bëjmë thirrje atyre që të angazhohen në këto hulumtime të Kuvendit të Kosovës”, tha Osmani.

Sipas kryetares Osmani, Memorandumi e krijon bazën që në të gjitha këto komunikime dhe këto kërkesa të jenë drejtpërdrejt kuadrot e Fakultetit Juridik.

Nga ana tjetër dekani i Fakultetit Juridik, Avni Puka, tha se nëpërmjet një marrëveshjeje si kjo, mundësohet që ekspertiza e Fakultetit Juridik t’i ofrohet Kuvendit dhe njëkohësisht të ketë aktivitete të përbashkëta në mes të Kuvendit të Republikës së Kosovës dhe këtij fakulteti. ​

 

Kalendari

Ngjarjet e datës 21 Tetor 2020

 - Vazhdimi i seancës plenare të Kuvendit të Republikës së Kosovës. (Salla e Kuvendit, ora 9:00)

- Kryeministri Avdullah Hoti mban konferencë për media. (Ndërtesa e Qeverisë, ora 9:30)

- Ministrja e Kulturës, Rinisë dhe Sportit Vlora Dumoshi viziton Komunën e Skenderajt ku do te takohet me Kryetarin Bekim Jashari. (Ndërtesa e komunës së Skenderajt, ora 10:00)

- Kryetari i Komunës së Prizrenit, Mytaher Haskuka do të merr pjesë në fillimin e punimeve për ndërtimin e infrastrukturës rrugore në rrugën “Fahredin Hoti”, e cila gjendet në lagjen “11 Marsi”. (Në afërsi të çerdhes publike në lagjen “11 Marsi” në Prizren, ora 10:00)

- Mbahet seanca plenare e Kuvendit të Republikës së Kosovës në të cilën do të mbahen tri interpelanca të kryeministrit Avdulla Hot. (Kuvendi i Kosovës, ora 10:00)

- Në ditën e dytë të Javës për të Drejtat e Viktimave të Krimit mbahet diskutimi me temë “Qasja e përgjithshme ndaj viktimave në kohën e pandemisë”. (Platforma zoom, ora 10:00)

- Komisioni për Buxhet dhe Transfere shqyrton Raportin vjetor financiar i Buxhetit të Republikës së Kosovës për vitin 2019, shqyrtimi i Projektligjit për Rimëkëmbjen Ekonomike - Covid-19, etj. (Ndërtesa e Kuvendit, salla C203, ora 10:00)

  - Ministrja e Kulturës, Rinisë dhe Sportit Vlora Dumoshi ndan certifikatave për ndërmarrësi në Skenderaj. (Skenderaj, ora 10:30)

- Kryetari i degës së PDK-së në Prizren Shaqir Totaj, mban konferencën e radhës. (Zyret e PDK-së në Prizren, ora 11:00)

- Këshilli Turk në Kosovë do të bëj përurimin e projektit të Klasës së Fizioterapisë në shkollën së mesme të mjeksisë "Hysni Zajmi". (Gjakovë, ora 12:00)

- Kampioni i botës në boks, Robin Haxhi Krasniqi viziton Komunen e Prishtines. (Objekti i Komunës, ora 12:00)

- Ministrja e Kulturës, Rinisë dhe Sportit Vlora Dumoshi viziton Komunën e Drenasit ku do të takohet me kryetarin Ramiz Lladrovci. (Ndërtesa e Komunës së Drenasit, ora 13:00)

- Me rastin e 25 vjetorit të rrëmbimit dhe vrasjes së Remzi Hoxhes mbahet konferencë për media. (Sëiss Diamond Prishtina, ora 13:00)

- Kryetari i Komunës së Prizrenit, Mytaher Haskuka do të merr pjesë në ceremoninë e fillimit të punimeve për ndërtimin e Fushës së Mbyllur të Tenisit, në oborrin e Qendrës Sportive "Sezai Surroi". (Oborri i Qendrës Sportive "Sezai Surroi" në Prizren, ora 14:00)

- Komisioni Qendror i Zgjedhjeve vazhdon mbledhjen e ditës së djeshme. (Ndërtesa e KQZ-së, në sallën që gjendet në katin e 4-t, ora 14:00)