22 Prill 2021

BE fuqishëm pro perspektivës evropiane për Kosovën

Prishtinë, 19 mars - Presidenti i Republikës së Kosovës, dr. Fatmir Sejdiu priti sot Stefan Füle, Komisioner për Zgjerimin dhe Politikën Evropiane të Fqinjësisë.

Duke e vlerësuar takimin e sotëm me Presidentin Sejdiu si takim shumë të mirë dhe të hapur, Komisioneri Füle theksoi se u ka shprehur Presidentit Sejdiu dhe ministrit të Jashtëm të Kosovës, Skender Hyseni, qëndrimin e fuqishëm konsensual të Bashkimit Evropian për t’u angazhuar në Kosovë si dhe për të siguruar perspektivën evropiane për Kosovën.

“Diskutuam për sfidat që kemi përpara, duke pasur parasysh se viti 2010 do të jetë vit i sfidave. Është me rëndësi që institucionet e Kosovës, gjatë këtij viti, të sigurojnë stabilitet politik, që të garantojnë siguri për qytetarët e Kosovës, posaçërisht për komunitetet pakicë, dhe është shumë e rëndësishme që autoritetet e Kosovës të angazhohen në reformat që kanë të bëjnë me Bashkimin Evropian, posaçërisht në fushën e sundimit të ligjit, luftën kundër korrupsionit, luftën kundër krimit të organizuar dhe qeverisjen e mirë. Në këtë drejtim është e rëndësishme që jo vetëm të dëgjojmë fjalë, por të kemi edhe veprime konkrete”, theksoi Füle.

Gjithashtu, ai tha të se gjatë takimit është biseduar për bashkëpunimin praktik në mes të Kosovës dhe Bashkimit Evropian, veçanërisht në  tri fushat siç janë dialogu për vizat, dialogu në procesin e stabilizim-asociimit si dhe rëndësia e bashkëpunimit rajonal.

Ndërkaq, Presidenti Sejdiu ka shprehur falënderimin për mbështetjen e madhe që Bashkimi Evropian dhe Komisionari për Zgjerim i ka dhënë Kosovës, dhe e përgëzoi komisionarin Stefan Füle për detyrën që ka marrë.

“E përgëzova komisionarin Stefan Füle për detyrën që ka marrë, një detyrë e peshës së veçantë për Evropën, për kontinentin tonë, dhe në të njëjtën kohë e falënderova për përkushtimin personal që ka në mbështetjen e mëtejshme të Kosovës në të gjitha rrafshet e radiusit të veprimit të komisionarit për zgjerim”, theksoi Presidenti Sejdiu.

Ai tha të ketë biseduar me z. Füle për ambiciet dhe thellimin e punës së institucioneve të Republikës së Kosovës për përmbushjen e kritereve për liberalizimin e vizave dhe të procesit të integrimeve, kritere këto të cilat pritet të merren në ndërkohë.

“Kosova nuk ka vizion tjetër në kuptimin e aderimit të saj, por ka vizionin që në një të ardhme të afërt të jetë anëtare e Bashkimit Evropian dhe e NATO-s, që të jetë në mundësi të barabarta të veprimit dhe të shfrytëzimit të benefiteve por edhe të bëjë punën në partneritet të përbashkët me Bashkimin Evropian dhe ajo ditë do të vijë, por sa do të jetë gjatë rruga dhe sa do të shkurtohet, do të varet nga puna jonë, por natyrisht edhe nga mbështetja që do të kemi”, tha Presidenti Sejdiu.

Kalendari

Ngjarjet e datës 22 Prill 2021

- Ministri i Mjedisit, Planifikimit Hapesinor dhe Infrastrukturës, Liburn Aliu mban konferencë për media për hidrocentralet. (Tek ura në Brezovicë, 100m para kthesës kryesore për qendër të skijimit, ora 9:15)

- Komisioni për Ekonomi, Industri, Ndërmarrësi dhe Tregti takohet me kryetarin e Odës Ekonomike të Kosovës Berat Rukiqi. (Ndërtesa e Kuvendit, salla N204, ora 10:00)

- Me moton "Shpëtoni Planetin" shënohet Dita e Tokës për të rritur ndërgjegjësimin për rëndësinë e përgjegjësisë kolektive për të mbrojtur mjedisin për brezat e ardhshëm. (Mitrovicë, ora 10:00)

- Organizata ETEA dhe biblioteka “Hivzi Sulejmani” organizojnë panelin e diskutimit “Libri mes ofertës dhe kërkesës”, me rastin e Ditës Ndërkombëtare të Librit. (Biblioteka “Hivzi Sulejmani” në lagjen Dardania, ora 10:00)

-  Ministria e Mjedisit, Planifikimit Hapesinor dhe Infrastrukturës organizon aktivitetet me rastin e shënimit të 22 Prillit, Ditës Ndërkombëtare të Tokës. (Hapësira e Shkollës Fillore “Hasan Prishtina” në Prishtinë, ora 10:00)

- Komisioni për Ekonomi, Industri, Ndërmarrësi dhe Tregti takohet me kryetarin e Odës Ekonomike Amerikane në Kosovës Arian Zeka. (Ndërtesa e Kuvendit, salla N204, ora 11:00)

- Lëvizja FOL organizon debatin FOL Hapur me ministrin e Administrimit të Pushtetit Lokal, Elbert Krasniqi. (Hotel Sirius, ora 11:00)

- Programi i Kombeve të Bashkuara për Zhvillim së bashku me UN-Habitat dhe agjencitë e tjera të Ekipit të Kombeve të Bashkuara në Kosovë, do të organizojnë inaugurimin e Sistemit Solar Fotovaltaik në ndërtesen e Kuvendit Komunal të Prizrenit. (Ndërtesa e Kuvendit Komunal në Prizren, ora 11:00)

- Komisioni për Ekonomi, Industri, Ndërmarrësi dhe Tregti takohet me kryetare e Odës Ekonomike Gjermano-Kosovare Nora Hasani. (Ndërtesa e Kuvendit, salla N204, ora 12:00)

- Koordinatori i Qendrës së vaksinimit në sallën “1 Tetori”, Niman Bardhi mban konferencë për medie. (Sallla “1 Tetori”, ora 12:00)

- Ministrja e Punëve të Jashtme dhe Diasporës, Donika Gërvalla do ta pres në aeroport Ministrin e Jashtëm te Gjermanisë, Heiko Maas. (Aeroportin e Prishtinë, ora 14:00 - vetëm pamje)

- OJQ Projekti 5 Cent organizon ngjarjen për "Ditën e Tokës", ku do të bëhet mbjellja e 51 fidaneve me rastin e shënimit të kësaj dite. (Oborri i SHFMU “Ibrahim Rugova” në Obiliq, ora ora 14:00)

- Presidentja e Kosovës, Vjosa Osmani, pret në takim ministrin e Punëve të Jashtme të Gjermanisë, Heiko Maas. (Kabineti i Presidentës, ora 15:00)

- Kryeministri i Kosovës, Albin Kurti, pret në takim ministrin e Punëve të Jashtme të Gjermanisë, Heiko Maas. (Ndërtesa e Qeverisë, ora 16:30)

- Ministrja e Punëve të Jashtme dhe Diasporës, Donika Gërvalla dhe Ministri i Jashtëm i Gjermanisë, Heiko Maas do të zhvillojnë takimin bilateral. (Kabineti i ministres Gervalla, ora 17:00) vetëm pamje)