25 Shkurt 2021

Shënohet 31 vjetori i grevës së minatorëve të “Trepçës”

Prishtinë, 20 shkurt - Me rastin e 31 vjetorit të grevës së minatorëve të Trepçës, e cila shënon ngjarjen historike të minatorëve, jo vetëm të “Trepçës”, por të tërë Kosovës, në Stantërg u mbajt manifestimi qendror “Java e Minatorëve”.

Përveç minatorëve grevistë dhe atyre aktual, në këtë manifestim mori pjesë kryeministri i Kosovës, Albin Kurti, kryetari i komunës, Agim Bahtiri, kryetarja e Kuvendit të Kosovës, Vjosa Osmani, përfaqësues të ministrive, deputetë të Kuvendit të Kosovës, drejtorë dhe asamblistë të Kuvendit Komunal të Mitrovicës.

Me këtë rast kryeministri i Kosovës, Albin Kurti, potencoi se greva e minatorëve është një ngjarje e cila shënoi një epokë të re, të cilën vazhdojmë ta kujtojmë me rezistencën e jashtëzakonshme të 1300 minatorëve.

“Minatorët ishin minatorë me profesion, por ishin edhe avokat me pasion, minatorë sepse duhet të krijonin të ardhura për familjet e tyre, ndërkaq avokat sepse kishin marrë mbi supet e tyre mbrojtjen e popullit shqiptar duke e pasur parasysh faktin sepse ata kishin njohuri shumë të thella mbi sistemin e atëhershëm, dhe kështu nuk i duruan padrejtësitë të cilat iu bënë gjatë asaj kohe. Ne e konsiderojmë që Trepça është një thesar publik dhe ne si qeveri nuk do të ndalemi dhe do të punojmë fort në mënyrë që t’ia kthejmë namin gjigandit “Trepça”, tha kryeministri Kurti.

Në fjalën e tij kryetari i komunës, Agim Bahtiri, theksoi se është kënaqësi e veçantë që ndodhet në mesin e minatorëve, për të kujtuar njërën nga ngjarjet më të rëndësishme historike të rrugëtimit të Kosovës dhe qytetarëve të saj drejt lirisë dhe pavarësisë.

“Para 31 vitesh ju ishit ata të cilët e kundërshtuat sistemin e atëhershëm jugosllav, sistem që tentonte të na copëtonte dhe të mohonte të drejtat tona. Pas gjithë atyre vuajtjeve të cilat padrejtësisht iu bënë popullit tonë dhe minatorëve të Trepçës, ka ardhur koha tani me qeverisjen e re të udhëhequr nga kryeministri Kurti, të largohet korrupsioni dhe të gjitha parregullsitë që kanë ndodhur në të kaluarën, në mënyrë që ti kthehet dinjiteti minatorëve dhe Minierës “Trepça”, tha ndër të tjerash kryetari Bahtiri.

Ndërsa kryetarja e Kuvendit të Kosovës, Vjosa Osmani, theksoi se minatorët e Trepçës e donin Republikën, prandaj e ngritën fuqishëm zërin ndaj okupuesit dhe kundër ndryshimeve kushtetuese te asaj kohe.

“Ngjashëm edhe sot, minatorët dëshirojnë mbrojtjen e pavarësisë se Kosovës, integritetin territorial, sovranitetin e vendit dhe dinjitetin qytetar. Falë kësaj sakrifice dhe vlerave të cilat na udhëhoqën e që përkrah nesh i rreshtuan shtetet demokratike të botës, kjo ëndërr është realizuar dhe pavarësia e Kosovës është e pakthyeshme. Trepça është e paprekshme”, tha kryeparlamentarja Osmani.

Kalendari

Ngjarjet e datës 25 Shkurt 2021

- Projekti “Përkrahje e BE për Konkurrueshmërinë e Sektorit Kosovar të TIK”, financuar nga BE dhe implementuar nga WEglobal në konsorcium me Prishtina REA dhe në bashkëpunim me Ministrinë e Ekonomisë dhe Ambientit, organizon ceremoninë e certifikimit për rundin e parë të programit trajnues për shkathtësi digjitale dhe të TIK. (Hotel Amazona në Milloshevë, ora 9:45)

- Mbahet mbledhja e dytë e rregullt për vitin 2021 të Kuvendit Komunal të Prizrenit. (Salla për mbledhjet e Kuvendit të Komunës, tek “Shtëpia e Bardhë”, ora 10:00)

-  Mbahet mbledhja e dytë e rregullt për vitin 2021 e Kuvendit të Komunës së Prizrenit. (Salla për mbledhjet e Kuvendit në Shtëpinë e Bardhë, ora 10:00)

- Rrjeti i Pajtimit KOMRA (RrPK) prezanton rezultatet e hulumtimit të vendeve të paraburgosjes në Bosnje dhe Hercegovinë dhe të personave të zhdukur në lidhje me luftën në Kosovë. Pjesëmarrës Natasha Kandiq, Bekim Blakaj etj. (Zoom, ora 11:00)

- Mbahet dëgjimi publik në lidhje me raportin e vlerësimit të ndikimit në mjedis për ndërtimin e hidrocentralit “EcoDri” në lumin Drini i Bardhë. (Restorant “Ura” në Dobrushtë, ora 11:00)

- Organizata për Rritjen e Cilësisë në Arsim publikon "Raportin e Monitorimit të Këshillit Shtetëror të Cilësisë 2" ku do të publikohen të dhëna nga procesi i akreditimit gjatë vitit 2020, si dhe informata të tjera të rëndësishme rreth sfidave me të cilat është përballur Agjencia e Kosovës për Akreditim dhe Këshilli Shtetëror i Cilësisë. (Zyrët e ORCA's, ora 13:00)

- Mbahet takimi i 196-të i Këshillit Prokurorial të Kosovës. (Takimi do të organizohet nëpërmjet videokonferencës, ora 13:00)