12 Dhjetor 2018

Haradinaj: Qeveria do të mbetet partner i prodhuesve të veshmbathjeve

Prishtinë, 6 nëntor - Kryeministri i Republikës së Kosovës, Ramush Haradinaj mori pjesë në Konventën e Veshmbathjeve të Kosovës, organizuar nga USAID Empower Sektori Privat në partneritet me SIDA-n.

Kryeministri Haradinaj ka falënderuar partnerët ndërkombëtarë, sidomos USAID-in, që vazhdon të përkrah Kosovën. Poashtu, kryeministri ka premtuar përkrahje të Qeverisë për sektorin privat.

“Nga pikëpamja ime dhe nga ajo që Qeveria e Kosovës duhet të bëjë, mendoj se mund të kthehet në një partner të mirë të këtyre prodhuesve, të cilët jo vetëm që kanë arritur të krijojnë produktet e veta me të cilat ata aspirojnë të arrijnë tregun e vendit, por tani kanë filluar me këto produkte të arrijnë tregjet e jashtme”, theksoi kryeministri.

Kryeministri Haradinaj ka potencuar rëndësinë e përkrahjes së iniciativave të tilla dhe të vetë prodhuesve, në mënyrë që të sigurohet një treg për këto produkte.

“Bilanci tregtar i Kosovës nuk është i mirë. Ju e dini, importojmë shumë. Në industrinë e veshmbathjeve ka shumë potencial të pa shfrytëzuar. Ajo që në botë njihet si “Handmade”, pra e bërë me dorë, zakonisht është produkt i lakmuar dhe më i kërkuari. E di që në Kosovë shumica e atyre që prodhojmë janë punë e duarve të çmuara. Kjo është punë e njerëzve që vërtetë munden të jenë garues në tregjet botërore, andaj ju përgëzoj sot. Unë nuk do të përtoj të gjej mënyra, si Qeveri, me qenë afër prodhuesve të vendit”, theksoi kryeministri.

Ministri i Tregtisë dhe Industrisë, Bajram Hasani, tha se janë duke punuar me përkushtim në adaptimin e politikave stimuluese në mënyrë që të krijohet një ekosistem i përshtatshëm që do të ndihmonte dhe fuqizonte ndërmarrjet e vogla dhe të mesme, dhe rritjen e fuqisë së tyre konkurruese e cila pas fillimit të implementimit të MSA-së me BE-në, vjen në shprehje edhe më shumë.

Në Konventë folën edhe Lisa Magno, ushtruese e detyrës së Drejtorit të Misionit të USAID-it në Kosovë,  Goran Paulson, zëvendës shef i misionit nga Ambasada Suedeze dhe Bardha Sadrija, kryetare e Bordit të Shoqatës së Kosovës për Marketing të Veshmbathjeve.

Ndër të tjera, është theksuar se qëllimi i kësaj Konvente është avancimi dhe zhvillimi i industrisë së veshmbathjeve në Kosovë, dhe ofrimi i një platforme rrjetëzimi për këtë industri me agjencitë qeveritare, donatorët, blerësit ndërkombëtarë dhe të gjithë akterët tjerë relevant.

 

 

 

Kalendari

Ngjarjet e datës 12 dhjetor 2018 - Mbahet hapja zyrtare e projektit KosLift i cili mbështetet nga Ambasada Norvegjeze në Prishtinë dhe implementohet nga IPKO Foundation dhe RIT Kosovë. (Kampusi i RIT Kosovë, në Universitetin Amerikan, ora 9:30)

- Fondi për të Drejtën Humanitare Kosovë në kuadër të projektit "Mbështetja në procedimin e krimeve  të luftës të kryera gjatë luftës në ish-Jugosllavi" me partnerët Dokumenta nga Zagrebi dhe Fondi për të Drejtën Humanitare nga Beogradi organizon konferencën më temë 'Mbështetja  në procedimin e krimeve të kryera në luftëra të ish-Jugosllavisë'. (Hotel Sirius, ora 10:00)

- Let’s Do It organizon aksion pastrimi te “Tregu i Gjelbër” në Prishtinë. (Tregu i Gjelbër, rruga që e lidh me lagjen “Kalabria”, ora 10:00)

- Ministria e Administratës Publike organizon ceremoninë e vënies së gurthemelit për ndërtimin e Shkollës së Mesme të Muzikës dhe të institucionit parashkollor-Çerdhes në Prizren. (Lagjja “ Bajram Curri”, që gjendet përballë shkollës së mesme të mjekësisë “ Luciano Motroni” në Prizren, ora 10:00)

- Ministris së Shëndetësisë, Uran Ismaili raporton para Komisionit për Shëndetësi, Punë dhe Mirëqenie Sociale lidhur me procesin e revidimit të listës esenciale të barnave, vonesat në përmbushjen e agjendës legjislative dhe projeksionet buxhetore të Ministrisë së Shëndetësisë për vitin 2019. (Ndërtesa e Kuvendit, salla N 302, ora 10:00)

- Koordinatori Nacional për Kulturë, Rini dhe Sport në Qeverinë e Kosovës, Rexhep Hoti do të nënshkruajë marrëveshje bashkëpunimi me Kryetarin e Komunës së Gjakovës, Ardian Gjini. (Objekti i Komunës së Gjakovës, ora 10:00)

- Mbahet mbledhja e Komisionit për të Drejtat, Interesat e Komuniteteve dhe për Kthim në të cilën do të behët shqyrtimi i Projektligjit për Kinematografinë, shqyrtimi i Projektligjit për të drejtat e autorit dhe të drejtat e përafërta,etj. (Ndërtesa e Kuvendit, salla N 10, ora 10:00)

- Prezantohet kampanja informuese ”Kodi Civil qëndron për qytetarët e barabartë të Republikës së Kosovës,” organizuar nga projekti i financuar nga Bashkimi Evropian “Mbështetje Kodit Civil - faza 2”, i cili po mbështetët nga Ministrinë e Drejtësisë. (Hotel Ulpiana në Graçanicë, ora 10:30)

- Demokracia Plus dhe USAID organozijnë debat publik lidhur me prokurimin publik në Gjilan. (Hotel Kristal, ora 11:00)

- Lidhja Demokratike e Kosovës mban konferencë për medie. (Selia qendrore e LDK-së në kompleksin Qafa, ora 11:00)

- Let’s Do It në bashkëpunim me nxënësit e shkollës ‘’Hivzi Sylejmani’’ organizon aksion pastrimi në Fushë Kosovë. (Oborri i shkollës Hivzi Sylejmani, ora 11:55)

- Punëtorët e NTP “Pallati i Rinisë” mbajnë një protestë përmes së cilës do t’i shprehin shqetësimet dhe pakënaqësitë e tyre për mos marrjen e pagave që tre muaj më radhë. (Para Newborn,ora 12:00)

- Banorët e fshatit Cikatovë mbajn protestë në mbrojtje të pronave stergjyshore te marrura në menyrë tinzare nga ana e Komunës se Drenasit dhe te cilat u janë shitur New Co Feronikeli, pa i kompenzuar asnjëherë. (Para Gjykatës Themelore të Prishtinës  dega në Drenas, ora 13:00)

- Aleanca Kosovare të Bizneseve organizon konferencën për media lidhur me ndikimin e taksës 100 % në ekonominë e Serbisë. (Selia qendrore e AKB-ës në Tophane, ora 13:00)

- Lëvizja Vetëvendosje mban konferencë për media. (Zyrët qendrore te Vetëvenosjes, ora 13:00)

- Koalicioni i OJQ-ve “Java Kundër Korrupsionit 2018” do të mbajë tryezën e diskutimit me temë “Integriteti, Llogaridhënia dhe Efikasiteti i sistemit të drejtësisë - Nevoja për Vetting”. (Hotel Sirius, ora 14:00)
 
 - Koordinatori Nacional për Kulturë, Rini dhe Sport në Qeverinë e Kosovës, Rexhep Hoti, do të nënshkruajë marrëveshje bashkëpunimi me Kryetarin e Komunës së Dragashit Shaban Shabani. (Objekti i Komunës së Dragashit, ora 14:00)

- Zëvendësshefja e misionit të ambasadës së SHBA-ve në Kosovë, Colleen Hyland, dhe Drejtoresha e Korpusit të Paqës, Dr. Darlene Grant, do të mbajnë fjalime në një takim me kryetarët e komunave të Kosovës. (International Hotel Prishtina, ora 16:00)