Teheran, 3 shkurt - Drejtori i planifikimit koorporativ i ndërmarrjes shtetërore të petrokimisë iraniane NIORDC, Arman Moghadam njoftoi se Irani ka nisur procesin e ndërtimit të 12 rafinerive të reja të naftës.

Agjencia e lajmeve “MEHR”, e cila është e afërt me kreun shtetëror, raporton se Moghadam ka theksuar se në Iran aktualisht në mbarë vendin janë aktive nëntë rafineri me kapacitet të përgjithshëm prej 1.73 milion fuçi nafte.

Ai shtoi se Irani ka 13 000 kilometra tubacion për transferimin e naftës dhe produkteve të naftës së papërpunuar.

\"Në vend operojnë më shumë se 5.500 pika karburanti, gaz të lëngshëm dhe gaz të kompresuar natyror\", tha Moghadam.

Ai gjithashtu tha se Irani duhet të optimizojë dhe të rinovojë rafineritë e naftës në periudhën pas sanksioneve ekonomike.

Irani synon të rigjallërojë sektorin e naftës dhe gazit, pas heqjes së sanksioneve me marrëveshjen bërthamore të arritur me vendet e P5+1 në korrik të vitit të kaluar.