12 Gusht 2022

56.38% e grave kanë fituar mandatin pa kuotë në Kuvendet Komunale

Prishtinë, 1 korrik - Në zgjedhjet lokale të vitit 2021, Kuvendet Komunale janë transformuar dukshëm nga përfaqësimi i grave, ku 56.38% e tyre kanë fituar mandatin pa kuotë gjinore.

Kjo u bë e ditur në konferencën e organizuar nga Instituti Kosovar për Qeverisje Lokale (KLGI) me temën “Ndikimi i ndryshimeve të Kuvendeve Komunale në kualitetin e politikave lokale”, ku publikua hulumtimi mbi pasqyrimin e përbërjes së Kuvendeve Komunale.

Në fjalën hyrëse të konferencës, Drejtori Ekzekutiv i Institutit KLGI, Valmir Gashi, theksoi se ky dokument, do  t’u shërbejë akterëve që merren me qeverisjen lokale, organizatave vendore dhe ndërkombëtare, politikbërësve dhe vendimmarrësve.

Raporti nxjerr disa statistika interesante sa i përket përfaqësimit në kuvende komunale, siç janë numri i madhe i të rinjve që janë për herë të parë në kuvend, të rinjve në kuvende komunale dhe ajo që është më e rëndësishme, përfaqësimi i grave, të cilat rreth 60% e tyre kanë fituar mandatin pa pasur nevojën e kuotës.

Ndërsa, Ferdi Kamberi, nga Ministria e Administrimit të Pushtetit Lokal, theksoi rëndësinë e këtij hulumtimi duke nënvizuar se është prej pikave më të rëndësishme për të parë përbërjen e Kuvendeve Komunale, njëherësh qasje e duhur për të diskutuar mes akterëve për problemet, sfidat dhe orientimet për të ardhmen.

Duke prezantuar hulumtimin, menaxheri i Programeve në Institutin KLGI, Besnik Muçaj, nënvizoi se nga zgjedhjet lokale të fundit, ka ndodhur një transformim i Kuvendeve Komunale nga përfaqësimi i grave.

Megjithatë, theksoi se një analizë e tillë shërben për të matur mjedisin institucional të Kuvendeve Komunale e kapaciteteve të këshilltarëve komunalë.

Dokumenti analizon përbërjen Kuvendeve Komunale në Republikën e Kosovës, duke marrë parasysh disa faktorë si: moshën, mandatin dhe gjininë.

Megjithatë, ky hulumtim, si faktor kontribuues, ka përfshirë edhe ndryshimet në Kuvendet Komunale, duke krahasuar numrin e mandateve për komuna. Pra, dokumenti pasqyron përbërjen dhe strukturën e Kuvendeve Komunale për mandatin 2021-2025.

Për më tepër, hulumtimi trajton mjedisin politik, institucional dhe të funksionimit të Kuvendeve Komunale; analizon, krahason aspekte kuantitative, ndër mandate dhe mes dy mandateve 2017-2021, duke reflektuar ndryshimet në moshë, në rizgjedhje (mandatarët e rinj), si dhe pasqyrimin në aspektin gjinor.


Kalendari

Ngjarjet e datës 12 gusht 2022

 - Kryeministri i Republikës së Kosovës, Albin Kurti, bashkë me ministrin e Financave, Punës dhe Transfereve, Hekuran Murati, vizitojnë Doganën e Kosovës. (Drejtoria e Doganës, ora 8:30)

- Kuvendi nëpërmjet Grupit të Deputetëve të Rinj shënon Ditën Ndërkombëtare të Rinisë. (Salla plenare, ora 10:00)

- Komuna e Rahovecit organizon takimet B2B në kuadër të aktiviteteve të Muajit të Mërgimtarëve. (Restaurant Ura e Shenjtë, ora 10:00)

- Nisma e të Rinjve për të Drejtat e Njeriut – Kosovë ((YIHR KS) shënon Ditën Ndërkombëtare të Rinisë me një aksion rrugor me slloganin “Kur bohet mirë?!” (Sheshi “Nënë Tereza”, ora 12:00)

- Avokati i familjes Dehari, Tomë Gashi, mban konferencë për medie në lidhje me rastin e vdekjes së aktivistit të VV-së, Astrit Dehari. (Zyrat e Tomë Gashit, mbi Kino ABC, ora 12:00)

- Kryeministri i Republikës së Kosovës, Albin Kurti, bashkë me ministrin e Financave, Punës dhe Transfereve, Hekuran Murati, vizitojnë kompaninë “Rroni Fer” Sh.P.K. (Magjistralja Gjakovë-Prizren_kilometri i dytë, Objekti i ish-ndërmarrjes “Metaliku”, Gjakovë, ora 14:30)

- Qendra për Këshillim, Shërbime Sociale dhe Hulumtime organizon Festivalin e Rinisë për nder të Ditës së Rinisë. (Lagjja Taukbashqe, ora 18:00)

- Mbahet edicioni i parë i festivalit “MAL FEST”, i cili synon të jetë tradicional dhe objektiv e ka rininë dhe mërgatën e Komunës së Malishevës. Festivali organizohet nga Komuna e Malishevës në bashkëpunim me  organizatën “Values for Better Future”.(parku i qytetit në Malishevë, ora 19:00)

- Në kuadër të Akademisë Verore ‘’Arbën Xhaferi"  mbahet panel diskutimi me deputetët e rinjë të Kuvendit të Kosovës lidhur me rolin dhe rëndesin e të rinjëve në politikë. (Akademia për Siguri Publike të Kosovës, ora 19:30)