13 Gusht 2020

KMDLNj kërkon nga deputetët të sillen si përfaqësues të popullit

Prishtinë, 11 korrik - Këshilli për Mbrojtjen e të Drejtave dhe Lirive të Njeriut (KMDLNJ) ka deklaruar se qytetarët e Kosovës janë dëshmitarë kur të zgjedhurit e tyre janë larg përgjegjësive që ua jep vota dhe premtimi elektoral që e kanë dhënë.

Kosova, me një demokraci ende të pakonsoliduar duket se nuk është mësuar me sjelljet e deputetëve.

Mirëpo sipas KMDLNJ-së nëse i krahasojmë këto sjellje me vendet që kanë demokraci të qëndrueshme dhe kulturë parlamentare të konsoliduar, as në Kosovë, përkundër shumë problemeve, nuk e kemi gjendjen më të keqe.

Për KMDLNj nuk është aq shqetësues fakti se mund të ketë ndonjë incident verbal sepse kjo është në kuadër të një demokracie parlamentare por është shumë shqetësues fakti se fjalori dhe sjellja, në disa raste joparlamentare, reflekton gjatë votimit të ligjeve apo marrëveshjeve me interes të përgjithshëm.

Refuzimi i votimit të Ligjit anti - COVID- 19 për KMDLNj është kundër interesit qytetar dhe nuk mund të arsyetohet me asgjë.

"Refuzimi i votimit të marrëveshjeve ndërkombëtare si dhe rishikimi i Buxhetit, në kohë kur me një shpejtësi algjebrike po varfërohet populli i Kosovës, po falimentojnë bizneset dhe po humben vendet e punës është dashur të votohen me urgjencë e jo që të stërgjaten diskutimet duke u politizuar skajshëm, për të arritur një qëllim politik."

"Është e pamoralshme kur deputetët me të ardhura të majme dhe të garantuara kundërshtojnë që të sigurohen edhe pagat minimale, për një mbijetesë minimale, për ata që kanë mbetur pa punë shkaku i pandemisë", thekson KMDLNJ.

Sa i përket mbarëvajtjes së punës së Kuvendit, kryetarja është autoriteti dhe arbitri përfundimtar i interpretimit të Rregullores dhe duhet të sillet në përputhje me Rregulloren.

Qartazi po shihet se është krijuar një çarje e madhe midis kryetares së Kuvendit dhe partisë që i takon qoftë edhe nominalisht, LDK-së e që po reflekton negativisht në punën e Kuvendit. Kryetarja e Kuvendit duhet t'i trajtojë të gjithë deputetët njësojë sikur që deputetët duhet të sillen me respekt ndaj kryetares së Kuvendit.

KMDLNj konsideron se pikërisht tensionet e motivuara politikisht po reflektojnë në menaxhimin e seancave të Kuvendit për faktin se nga një shkëndijë e vogël politike, seanca po merr flakë të panevojshme dhe po përfundon me skena jo të mira. 

Rregullorja e Kuvendit shprehimisht e sqaron edhe punën e debateve, diskutimeve, replikave qoftë si deputet, qoftë në emër të grupit parlamentar e kjo qartazi nuk po respektohet.

KMDLNj kërkon nga deputetët të sillen në përputhje me mandatin si përfaqësues të popullit kurse,  për shkak të ndjeshmërisë së situates duhet t'i tejkalojnë intereset personale dhe partiake dhe t'i votojnë marrëveshjet ndërkombëtare, rishikimin e Buxhetit dhe Ligjin anti COVID- 19 në mënyrë që të tejkalohet situata më lehtë.

Kalendari

Ngjarjet e datës 13 Gusht 2020

- Komandanti i Forcës së Sigurisë së Kosovës, Gjenerallejtënant Rrahman Rama raporton para Komisionit për Çështje të Sigurisë dhe Mbrojtjes. (Ndërtesa e Kuvendit, salla N10, ora 9:00)

- Vazhdimi i seancës plenare të Kuvendit të Republikës së Kosovës. (Salla e Kuvendit, ora 10:00)

- Ministrja e Kulturës, Rinisë dhe Sportit, Vlora Dumoshi, viziton Komunën e Deçanit. (Objekti i Komunës se Deçanit, ora 10:00)

- Ministri i Infrastrukturës, Arban Abrashi, do të nënshkruaj memorandum bashkëpunimi për financimin e projekteve infrastrukturore me kryetarin e komunës së Istogut, Haki Rugova. (Komuna e Istogut, ora 10:00)

- Policia e Kosovës organizon ceremoninë e prerjes së shiritit të objektit të Stacionit Policor për Mbikëqyrje të Kufirit në Radavc ku pjesëmarrës do të jenë Drejtori i Përgjithshëm i PK-së, përfaqësues të ICITAP-it Amerikan dhe personalitete të larta vendore, përfshirë epror të PK-së. (Radavc, rruga Vitomiricë - Kullë, ora 11:00)                                              

- Drejtoria e Shëndetësisë e Komunës së Prizrenit do të bëjë hapjen e pjesës së renovuar të QKMF-së, ku do të punojë ndërrimi i tretë ku i pranishëm do të jetë kryetari i Komunës së Prizrenit, Mytaher Haskuka dhe drejtoresha e DSH-së, Narqize Arënliu Hoxhaj. (QKMF në Prizren, ora 12:00)