03 Tetor 2022

Kosova shpall person të padëshirueshëm gazetaren ruse Daria Aslamova

Prishtinë, 7 gusht - Daria Aslamova, që punon për tabloidin rus Komsomolskaya Pravda, e cila u ndalua të shtunën nga policia e Kosovës në një vendkalim kufitar me Serbinë, është liruar dhe është shpallur person i padëshirueshëm në Kosovë.

Ministri i Punëve të Brendshme, Xhelal Sveçla tha se krahas shpalljes si person i padëshirueshëm asaj i është ndaluar për pesë vjet hyrja në territorin e Republikës së Kosovës.

“Kushdo që me qëllime apo direktiva të caktuara cenon apo tenton të destabilizojë vendin tonë, do të përballet pa diskutim me forcën e ligjeve të Republikës së Kosovës”, shkroi ministri Sveçla në një postim në rrjetin Facebook.

Të shtunën ministri Sveçla tha se “shumë shtete e kanë vërtetuar se ajo ka qenë e angazhuar në spiunazh për inteligjencën ushtarake ruse dhe se ka vepruar në petkun e gazetares. E njëjta ka marrë pjesë edhe në luftimet në Ukrainë duke propaganduar mbi pushtimin rus ndaj Ukrainës”. Në njoftimin e tij u publikuan fotografi të gazetares me ministrin e Jashtëm rus Sergey Lavrov, me presidentin sirian Bashar al-Assad, ish presidentin irakian Sadam Husein etj.

Komsomolskaya Pravda tha se zonja Aslamova ishte dërguar në terren për të përgatitur raport të posaçëm mbi tensionet e fundit ndërmjet Kosovës dhe Serbisë.

Të dielën e kaluar tensione të larta shpërthyen në veri ku grupe serbësh të mbështetur nga Beogradi, u hodhën në protesta dhe bllokuan rrugët për të kundërshtuar vendimet e qeverisë së Kosovës për të vendosur masat e reciprocitetit me Serbinë për përdorimin e dokumenteve të identifikimit dhe targave të lëshuara nga autoritetet serbe.

Qeveria e Kosovës vendosi të pezullojë deri më 1 shtator zbatimin e vendimeve me kërkesë të Shteteve të Bashkuara dhe Bashkimit Evropian.

“Tentimi i saj për të hyrë në vendin tonë përveç që përkon me zhvillimet në veri të vendit, i dëshmon qartë lidhjet dhe propagandën ruse të cilës i është bashkuar tashmë Serbia dhe që kanë për qëllim destabilizimin e vendit tonë”, shkroi ministri i Brendshëm i Kosovës, Xhelal Sveçla.

Kosova u është bashkuar sanksioneve perëndimore kundër Rusisë për shkak të agresionit të saj në Ukrainë, ndërsa Serbia është i vetmi vend në Evropë që nuk e ka bërë një gjë të tillë. Beogradi gëzon mbështetjen e Moskës në kundërshtimin e tij ndaj pavarësisë së Kosovës të cilën e njohin mbi 100 vende të botës, përfshirë Shtetet e Bashkuara dhe vendet kryesore të Bashkimit Evropian.

Kalendari

Ngjarjet e datës 3 tetor 2022  - Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit interviston kandidatët për anëtarë të Këshillit Gjyqësor të Kosovës. (Ndërtesa e Kuvendit, salla N302, ora 9:00)

-  Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione diskuton lidhur me procesin e nxjerrjes së akteve nënligjore, bazuar në Ligjin për Mbrojtjen e Fëmijës me të ftuar, Habit Hajredini - Drejtori i Zyrës për Qeverisje të Mirë, Ahmet Kryeziu - Drejtor i Sawe the Children për Kosovë, dhe Naser Lajqi – përfaqësues i OJQ “Syri i Vizionit”. (Ndërtesa e Kuvendit, salla N303, ora 10:00)
 
- Avokati i Popullit organizon dëgjim publik lidhur me hetimin e përgjithshëm për shëndetin riprodhues. (Salla e Kuvendit Komunal në Gjakovë, ora 10:00)

- Mbahet mbledhja e kryesisë së Kuvendit të Republikës së Kosovës. (Ndërtesa e Kuvendit, salla C301, ora 10:00)

- Kuvendi i Republikës së Kosovës vazhdon seancën plenare. (Ndërtesa e Kuvendit, ora 11:00)

- Kryetari i Komunës së Prishtinës, Perparim Rama përuron hapjen e Sahat Kullës e cila edhe do t'i ndez dritat e Sahat Kullës, duke ndriçuar kështu këtë monument magjepsës të trashëgimisë kulturore në Prishtinë. (Prishtinë, ora 19:00)