21 Shkurt 2018

70% e qytetarëve besojnë se zgjedhjet lokale do të sjellin ndryshime pozitive

Prishtinë, 13 tetor - Sot, në një konferencë për media, Instituti GAP prezantoi raportin “Pritjet e qytetarëve dhe faktorët që ndikojnë në votën e tyre në zgjedhjet komunale”.

Të dhënat e përdorura në këtë raport burojnë nga hulumtimi në teren që është zhvilluar në 38 komuna të Kosovës nga data 14 deri më 25 shtator 2017. 

Berat Thaqi, Analist i Politikave në Institutin GAP, duke prezantuar të gjeturat e anketës tha se rezultatet tregojnë se mbi 70% e qytetarëve janë të prirur të besojnë se zgjedhjet lokale të 22 tetorit do të sjellin ndryshime pozitive për familjet e tyre dhe komunitetin ku jetojnë.

 Por sipas tij, vetëm 7% e të anketuarve janë plotësisht të bindur se do të ndodhin ndryshime pozitive pas zgjedhjeve lokale.

Rreth 56% e qytetarëve të anketuar janë shprehur se vota e tyre nuk do të ndryshojë nga ajo e zgjedhjeve parlamentare të 11 qershorit, kurse 14% kanë deklaruar se do të votojnë ndryshe më 22 tetor.

Ndërkaq, rreth 7% e të anketuarve kanë deklaruar se nuk do të votojnë fare në këto zgjedhje. Sa i përket pyetjes se çka marrin për bazë qytetarët kur vendosin se cilin kandidat do ta votojnë për kryetar/e komune, shumica e të anketuarve janë përgjigjur se bazohen në programin dhe premtimet e kandidatit/es, por edhe në përvojën dhe edukimin e tij/saj.

Rezultatet e anketës tregojnë se votuesit favorizojnë më shumë kandidatët e rinj në moshë. Programi, përgatitja shkollore dhe përvoja politike janë po ashtu faktorët kryesorë që ndikojnë në votën e qytetarëve edhe për kuvendin komunal.

Blendi Hasaj, Hulumtues në Institutin GAP, theksoi se nga analizimi i mëtejmë i përgjigjeve të anketuarve kundrejt moshës së tyre, vërehet se 71% e atyre që do të votojnë për kandidatin për kryetar të komunës që vije nga partia e njëjtë për të cilën ata kanë votuar me 11 qershor janë të moshës 18-44 vjeç ku dominon kategoria e të rinjve 25-34 vjeç.

Në lidhje me qëndrimin e qytetarëve sa i përket votimit të një kandidati i cili nuk i përket etnisë së tyre, rezultatet tregojnë se, në përgjithësi, votuesit nuk preferojnë të votojnë dikë nga etnitë tjera, pa marr parasysh përgatitjen e tij/saj.

Qytetarët e anketuar, të cilët kanë më shumë kontakte me pjesëtar të komuniteteve tjera, siç janë Prizreni dhe Mitrovica, janë më të prirë të votojnë për kandidatët e etnive tjera. Gjithashtu, të anketuarit nga komuniteti boshnjakë, serbë dhe shqiptarë janë më refuzues ndaj kandidatëve të etnive tjera, se sa të anketuarit nga komunitetet egjiptianë, romë apo goranë.

Matja e opinionit është bërë nga UBO Consulting, me ç ‘rast janë anketuar 1,065 qytetarë të Kosovës: shqiptarë (818), serb (150) dhe pjesëtarë të komuniteteve të tjera (97). Ky hulumtim nuk ka pasur për qëllim identifikimin e prirjeve të qytetarëve se për cilin subjekt politik do të votojnë.

Kalendari

Ngjarjet e datës 21 Shkurt 2018 - Mbahet punëtoria lidhur me kujdesin ndaj kafshëve dhe mënyrën e trajtimit të qenve endacakë. (Objekti i ri i Komunës së Prishtinës. ora 8:30)

- Kryeministri Ramush Haradinaj merr pjesë në seminarin “Zotimi i politikave dhe përfshirja e komuniteteve Rom dhe Ashkali në shoqërinë Kosovare”. (Ndërtesa e Qeverisë, salla P38, ora 9:00)

- Zyra për Qeverisje të mirë në bashkëpunim me Zyrën e Komisionit Evropian organizon seminarin e përbashkët me temën “Zotimi i politikave dhe përfshirja e komuniteteve Rom dhe Ashakli  në shoqërinë Kosovare”. (Ndërtesa e Qeverisë, salla P38, ora 9:00)

- Mbahet takimi per finalizimin e dokumentit programues të zbatimit të Strategjisë së Evropës Juglindore. (Hotel Swis Diamond, ora 10:00)

- Ministria e Integrimit Evropian organizon konferencën “Dimensioni gjinor i procesit të Integrimit Evropian në Kosovë”. (Hotel Sirius, ora 10:00)

 - Ministria e Shëndetësisë në bashkëpunim me Komisionin për Shëndetësi dhe Mirëqenie Sociale të Kuvendit të Kosovës dhe Zyrën e UNICEF-it në Kosovë, organizon tryezën e rrumbullakët me temën “Zbatimi i ligjit për të ushqyerit me qumësht të gjirit dhe kontributi në zhvillimin e fëmijëve: Sfidat dhe veprimet”. (Hotel Sirius, ora 10:00)

- Ministrja e Mjedisit dhe Planifikimit Hapësinor Albena Reshitaj do të vizitojë Komunën e Mitrovicës, ku bashkë me kryetarin e komunës, Agim Bahtiri do të nënshkruajnë një Memorandum Bashkëpunimi”, në lidhje me realizimin e projekteve në fushën e mjedisit dhe planifikimit hapësinor. (Komuna e Mitrovicës, ora 10:00)

- Studentët e drejtimit të Biokimisë do të protestojnë lidhur me moslicencimin nga ana e Ministrisë së Shëndetsisë, (Para Ministrisë së Shëndetsisë, ora 11:00)

- Ministri i Punëve të Brendshme, Flamur Sefaj raporton para Komisionit për Punë të Brendshme, Siguri dhe Mbikëqyrjen e Forcës së Sigurisë së Kosovës rreth zhvillimeve në Inspektoratin Policor të Kosovës. (Ndërtesa e Kuvendit, salla S-II, ora 11:00)

- Mbahet mbledhja e Komisionit për Zhvillim Ekonomik, Infrastrukturë, Tregti, Industri dhe Zhvillim Rajonal në të cilën do të shqyrthet në parim i Projektligjit për Shërbimet Postare,  Projektligjit për Metrologji, etj. (Ndërtesa e Kuvendit, salla S-I, ora 11:00)

- Në shënimin e Ditës ndërkombëtare e gjuhës amtare do të mbahet debati mbi temën "Përdorimi i gjuhëve në Kosovë". (Qendra Mediale në Cagalavicë, ora 11:00)

- Behët promovimi i librit “Republika në udhëkryq” të autorit Gëzim Selaci* të organizuar nga SHB Logos-A, në Prishtinë. (Fakulteti Filozofik - Universiteti i Prishtinës, Salla 204, ora 13:00)

- Departamenti i Gazetarisë i Fakultetit të Filologjisë të Universitetit të Prishtinës organizon diskutimin me Uta Ibrahimin vajzen e parë shqiptare që pushtoi majën më të lartë në botë, Everestin. (Amfiteatir i Fakultetit Filologjik, ora 13:00)

- GIZ dhe PEN organizojnë “Ceremoninë përmbyllëse të Garës me Tabela të Zeza”. (Sheshin 21, ora 13:00)

- Zyra e BE-së në Kosovë në bashkëpunim me Kuvendin e Kosovës organizon ngjarjen përmbyllëse për “Projektin e binjakëzimit në mbështetje të Kuvendit të Kosovës”. (Ndërtesa e Kuvendit, salla 506, ora 14:00)

- Mbahet mbledhja e Kryesisë së Kuvendit me kryetarët e grupeve parlamentare lidhur me shqyrtimin e kërkesës për mbajtje të seancës së jashtëzaknshme rend dite shqyrtimi i Projektligjit për ratifikimin e Marrëveshjes për Kufirin Shtetëror në mes të Republikës së Kosovës dhe Malit të Zi. (Ndërtesa e Kuvendit, salla  C-301, ora 16:00)