20 Gusht 2019

BE duhet t’i lejojë Kosovës udhëtimin pa viza

Shkruar nga Behgjet Pacolli

BE më në fund duhet të bëjë gjënë e duhur lidhur me premtimin e saj të shpeshtë për t’i lejuar Kosovës udhëtimin pa viza, thotë Behgjet Pacolli.

Behgjet Pacolli është Ministër i Punëve të Jashtme i Republikës së Kosovës.

Qytetarët e Maqedonisë, Serbisë, Malit të Zi, Bosnjës dhe Shqipërisë, të gjithë mund të udhëtojnë për në Evropë pa viza. Vendi im, Kosova, mbetet demokracia e vetme evropiane qytetarëve të të cilës iu mohohet kjo e drejtë.

Ne ende ballafaqohemi me situata të turpshme, ku duhet të aplikojmë për viza (që është një proces i kushtueshëm dhe që merr kohë) thjeshtë për të shkuar në pushim ose për të vizituar të afërmit.

Përfitimet e liberalizimit të vizave janë të shumta – nxitja e partneriteteve ekonomike, promovimi i kontakteve ndërkulturore, përmirësimi i shkëmbimeve profesionale dhe arsimore, e madje do të ndihmonte edhe në luftimin e rolit të kontrabandistëve me njerëzve, shërbimet e të cilëve nuk do të nevojiteshin më. Parimet që gjenden prapa liberalizimit të vizave janë ato të cilat Bashkimi Evropian deklaron se i vlerëson më së shumti – hapja, drejtësia dhe uniteti.

Kemi duruar mjaft duke shikuar se si qytetarët e të gjitha shteteve fqinje të Kosovës kanë fituar të drejtën të udhëtojnë lirisht në zonën Shengen për një periudhë deri 90 ditore. Duke pasur parasysh që 84% e kosovarëve janë të mendimit se anëtarësimi në BE është një gjë e mirë për vendin e tyre, BE nuk mund ta konsiderojë të huaj popullin tonë entuziast. Ka mjaft shumë kriza në Evropë dhe nuk është në të mirë të askujt krijimi i një krize të re.

Para pak kohe kam vizituar Berlinin dhe shumë kryeqytete tjera të BE-së për të lobuar për heqjen e vizave për qytetarët e Kosovës dhe për të arsyetuar përfitimet që do të sillte një vendim i tillë. Ishte inkurajuese përkrahja e fuqishme që na dhe kolegu im Michael Roth, Ministri për Evropën i Gjermanisë.

Marrëdhëniet e Kosovës me BE-në për neve janë strategjike, njësoj si është rajoni i Ballkanit strategjik për BE-në. Kjo është një mundësi e mirë për BE-në që të dëshmojë udhëheqje globale duke adresuar çështjet që janë në ‘oborrin’ e saj. Kosova dhe Ballkani janë një test për kredibilitetin e BE-së dhe për pozitën e saj ndërkombëtare.

Prandaj, u bëj thirrje udhëheqësve evropian të validojnë rekomandimet pozitive të bëra nga Komisioni Evropian më 18 korrik të vitit që shkoi, dhe që janë kaluar nga Parlamenti i BE-së, ku konfirmohet se të gjitha kërkesat janë plotësuar. Krejt çka mbetet është që Këshilli Evropian të miratojë propozimin e Komisionit, për t’i dhënë fund trajtimit të padrejtë që na është bërë.

Ne dëgjojmë se disa shtete anëtare kanë shqetësime lidhur me migrimin e parregullt, dhe që votat kundër të Deputetëve të Parlamentit Evropian nga Franca, Holanda dhe Qipro janë reflektim i opinionit të qytetarëve të tyre përkatës.

Megjithatë, siç edhe demonstrojnë votat pozitive në Komision dhe në Parlament, Kosova ka zhvilluar të gjitha kornizat e nevojshme për ta trajtuar këtë çështje, dhe shumë çështje tjera. Nuk ka asnjë dyshim se në secilën fazë janë plotësuar kërkesat përkatëse. Ky proces, i cili filloi në vitin 2012, është marrë me shumë seriozitet nga të gjithë partnerët. Ne i kemi arritur 95 caqet që kanë të bëjnë me migrimin, menaxhimin e kufijve dhe sigurimin e të drejtat themelore. Para pak kohe, Komisioni njohu sukseset tona të mëdha në luftën kundër krimit të organizuar dhe korrupsionit.

Tani duhet ta kalojmë edhe pengesën e fundit. Kam besim se zëri jonë do të dëgjohet, pasi që BE e di se liberalizimi i vizave nga Këshilli Evropian do të sillte përfitime për të gjithë. Në veçanti për të rinjtë e Kosovës, të cilët përbëjnë 60% të popullsisë. Për këta kosovarë, e ardhmja evropiane është e vetmja e ardhme që shohin dhe e vetmja e ardhme që dëshirojnë. Vonimi i mëtejmë i vendimit nuk do t’i shërbente interesave të BE-së, një gjë e tillë do të dëmtonte rëndë besueshmërinë e premtimeve të saj.

Ne e kuptojmë që me zgjedhjet e reja Evropiane dhe ndryshimet në udhëheqjen e Komisionit, si dhe me një numër të zgjedhjeve parlamentare në shtetet anëtare, liberalizimi i vizave për Kosovën nuk është në krye të agjendës. Megjithatë, kjo nuk është arsye e mjaftueshme – shtetet anëtare të BE-së duhet të marrin në konsideratë aspiratat e vendeve që janë jashtë BE-së, por me vështrim brenda saj, dhe ta shfrytëzojnë këtë mundësi për të ruajtur optimizmin për atë që mund ta ofrojë BE-ja.

Shtetet Anëtare nuk duhet të lejojnë që frika nga një ndjenjë popullsitë të kontrollojnë vendimet e tyre sidomos pas progresit të arritur e të merituar nga evropianët. Për më tepër, migrimi i parregullt është një shqetësim për të gjithë neve – të cilin mund ta trajtojmë së bashku – dhe të mos ta ndërlidhim me qytetarët, që i binden Ligjit dhe të cilët dëshirojnë të zgjerojnë horizontet e tyre në mbarë kontinentin pjesë e të cilit ndihen se janë.

Shumë deputetë evropian kanë ngritur zërin në përkrahje të liberalizimit të vizave, dhe kanë inkurajuar Këshillin, që të ndërmarrë hapa aktiv për miratimin e finalizimit. Kjo mbështetje vlerësohet lartë, por për të arritur pragun e caktuar, duhet që vet politikanët kombëtar të bëjnë thirrje dhe të pranojnë se ne kemi punuar pa pushim që t’i përmbushim të gjitha kriteret e kërkuara.

Tani është koha e duhur për të bërë gjënë e drejtë dhe të duhur duke shpërblyer këto angazhime. Kur bëhet një premtimi ai duhet edhe të nderohet.
 
 


 

Kalendari

Ngjarjet e datës 20 gusht 2019 - Ministri i Tregtisë dhe Industrisë, Endrit Shala do ta takojë ministrin e Ekonomisë së Maqedonisë së Veriut, Kreshnik Bekteshi. (Holli i Ministrisë së Tregtisë dhe Industrisë, ora 9:30)

- Oda Ekonomike Amerikane në Kosovë organizon tryezën për gjendjen e prodhimit në Kosovë ku do të diskutohen rekomandimet ndaj Qeverisë së re rreth zhvillimit të mëtutjeshëm të sektorit të prodhimit, me panelistë përfaqësues të bizneseve prodhuese në vend. (Hotel Sirius, ora 9:55)

- Në Gjilan fillon implementimi i programit “Shkollat e Shekullit 21”, i cili mbështetet nga Qeveria e Britanisë, i dizajnuar nga British Council. (Salla e Kuvendit Komunal, ora 11:00)

- Instituti Demokratik I Kosovës / Transparency International Kosova organizon konferencën për media gjatë të cilës do të shpalosën të gjeturat e hulumtimit pilot mbi transparencën e kryeqyteteve evropiane, ku mes 27 kryeqyteteve evropiane është vlerësuar edhe Prishtina. (Salla e konferencave të KDI, ora 12:00)

- Kryetari i Komunës së Prizrenit Mytaher Haskuka do të pret në takim anëtarin e Parlamentit Britanik, John Grogan ku pas takimit do të ketë edhe një konferencë të përbashkët për media. (Shtëpia e Bardhë, ora 13:00)

- Mbahet ceremonia e hapjes se festivalit të edicionit të 9-të të Festivalit të Arteve dhe Kulturës Tradicionale Etnofest. (Etnokompleksi i fshatit Kukaj, ora 18:00)

- Komuna e Prizrenit në kuadër të hartimit të buxhetit për vitin 2020 do të organizojë dëgjime publike me me banorët e rajonit të Zhurit, Vërrinit dhe Vërmicës me qëllim të angazhimit të tyre në procesin e hartimit të buxhetit, transparencës, gjithëpërfshirjes dhe llogaridhënies ndaj qytetarëve. (Shkolla fillore në Zhur, ora 19:00)

- Aleanca Franceze e Prishtinës, Kino Armata dhe Termokiss organizojnë së bashku edicionin e parë të festivalit "Kino nshehër". (Kino Armata te Sheshi, ora 20:00)