09 Korrik 2020

Feith: Integrimi i veriut duhet të jetë përparësi për qeverinë

Washington, 27 maj - “Kosova pas dy vitesh” ishte tema e diskutimit në Institutin Amerikan të Paqes, ku Pitër Feith, Përfaqësues i Posaçëm i Bashkimit Evropian në Kosovë dhe përfaqësues i Zyrës Civile Ndërkombëtare solli një pamje të shkurtër por të qartë të zhvillimeve të dy viteve të fundit në shtetin që tashmë është njohur nga 69 vende.

Përfaqësuesi i Zyrës Civile Ndërkombëtare në Kosovë, Pitër Feith, tha se Kosova ka bërë mjaft përparim që nga viti 2008 kur shpalli pavarësinë.

“Rruga që ka përshkuar Kosova gjatë dy viteve të fundit është padyshim mbresëlënëse. Si përfaqësues i Zyrës Civile Ndërkombëtare në Kosovë dua të them se pjesa më e madhe e komunitetit ndërkombëtar ka mbështetur me vendosmëri përpjekjet e Kosovës për njohje nga të gjitha vendet.”

Gjykata Ndërkombëtare e Drejtësisë pritet të shprehë opinionin e saj në lidhje me çështjen e shpalljes së pavarësisë së Kosovës brenda këtij viti, e ndoshta që në muajin korrik.

“Ky opinion nuk ka të ngjarë të ndryshojë përkushtimin e vendeve që e kanë njohur Kosovën ndaj pavarësisë së këtij vendi. Pavarësia e Kosovës është fakt i pakthyeshëm.”

Megjthatë, zoti Feith shpreson që opinioni i Gjykatës t’i nxitë Kosovën dhe Serbinë të angazhohen më tepër në çështjet teknike të bashkëpunimin praktik me njëri tjetrin si vende fqinje.

Një nga problemet më konkrete në këtë drejtim është pjesa veriore e qytetit të Mitrovicës, ku Beogradi vazhdon të ndihmojë strukturat paralele. Qeveria e Kosovës ka theksuar një qasje gjithpërfshirëse në veri, duke bërë thirrje për ndryshime bazuar në proceset demokratike. Zoti Feith thotë se integrimi i kësaj pjese të vendit duhet të jetë përparësi për qeverinë e Kosovës. Ai vë në dukje tre objektiva që duhen pasur parasysh:

“E para, ne duhet të shmangim dhe të parandalojmë çdo lloj dhune. E dyta, nuk duhet të ketë ndarje. Dhe e treta, nuk duhet ta lëmë veriun e Kosovës si konflikt të ngrirë.”

Zoti Feith thotë se Kosova përballet edhe me shumë sfida të tjera që nga nevoja për më shumë përparim në fushën e decentralizimit, ekonomia, niveli i lartë i papunësisë dhe investimet e pakta, reforma në sistemin e drejtësisë dhe të gjykatave, e deri tek krimi i organizuar dhe korrupsioni.

“Akuzat për korrupsion duhen hetuar dhe ndjekjet penale duhen bazuar në prova të besueshme. Megjithatë, duket qartë se populli i Kosovës pret me padurim ndryshime në këtë aspekt.”

Reformat në të gjitha fushat e zbatimit të ligjit janë qenësore që Kosova të sigurojë integrimin euro-atlantik. Zoti Feith thekson se nëse këto çështje nuk trajtohen me shpejtësinë e duhur ata do ta vonojnë perspektivën e vendit për integrim.

Kalendari

Ngjarjet e datës 9 Korrik 2020 - Mbahet mbledhja e Qeverisë së Kosovës. (Ndërtesa e Qeverisë, ora 9:00)

- Vazhdimi i seancës plenare të Kuvendit të Republikës së Kosovës në të cilën do të behët votimi dhe shqyrtimi i disa Projektligjeve për ratifikimin e Marrëveshjeve ndërkombëtare. (Salla e Kuvendit, ora 10:00)

- Komuna e Prizrenit bën përurimin e stadiumit në Sërbicë të Poshtme, projekt i realizuar nga Drejtoria për Kulturë, Rini dhe Sport ku do të jetë i pranishëm kryetari i Komunës së Prizrenit, Mytaher Haskuka dhe drejtoresha e DKRS-së, Emilija Redzepi. (Nisja do të bëhet nga Shtëpia e Bardhë në Prizren, ora 10:30)

- Vazhdimi i seancës plenare të Kuvendit të Republikës së Kosovës në të cilën do të behët  votimi i Propozim rezolutës nga Raportimi i Kryeministrit të Republikës së Kosovës dhe debati parlamentar lidhur me dialogun Kosovë - Serbi. (Salla e Kuvendit, ora 10:30)

- Në nderim të ushtarit amerikan Alexander Blake Klass, 20 vjeçar nga Willamina e Oregonit, që ka humbur jetën në një incident, që nuk kishte të bënte me veprim të armatosur, Shoqata "Miqtë e Amerikës" do ta ulin në gjysëm shtizë flamurin amerikan. (Sheshi “Bill Clinton” në Prishtinë, ora 11:00)

- Mbahet Seanca plenare e Kuvendit të Republikës së Kosovës. (Salla e Kuvendit, ora 11:00)

- OVL e UÇK-së mban protestë gjithëpopullore me moton “Në mbrojtje të Luftës Çlirimtare”. (Prishtinë dhe qytetet e tjera të Kosovës, ora 12:00)

- Lëvizja Vetëvendosje mban konferencë për media në të cilën flet Albulena Haxhiu. (Zyret e LV-së në Arbëri, ora 13:00)

- Mbahet mbledhja e jashtëzakonshme e Kuvendit Komunal të Rahovecit, në të cilën do të behët shqyrtimi dhe aprovimi i Propozim vendimit për bartjen e mjeteve nga rezervat e buxhetit komunal, nga kategoria pozicionit të pagave në kategorinë e Investimeve Kapitale. (Salla e mbledhjeve të Kuvendit Komunal në objektin e ri të komunës, ora 14:00)

Mbledhja do të mbahet në sallën e mbledhjeve të Kuvendit Komunal, në objektin e ri të komunës.

- Mbahet një takim pune i organizuar nga Ministria e Ekonomisë dhe Ambientit në të cilin do të diskutohet dokumenti - Plani Hapësinor i Parkut Kombëtar Bjeshkët e Nemuna. (Ndërtesa e re e Qeverisë ish-Rilindja, salla e konferencave, kati XVIII, ora 15:00)