19 Nëntor 2019

Qeveria e Kosovës – pengesë edhe për shqiptarët në Zvicër

Shkruar nga Lëvizja VETËVENDOSJE!


Qeveria e Kosovës nuk ka ndikim vetëm në Kosovë. Shtrirja e ndikimit të saj e ka arritur edhe Zvicrën. Për fatkeqësinë e shqiptarëve atje. Ashtu siç shtrirja e kësaj qeverie përbrenda Kosovës është dëshmuar të jetë fatkeqësi e shqiptarëve këtu. Zvicra e ka paralajmëruar Qeverinë e Kosovës se do ta shkëpus marrëveshjen për sigurimet shoqërore, marrëveshje kjo e cila ishte trashëguar qysh nga kohërat e Jugosllavisë. Zvicra e kishte paralajmëruar qeverinë e Kosovës, më saktësisht Vlora Çitakun si Zëvendësministre e Punëve të Jashtme, qysh në shtator të vitit të kaluar se do ta shkëpusin marrëveshjen në prill të këtij viti. Dhe qeveria e Kosovës nuk kishte ndërmarrë bërë as hapin më të vogël në drejtim të nënshkrimit të marrëveshjes së re.

Rrjedhimisht 170 mijë qytetarë të Kosovës të punësuar në Zvicër pas 1 prillit nuk do të kenë mundësinë që t’i gëzojnë të mirat e sistemit të sigurimeve shoqërore të Zvicrës, ta zëmë pensionin, po qe se vendosin që pleqërinë ta kalojnë në Kosovë, apo shtesat për fëmijë, po qe se vendosin që këta të shkollohen në Kosovë. Në të vërtetë i tërë sistemi i përkujdesjes sociale i Zvicrës do të jetë i gjymtuar për shqiptarët e Kosovës, të cilët, në mungesë të një marrëveshje të tillë, vendosen para dy alternativave: përkujdesje shoqërore në Zvicër apo kthim në Kosovë (ku nuk mund të kenë përkujdesje shoqërore nga Zvicra e aq më pak nga Kosova).

Arsyeja zyrtare e Zvicrës për shkëputjen e marrëveshjes është mungesa e një sistemi të tillë në Kosovë, si dhe pamundësia e kontrollit të abuzimeve të sigurimeve shoqërore zvicrane në vendin tonë. Por ky arsyetim është i padrejtë karshi këtyre 170 mijë shqiptarëve që punojnë në Zvicër. Pensioni është e drejtë e secilit person, dhe si i tillë ai është i patjetërsueshme pavarësisht rrethanave. Për më tepër, shqiptarët të cilët rrezikojnë të mos kenë mundësi ta gëzojnë pensionin në Kosovë kanë kontribuar në sistemin e sigurimeve shoqërore të Zvicrës. Pamundësia për ta kthyer këtë kontribut në të mira për vete është padrejtësi e dyfishtë, marrë parasysh se punëtorët shqiptarë as frytet e plota të punës së tyre nuk arrijnë t’i gëzojnë në Kosovë pasi që kjo punë është kryer në një vend tjetër. Ndërkohë që për sistemin e sigurimeve shoqërore në Kosovë nuk kemi çfarë të flasim. Mungesa e tij nuk na dëmton vetëm neve që jetojmë këtu, por tash edhe shqiptarët që jetojnë në Zvicër, vend ky me një sistem të avansuar sigurimesh.

Sindikata Unia nga Zvicra e cila brenda vetes ka një numër të konsiderueshëm të punëtorëve shqiptarë, në bashkëpunim me BSPK-në, kanë marrë nisiativën për nënshkrimin e një peticioni për ta kundërshtuar këtë padrejtësi që u bëhet punëtorëve shqiptarë, si dhe për t’i cytur të dy qeveritë ta nënshkruajnë marrëveshjen për sigurimet shoqërore. Ne e mbështesim këtë nisiativë, dhe thërrasim masivizimin e këtij peticioni. Interesat e punëtorëve shqiptarë kudo që ata punojnë janë edhe interesa tonat. Shqiptarët që punojnë në Zvicër kanë të drejtë ta zgjedhin vendin se ku dojnë të jetojnë pas pensionimit, dhe këtë zgjedhje të tyren nuk duhet ta bëjnë në kushtet e shtrëngimit financiar. Kjo në të vërtetë nuk është zgjedhje por imponim. Qeveria e Kosovës do të duhej që të punojë drejt sigurimit të lirisë nga financat për të gjithë qytetarët e Kosovës. Këtë jo vetëm që nuk po e bëjnë vet, por po i pengojnë edhe shtetet tjera ta bëjnë një gjë të tillë.
 

Kalendari

Ngjarjet e datës 19 nëntor 2019 - Banka Qendrore e Republikës së Kosovës organizon konferencën ndërkombëtare të nivelit të lartë me titull: “Rreziqet dhe mundësitë në një sektor financiar dinamik-rruga zhvillimore”, që do të mbahet në kuadër të shënimit të 20 vjetorit të themelimit të BQK-së. (Hotel Swiss Diamond, ora 8:30)

- Presidenti i Republikës së Kosovës, Hashim Thaçi, merr pjesë në shënimin e 20 vjetorit të themelimit të BQK-së. (Hoteli Swiss Diamond, ora 9:00)

- Punëtorët teknik të qendrës studentore, punëtorët teknik të disa shkollave që menaxhohen nga komuna e Prishtinës, punëtorë teknik të Universitetit të Prishtinës, punëtorë të sigurimit fizik të UP-së dhe QMF-ve, punëtorët teknik të disa shkollave në Gjilan do të ndalin punën e tyre në shenjë pakënaqësie për pagën e tyre të ulët. (Protesta mbahet ne vendete e tyre te punës, ora 10:00)

- Komuna e Rahovecit mban mbledhjen e njëmbëdhjetë e rregullt e Komiteti për Politik dhe Financa. (Objekti i Komunës së Rahovecit, ora 10:00)

- Zyra e BE-së në bashkëpunim me Këshillin Gjyqësor të Kosovës do të organizojë një vizitë në Gjykatën Themelore në Prishtinë në të cilën do të diskutojë për zhvillimet dhe arritjet në operacionalizimin dhe digjitalizimin e bazës kombëtare të të dhënave të evidencës penale, e zbatuar nga Sistemi qendror kombëtar i evidencës penale. (Gjykata Themelore e Prishtinës, ora 10:15)

- Mbahet ceremonia e ndërrimit të komandës në mes të Komandantit në largim të KFOR-it, gjeneralmajor Lorenzo D’addario dhe Komandantit në ardhje të KFOR-it, gjeneralmajor Michele Risi. (Kampi i Shtabit të Përgjithshëm të KFOR-it Film City, ora 10:30 - mediet duhet të arrijnë tek Porta kryesore e Kampit Film City jo më vonë se ora 9:30)

- Presidenti Thaçi dhe Kryeministri në detyrë, Ramush Haradinaj, merr pjesë në ceremoninë e ndërrimit të Komandës së KFOR-it. (Film City, ora 10:25)

- Guvernatori i Bankës Qendrore të Republikës së Kosovës, Fehmi Mehmeti dhe Zëvendësdrejtori i Fondi Monetar Ndërkombëtar, Tao Zhang mbajnë konferencë për media. (Swis Diamand Hotel, ora 10:45)

- Zyra e UNICEF-it në Kosovë do të mbajë aktivitet me fëmijët në kuadër të shënimit te 30 vjetorit të Konventës për të Drejtat e Fëmijës. (Sheshin “Zahir Pajaziti”, ora 14:00)

- Kryeministri në detyrë, Ramush Haradinaj, pret në takim ministrin e Mbrojtjes të Italisë, Lorenzo Guerini. (Ndërtesa e Qeverisë, ora 14:00)

- Forumi për Iniciativa Qytetare FIQ organizon publikimin e analizës së Legjislacionit të Kosovës lidhur me Filantropinë dhe OJQ-të, me autor Qerkin Berisha. (Zyret e FIQ, Resource Center në Pejton, ora 14:00)

- Ambasadorja e Francës, Marie-Christine organizon pritje ku do të dekorojë znj.Blerta Zeqiri, ''Kalorëse në Urdhrin e Artit dhe Letërsisë''. (Rezidenca e Francës, ora 18:30)

- HANDIKOS organizon ceremoninë e hapjes së  ekspozitës me fotografi  “EmbraceMe-Kosovo”, me portrete nga jeta e nëntë personave nga Kosova, të punuara nga fotografja holandeze Karin Brongers. (Shtëpia e Evropës, ora 19:00)