20 Gusht 2019

Patriotët e leshit dhe kurvat politike të kurveleshit

Shkruar nga Behxhet Sh. Shala - Bajgora

Po ku je, Adem Demaçi: Adem Demaçi, siç e quajnë patriotët e leshit dhe kurvat politike të Kurveleshit, bëri më shumë se 28 vjet burg në llogoret e ish - Jugosllavisë së kriminelëve Tito dhe Millosheviq në kohën kur shumë të tillë që i kanë shërbyer Jugosllavisë dhe Serbisë, sot, në Kosovën e martirizuar janë bartës të posteve të larta politike dhe të cilët nuk i kanë merituar me asgjë përveç me shërbimin qençe ndaj atyre që kanë keqtrajtuar, arrestuar, dënuar dhe vrarë shqiptarë!

Këta maskarenj dhe injorantë e gëzojnë përkrahjen 100% të ish – patriotëve dhe ish- shokëve të Bacës Adem Demaçi siç e quajmë ne, që të zhveshur nga patriotizmi, së paku e kemi ruajtur një respekt për Bacën e Madh që na frymëzoi të zhagitemi rrugës së rëndë drejt lirisë, çlirimit dhe bashkimit kombëtar.

Baca Adem, sa ishim në burgjet e ish- Jugosllavisë, dikur si atdhedashës tash të shndërruar në karrieristë të paskrupullt, na mësoi dhe na bindi se burgu nuk është vuajtje por se është detyrë njerëzore, kombëtare dhe morale prandaj, të gjithë që e pranuam këtë filozofi, e kaluam burgun shumë lehtë përkundër torturave që ndaj nesh ushtronin paraardhësit biologjikë të disa këshilltarëve të Hashim Thaçit, Ramushit dhe Kadrisë.

 Baca na mësonte se në rrugën drejt lirisë nuk ka pengesa të pakapërcueshme dhe se asnjë vështirësi nuk ia vlenë të përmendet përballë asaj që na takon ta bëjmë.

Kështu, burgun e kaluam bukur lehtë dhe, te së paku 90% e ish – të burgosurve politikë nuk kishte asnjë mëdyshje se si duhet të veprohet pasi të dalim nga një burg i vogël, në një burg të madh siç ishte Kosova.

Këtë Baca Adem e pati thënë në shumë raste, gjatë intervistave dhe takimeve të ndryshme. Shokët që e respektuan Bacën Adem nuk dështuan kurrë dhe nuk kishin si të dështonin sepse kishin kaluar nëpër një Akademi Jetësore Praktike, përvojat e së cilës nuk mund t’i ofronin të gjitha Akademitë botërore. 

Nuk mund të dështonin kurrë dhe asnjëherë; Rexhep Mala, Remzi Ademaj, Fehmi dhe Xhevë Lladrovci, Xhavit Haziri dhe Hafir Shala, Shaban Shala, Tahir Hani  dhe Skender Kastrati, Zahir Pajaziti, Shashivar Makolli dhe  Bajrush Behrami dhe qindra dhe mijëra heronjë dhe martirë të Kosovës që, pushtetin moral dhe kombëtar nuk e ndërronin me asnjë pushtet fizik dhe material për të cilën u bënë copë e grimë alamet luftëtarë dhe komandantë të luftës së fundit, disa edhe vet ish – të burgosur politikë !

 Baca Adem Demaçi asnjëherë nuk e deshti pushtetin prandaj nuk e sfidoi Rugovën duke na këshilluar të votojmë për të në zgjedhjet e para përkundër faktit që ish – të burgosurit politikë, në atë kohë ishin në kulmin e popullaritetit dhe, po të donte Baca Adem, skena politike do të përçahej shumë keq aq më parë që në radhët e LDK-së, përkatësisht në majat e saj kishte shumë torturues të shqiptarëve liridashës, zyrtarë të lartë komunistë të Jugosllavisë dhe Serbisë, udbash  dhe hetues policorë, prokurorë dhe gjyqtarë që e kishin dënuar edhe vet Bacën Adem si dhe  të atillë që kishin vrarë patriotë shqiptarë, në Kosovë dhe diasporë.

 Ata, në fillim ishin bërthama e LDK-së e pastaj, ose ata vet, ose bijtë dhe bijat e tyre u sistemuan si më së miri të ish liderët e UÇK-së, të konvertuar në politikanë dhe bartës të posteve të larta.

Dashuria dhe respekti nga një distancë e sigurt : Bacën Adem kurrë nuk e trajtuan në përputhje me sakrificën dhe kontributin kombëtar, përkundrazi, është personaliteti që më së shumti u keqtrajtua pikërisht nga ata  që kanë pasur detyrim ta përkrahin dhe mbështesin.

 Në Akademinë e Shkencave dhe të Arteve të Kosovës e përbërë kryesisht nga komunistët sllavë të LDK-së dhe disa analfabetë të krahut të luftës, kurrë nuk u gjet një vend për Bacën Adem Demaçin përveç se organizuan fushata të ndyra kundër Bacës.

Në asnjë legjislaturë të Kuvendit të Kosovës, kurrë nuk u lejua që Baca Adem ta ketë një pozitë qoftë edhe nderi e lëre më të jetë deputet ndonëse aty kishte deputetë që tërë kohën, vet dhe me kotillën e tyre kishin punuar kundër shqiptarëve dhe në dobi të serbëve, rusve, grekve dhe “ miqve “ të mëdhenj të shqiptarëve.

Nuk ka mbetur kush pa folur dhe pa përrallisur para deputetëve të Kuvendit të Kosovës duke iu organizuar edhe seanca solemne por, asnjëherë nuk i ishte mundësuar Bacës Adem t’iu drejtohet të “ zgjedhurve “ të popullit dhe qytetarëve të Kosovës, Asnjëherë, merreni me mend!

Kur, me një propozim të Bleron Baraliut, Baca  Adem pranoi të hyjë në garë për president të Kosovës për ta sfiduar patriotin e madh të Kazakistanit, Gjet Pacollin, ata që pritej ta përkrahnin më së shumti, edhe e penguan me çdo mjet dhe me çdo kusht mundësinë që Baca të bëhej president i Kosovës, jo pse vdiste për këtë post por se nuk e donte të fuqizohej ndikimi i Rusisë dhe Serbisë në Kosovë, përmes bajpasit Kazakistan; Albini e kushtëzoi përkrahjen për Bacën me zotimin e Bacës se do ta rrëzonte  nga pushteti Hashim Thaçin, mbase për të ardhur vet në pushtet e që Baca nuk pranoi kushtëzimin kurse, Hashim Thaçi – Pehlivani, siç e quante Baci e angazhoi krejt Zonën Operative të Drenicës, ambasadorin Dell dhe rrugaçin Pushikar në përkrahje të patriotit të Kazakistanit dhe në kundërshtim të Bacës Adem.

Në atë kohë PDK, si parti e krahut të luftës e luajti një rol prej kurve politike duke u rreshtuar në anën e Pacollit. Në mos e tëra, atëhera pjesa më e madhe e saj.

Dhe, me tërë këtë përkrahje, Pacolli jo që do të bëhej president i Kosovës por do të bëhej edhe president i Amerikës.

Përndjekja ndaj Bacës ka vazhduar me intensitet të luhatshëm, varësisht nga situata politike. Por gjithmonë kundër Bacës në ndërkohë që thirreshin në emër të Bacës !

Realisht u krijua një përshtypje se  me Bacën Adem po manipulon krahu i luftës  e që nuk ishte fare e vërtetë; nuk ka pasur bir nëne apo politikë që ka mundur ta manipulojë Bacën Adem por Baca, për interes kombëtar dhe shtetërorë ka qenë në gjendje të bëjë çdo gjë që është kërkuar nga ndërgjegja dhe vetëdija e tij e lartë njerëzore dhe kombëtare.

Baca Adem ka dhënë prova që nuk i kishte dhënë asnjë lider apo lideruc shqiptar dhe kosovar. Po i përmendi vetëm disa :

1.    E pranoi udhëheqjen politike për UÇK-në në kohën kur asnjëri nuk kishte guxim të bënte këtë.

2.    Nuk pranoi të shkonte në Rambuje për të “ biseduar “ për 8 pikët e panegociueshme ku garantohej autonomia substanciale, asgjë më shumë.

3.    Dha dorëheqje nga Përfaqësuesi Politik i UÇK-së sepse, sipas Bacës, nuk donte të bëhej “ shef i pisarnicës “ të disa injorantëve që nuk merrnin vesh në politikë ndërsa kishin pretendime se ishin më të zotët se vet Winston Churchilli.

4.    Nuk e pranoi ofertën mashtruese të Bernard Kushnerit për pajtim të pakushtëzuar me Serbinë sepse parashtroi kushte krejtësisht normale dhe, të cilat, Kushneri tha se nuk janë të pranueshme për Serbinë

5.    Ia bëri 8 me 2 Vuk Drashkoviqit në Beograd duke ia thënë fjalët që disa trimosha të sotit nuk kanë pasur guxim t’ia thonë as vetës së tyre

6.    U angazhua për të drejtat e pakicave në Kosovë kur ato ishin të rrezikuara duke kaluar në anën e tyre në kohën kur disa që bartnin apo kanë poste politike e akuzonin se do ta kolonizojë Kosovën me serbë.

7.    E pushkatuan për Rambujenë, Olbrajti, Surroi, Kadareja, krejt LDK –ja dhe një pjesë karrieriste e krahut të luftës, skajshmërisht të kriminalizuar dhe të korruptuar .

8.    E pushkatuan në Beograd kur nuk e ndante mendjen me Gelbartin, Rugovën dhe Holbrukun se UÇK – ë është organizatë terroriste dhe jo ushtri çlirimtare.

9.    Dha dorëheqje të menjëhershme nga kryetari i Bordit të RTK-së kur një politikan i shthurur kombëtarisht dhe moralisht ia censuroi fjalën në një manifestim.

Për mua mbeti emblematik dhe këso personalitete, së bashku me Adem Jasharin lindin një herë në njëmijë (1000) vjet. Ndërkaq hashima, behxheta, begjeta, isa dhe pisa lindin për çdo ditë, madje më mirë do të ishte të mos lindnin fare !

Turpi i të jetuarit dhe krenaria e përjetësisë: Si çdo qenie e krijuar nga Zoti e që vjen në këtë botë me një mision të caktuar, edhe Bacës Adem i qe shkruar ta çojë deri në fund sakrificën për liri, çlirim dhe bashkim kombëtar duke u flijuar deri në vetëmohim me të cilin, shumë vetë pameritueshëm kanë përfituar dhe e kanë sulmuar.

Në mesin e vdekatarëve të rëndomtë vlerësohet jetëgjatësia fizike dhe mënyra e të jetuarit që nënkupton një grykësi të pashembullt.

Këta janë frikacakë që nuk kanë as një të sotme e lëre më një të ardhme. Këta bëhen numër në statistikat e përgjithshme kur duhet të çregjistrohen nga lista e përfituesve të pensionit.

Këta nuk i përmend askush, pasi të shkojnë nga kjo botë! Këta janë shumica në botë dhe në Kosovë. Janë shumica absolute.

Janë kufoma të gjalla të mbështjellura me çefinët e markave më të njohura që lakmojnë shkëlqimin e kamerave, gostitë ku rrasen së ngrëni, shfrytëzimin e gjendjes së njerëzve në nevojë !

Këta janë patriotët e leshit, të shoqëruar me kurva të Kurveleshit ! Të gjitha këto i bëjnë nën petkun e patriotit, çlirimtarit dhe kalamarit ! Këtyre nuk iu intereson përmbajtja, sepse nuk e kanë por u intereson dukja !

Ose, siç thoshte gjeniu Lasgush Poradeci, nga plehrat dalin plehra ! Ndërkaq, kalorësit e përjetshëm të lirisë, asnjëherë nuk ndalen, as në këtë botë e as në tjetrën. I tillë ishte dhe mbeti Bacë Adem Demaçi, Adem Jashari dhe të gjithë ata që e dhanë jetën për liri apo, edhe kur u fitua liria e ruajtën fytyrën, jo si pamje, por si vlerë.

 Këta janë ata që e fituan përjetësinë dhe jo që dikush ua ndau përjetësinë. Nuk ka asnjë dilemë midis asaj të qenit pjesë e përjetësisë dhe asaj të qenit kufomë e gjallë. Dikush këtë po e kupton ndryshe. U qoftë për hajr përcaktimi !

Parkingjet e Shpendit dhe siguria e qytetarëve: Shpend Ahmeti, gjatë fushatës elektorale, në mesin e shumë premtimeve dy prej tyre i kishte të forta; sigurinë e qytetarëve dhe sigurimin e parkingjeve, mbitokësore dhe nëntokësore.

Të parin e përmbushi plotësisht kurse të dytin vetëm pjesërisht. Për sigurinë e qytetarëve siguroi një armatë qejsh duke u nisur nga parimi se qeni është  miku më besnik ndaj njeriut.

Tash, sidomos në Prishtinë, një qen i regjistruar me numër në vesh e që identifikohet si qeni i Shpendit, kujdeset për sigurinë e qytetarëve të kryeqytetit përkatësisht, për çdo kokë banori në Prishtinë, përjashtuar këtu ardhacakët apo turistët njëditorë keni siguri në proporcion; një qen i Shpendit, për 8 banorë të kryeqytetit! Këtë siguri nuk e keni as në Washingtin, Vjen, Berlin, Londër apo gjetiu.

Sa i përket parkingjeve, ndërtimi i parkingut nëntokësorë te filozofiku apo Katedralja e Himë Govës duhet të përshpejtohet për faktin se Kisha Katolike ka hapur një qendër tregtare në kuadër të aktiviteteve shpirtërore prandaj ka nevojë për rritje të kapaciteteve; më pak për besimtarë (janë numër simbolokë) dhe më shumë për konsumatorë (numri i tyre po rritet). Deri atëherë mund ta shfrytëzoni, pa pagesë, parkingun alternativ te Varrezat e Dëshmorëve përkatësisht mund të parkoni veturat, kombibusët, kamionët apo qerret  te varri i Bacës Adem Demaçi, Heroit të Kosovës dhe Nderit të Kombit.

Turpi raftë mbi të gjithë juve ! Por edhe mbi neve, shokëve të sinqertë të Bacës Adem ! Shiheni edhe varrin e gjeneral Shaban Shalës; për më shumë se shtatë (7) vite, vetëm një dërrasë me emrin e tij. Marre e madhe, jo për pushtetin por për shokët e Shaban Shalës ku edhe unë bëjë pjesë !

Kuvendi i Kosovës dhe diberët e Jakovës: Në seancën e fundit të Kuvendit të Kosovës bëhej një luftë gladiatorësh, kush do të rruaj mjete më shumë për partinë, lagjen, fshatin, kushëririn apo votuesit potencialë. 

Në mungesë të Behgjet Pacollit, vetëm njëri prej tyre  reflektoi si duhej dhe rrezatonte nga sinqeriteti dhe ndershmëria; luftëtari i orëve të para të UÇK-së, intelektuali i madh i përmasave kombëtare, Komandant Kamishi apo, që më pak e njohin me emër dhe mbiemër , Bekim Haxhiu.

I njohur si luftëtar i shquar i luftës çlirimtare për çka edhe u bë Komandant Kamishi, gjatë luftës dhe intelektual  i shquar që po kontribuon në ndërtimin e paqes në ngritjen e brezave të rinj si ligjërues ekselent në Fakultetin e Mjekësisë, me tituj akdemikë dhe shkencorë e ka edhe një shpirt sportisti sipas parimit, në trupin e shëndoshë, mendja e shëndoshë. Këtë e dëshmoi edhe në mbledhjen e fundit të Kuvendit kur pamëshirshëm dhunohej Buxheti i Kosovës.

Ai, në mbrojtje të sportit propozoi që, në qendër të Prishtinës të ngrihet shtatorja e Fadil Avdullah Vokrrit, ish-futbollistit të shquar dhe lobistit për pranimin e Federatës së Futbollit të Kosovës në FIFA.

Në kërkesën e tij ishte shumë modest duke kërkuar një shumë simbolike prej 200.000 eurosh e që u pranua nga Kuvendi i Kosovës.

Prishtinës i duhet edhe Fadil Vokrri sepse ka kontribuar më shumë për Kosovën se përmendorja para Kuvendit.

 I duhen edhe disa përmendore si ajo e Aganit, Rrahman Morinës dhe Azem Vllasit, madje për së gjalli. Prishtina nuk ka nevojë për përmendore të Bacës Adem Demaçi dhe komandantit legjendar, Adem Jashari. Marre ju qoftë, jo krahut të luftës prej të cilëve as që kam pritur të dalin me një propozim të tillë.

 Ndërgjegja është në pyetje, vëlla. Më ka befasuar shumë keq Ismet Beqiri sepse kam pritur se ai do të flasë në emër të heronjve të kombit dhe vlerave kombëtare.

Për shkak të së kaluarës së tij e sidomos së tashmes ! Bravo Bekim Haxhiu, kamish mbi këto llullat qyqare; dëshmove patriotizëm dhe intelektualizëm.

Moti ka përfunduar lufta, jeta e ëmbël është më e mirë se kujtimet e hidhura. JU, HORRA TË HORRASANIT DHE PATRIOTË TË KAZAKISTANIT ! 

Kalendari

Ngjarjet e datës 20 gusht 2019 - Ministri i Tregtisë dhe Industrisë, Endrit Shala do ta takojë ministrin e Ekonomisë së Maqedonisë së Veriut, Kreshnik Bekteshi. (Holli i Ministrisë së Tregtisë dhe Industrisë, ora 9:30)

- Oda Ekonomike Amerikane në Kosovë organizon tryezën për gjendjen e prodhimit në Kosovë ku do të diskutohen rekomandimet ndaj Qeverisë së re rreth zhvillimit të mëtutjeshëm të sektorit të prodhimit, me panelistë përfaqësues të bizneseve prodhuese në vend. (Hotel Sirius, ora 9:55)

- Në Gjilan fillon implementimi i programit “Shkollat e Shekullit 21”, i cili mbështetet nga Qeveria e Britanisë, i dizajnuar nga British Council. (Salla e Kuvendit Komunal, ora 11:00)

- Instituti Demokratik I Kosovës / Transparency International Kosova organizon konferencën për media gjatë të cilës do të shpalosën të gjeturat e hulumtimit pilot mbi transparencën e kryeqyteteve evropiane, ku mes 27 kryeqyteteve evropiane është vlerësuar edhe Prishtina. (Salla e konferencave të KDI, ora 12:00)

- Kryetari i Komunës së Prizrenit Mytaher Haskuka do të pret në takim anëtarin e Parlamentit Britanik, John Grogan ku pas takimit do të ketë edhe një konferencë të përbashkët për media. (Shtëpia e Bardhë, ora 13:00)

- Mbahet ceremonia e hapjes se festivalit të edicionit të 9-të të Festivalit të Arteve dhe Kulturës Tradicionale Etnofest. (Etnokompleksi i fshatit Kukaj, ora 18:00)

- Komuna e Prizrenit në kuadër të hartimit të buxhetit për vitin 2020 do të organizojë dëgjime publike me me banorët e rajonit të Zhurit, Vërrinit dhe Vërmicës me qëllim të angazhimit të tyre në procesin e hartimit të buxhetit, transparencës, gjithëpërfshirjes dhe llogaridhënies ndaj qytetarëve. (Shkolla fillore në Zhur, ora 19:00)

- Aleanca Franceze e Prishtinës, Kino Armata dhe Termokiss organizojnë së bashku edicionin e parë të festivalit "Kino nshehër". (Kino Armata te Sheshi, ora 20:00)