25 Qershor 2019

Haradinaj mbështetë fushatën për liberalizimin e vizave për Kosovën

Prishtinë, 10 tetor - Kryeministri i Republikës së Kosovës, Ramush Haradinaj, mori pjesë në promovimin e fazës së re të fushatës për liberalizimin e vizave.

Kryeministri Haradinaj,  ditën e sotme e quajti të posaçme, pasi kujtoi kohën kur si i ri ka emigruar edhe vetë dhe është informuar për jetën jashtë vendit para se të migronte, duke thënë  se lëvizja e lirë është një e drejtë dhe privilegj.

Më tutje, kryeministri tha se sot janë mbledhur që të diskutojnë dhe sqarojnë qytetarëve të Kosovës se lëvizja e lirë “Schengen” është një e drejtë e privilegj që i ka edhe disa obligime, përgjegjësi, të cilat duhen ditur.

“Liberalizimi i vizave nuk është punë e lehtë, edhe kur jepet mund të sanksionohet pastaj”, tha kryeministri Haradinaj, duke shtuar se edhe nëse dakordohet për liberalizim, ndonjë vend anëtar mund të propozojë edhe pezullim, prandaj, siç tha ai, kjo temë nuk duhet neglizhuar.

Duke falënderuar Ministrinë e Integrimeve dhe Zyrën e Bashkimit Evropian dhe të gjithë ata që kanë kontribuar për t’u plotësuar kriteret për liberalizim, përmes të cilit fitohet liria e lëvizjes.

“Jemi qytetarë të lirë dhe kjo na takon, jemi Evropë, kemi qenë, jemi dhe do të jemi gjithë jetën dhe është privilegj, por ka edhe obligime që duhet zbatuar me përpikëri”, tha kryeministri Haradinaj, duke uruar që sa më shpejt të lëvizim lirshëm dhe t’i dëshmohet familjes evropiane që jemi qytetarë të dinjitetshëm.

Ndërkaq, ministrja e Integrimit Evropian, Dhurata Hoxha, tha se procesi i liberalizimit të vizave ka qenë sfidues dhe se në këtë rrugë Kosova ka pasur 95 kritere, duke punuar shumë për plotësimin e tyre.

“Kemi kaluar me sukses votimin në Komisionin LIBE, Parlamentin Evropian dhe tani jemi një hap më afër dhe sfida e fundit do të jetë votimi në Këshill por ne nuk do të ndalemi, reformat do të vazhdojnë me një intensitet të shtuar”, tha Ministrja Hoxha, e cila shtoi se kjo fushatë ka për qëllim vetëdijesimin dhe informimin qytetarëve për mënyrën e funksionimit të vizave.

Ndërsa, shefja e zyrës së Bashkimit Evropian në Kosovë, Nataliya Apostolova, tha se sot së bashku me Kryeministrin Haradinaj dhe ministren Dhurata Hoxha është për të mbështetur fushatën ndërgjegjësuese për liberalizimin e vizave për Kosovën, duke vlerësuar se fushata  është një mjet i rëndësishëm  për të komunikuar qartë me popullin e Kosovës rreth procesit, për të drejtat dhe detyrimet që dalin nga regjimi i vizave.

 

Kalendari

Ngjarjet e datës 25 qershor 2019 - Ministri i Punëve të Jashtme i Republikës së Kosovës, Behgjet Pacolli do ta presë në takim ministren e Punëve të Jashtme të Norvegjisë, Ine Eriksen Søreide. (Hapësirat e MPJ-së, ora 8:30)

- The Siracusa International Institute for Criminal Justice and Human Rigths, një Organizatë Joqeveritare italiane organizon Dialogun Strategjik Kombëtar mbi temën e luftës kundër trafikut të paligjshëm. (Hotel Swiss Diamond, ora 9:00)

- Mbahet mbledhja e Komisionit për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi në të cilën do të diskutohet lidhur me kërkesat e Këshillit Kombëtar Shqiptar nga vizita e përbashkët e realizuar në Luginë të Preshevës (Ndërtesa e Kuvendi, salla C 203, ora 10:00)

- Instituti i Kosovës për Drejtësi me përkrahje të Departamentit të Shtetit Amerikan - Byrosë së Narkotikëve Ndërkombëtar dhe Çështjeve të Zbatimit të Ligjit dhe NED-it do të mbajë konferencë për media, në të cilën do publikohet raporti analitik: “Dështimet në rastet e shënjestruara”. (Hotel Sirius, ora 10:00)

- Ministri i Arsimit, Shkencës dhe Teknologjisë, Shyqiri Bytyqi, do të vizitojë Shkollën Fillore dhe të Mesme të Ulët “Pjetër Bogdani” në Prishtinë, ku do të bëhet dorëzimi i pajisjeve për klubet e mediave, që është donacion i GIZ-it.  (Shkolla “Pjetër Bogdani”, ora 10:00)

- Koalicioni i OJQ-ve për Mbrojtjen e Fëmijëve në Kosovë organizojnë konferencën për media lidhur me Projektligjin për Mbrojtjen e Fëmijëve. (Sheshi “Ibrahim Rugova” përpara objektit të Kuvendit të Republikës së Kosovës, ora 10:00)

- Kryeministri Ramush Haradinaj pret në takim Ministren e Punëve të Jashtme të Norvegjisë, Ine Eriksen. (Ndërtesa e Qeverisë, ora 10:05)

- Kompania Rajonale e Ujësjellësit Prishtina organizon ceremoninë me rastin e shënimit të ditës më të madhe për qytetarët e Fushë Kosovës, lëshimin në funksion të linjës magjistrale për furnizim 24 h me ujë të pijshëm. (Rr. Hajrullah ZymiFushë Kosovë, ora 10:30)

- Drejtoria e Emergjencës dhe Sigurisë në Komunën e Prizrenit organizon aktivitete solemne me rastin e Ditës së Zjarrfikësve të Prizrenit duke filluar me defileun e automjeteve dhe mjeteve zjarrfikëse në unazën e qytetit. (Nisja nga objekti i Shërbimit Zjarrfikës në Prizren, ora 11:00)

- Ministria e Punëve të Brendshme së bashku me UNDP do të organizojnë konferencën për media për vazhdimin e kampanjës për legalizimin e armëve. (Objekti qendrorë i MPB-së, salla P-02, ora 11:00)

- Kryetari Shpend Ahmeti takohet me Kryetarin e qytetit të Des Moines, Iowa të SHBA,  Thomas  Cownie. (Ndërtesa e vjetër e Komunës, ora 11:00)

- Drejtoria e Administratës në Komunën e Prizrenit në bashkëpunim me OJQ Nevo Koncepti organizon tryezë diskutimi me temën Trajtimi i Fëmijëve në Raste të Dhunës dhe Abuzimit. (Hotel Centrum, ora 11:00)

- Ministri i arsimit, Shyqiri Bytyqi raporton para Komisioni për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi lidhur me tekstet e reja shkollore. (Ndërtesa e Kuvendit, salla N 303, ora 12:00)

- Drejtoria e Emergjencës dhe Sigurisë në Komunën e Prizrenit bën demonstrimin i ushtrimeve të kërkim-shpëtimit dhe shuarjes së zjarrit në objektin e shkollës fillore “Heronjtë e Lumës” në fshatin Vërmicë. (Vërmicë, ora 12:00)

- Balkan Green Foundation, Instituti GAP, Grupi për Studime Juridike dhe Politike dhe Instituti për Politika Zhvillimore organizojnë tryezën e rrumbullakët "Kapacitetet e energjisë së ripërtëritshme dhe kost-efektiviteti i tyre,". (Hotel Sirius, ora 13:00)

- Ministri i Ministrisë së Infrastrukturës dhe Transportit, Pal Lekaj raporton para Komisioni për Zhvillim Ekonomik, Infrastrukturë, Tregti, Industri dhe Zhvillim Rajonal lidhur me monopolin në fushën e homologimit të veturave. (Ndërtesa e Kuvendit, salla N 303, ora 13:00)

- Mbahet mbledhja e rregullt e Qeverisë së Kosovës. (Ndërtesa e Qeverisë, ora 14:00)

- Banka Evropiane për Rindërtim dhe Zhvillim organizon ceremoninë e nënshkrimit të kredisë prej 18 milionë eurosh që BERZH-i i ka dhënë parkut energjetik me erë të Kitkës. (Hotel Sirius, ora 15:00)

- Kryeministri Ramush Haradinaj merr pjesë në Ekspozitën e Artizanaleve të ndryshme, nga organizata e grave “Orkide”, në Prizren. (Qendra Kulturore “Yunus Emre”, Prizren, ora 18:00)

- Kryeministri Ramush Haradinaj merr pjesë në shënimin e Javës Egjiptiane në Gjakovë. (Pallati i Kulturës “Asim Vokshi”, Gjakovë, ora 19:00)

- Shkolla Amerikane e Kosovës organizon Inagurimi i kampusit të ri të Shkollës Amerikane të Kosovës. (Shkolla Amerikane e Kosovës, Shkabaj, Prishtinë, ora 20:00)