14 Dhjetor 2018

Gjilani, 800 mijë euro për rrjet të ujësjellësit

Gjilan, 19 dhjetor - Është nënshkruar marrëveshja e bashkëpunimit dhe bashkëfinancimit në mes të Komunës së Gjilanit, CDI-DORSCH-it (zyra e qeverisë zvicrane) dhe Kompanisë Regjionale të Ujit “Hidromorava”, për investimin e rrjetit të ujësjellësit në lagjen “Porodin”, fshatin Verbicë e Kmetocit, Bilinicë, Vrapqiq dhe pjesën e djathtë të rrugës nga kolegji “Fama” e deri te pompa “Ferizi Petrol”, për të përfunduar deri te tuneli, që kap një vlerë të investimeve mbi 800 mijë euro.
 
“Pas nënshkrimit të kësaj kontrate, punimet pritet të fillojnë shumë shpejt. Pjesëmarrja është e ndarë në tri pjesë, ku CDI ka marrë përsipër furnizimin me gypa të kualitetit të lartë dhe ujëmatës, KRU “Hidromorava” ka marrë përsipër hartimin e projekteve dhe Komuna e Gjilanit pjesën tjetër që në total kap vlerën prej mbi 800 mijë euro. 467 mijë euro është bërë nënshkrimi i marrëveshjes, por kur kësaj i shtojmë edhe 350 mijë euro gypat dhe ujëmatësit, atëherë del shuma e cekur prej mbi 800 mijë euro dhe është zgjidhje e problemit me ujë të pijes për një kohë afatgjate”, ka thënë kryetari Lutfi Haziri.

Edhe Muhamet Suliqi, drejtor i KRU “Hidromorava”, ka thënë se kjo kompani, falë Komunës së Gjilanit dhe fondeve të qeverisë së Zvicrës - CDI, po mundësojnë zgjidhjen e problemit afatgjatë me ujë të pijes për banorët e lagjeve dhe fshatrave të ndryshme të Gjilanit.

Ndryshe, pas përfundimit të projektit, e gjitha kalon në menaxhimin dhe mirëmbajtjen e KRU “Hidromorava”. 

Kalendari

Ngjarjet e datës 14 dhjetor 2018

- Mbahet seanca plenare e Kuvendit të Republikës së Kosovës në të cilën do të behët shqyrtimi i dytë i Projektligjit për Ministrinë e Mbrojtjes, shqyrtimi i dytë i Projektligjit për Forcën e Sigurisë së Kosovës dhe shqyrtimi i dytë i Projektligjit për shërbim në Forcën e Sigurisë së Kosovës. (Kuvendi i Kosovës, ora 10:00)  

- Në kuadër të “Javës Kundër Korrupsionit 2018” mbahet turneu kundër Korrupsion “Kosova Open 2018”. (Kino “Armata”,  ora 10:00)

- Misioni i Organizatës për Siguri dhe Bashkëpunim në Evropë në bashkëpunim me Asociacionin e Gazetarëve të Kosovës organizojnë tryezën "Roli i medias dhe shoqërisë civile në luftimin e korrupsionit". (Swiss Diamond Hotel, ora 10:00)

- Në kuadër të “Javës Kundër Korrupsionit 2018” mbahet tryeza me temë "Lufta Kundër Korrupsionit në Ballkan. (Hotel Sirius, ora 10:00)

- Në kuadër të Javës Kundër Korrupsion, Demokraci Plus organizon debatin publik në lidhje me gjetjet e monitorimit të prokurimit publik në Komunën e Prishtinës. (Hotel Sirius, ora 11:00)

- Let's Do It organizon aksion pastrimi në Plemetin të Obiliqt në kuadër të Fushatës "Ta Pastrojmë Kosovën". (Plemetin, ora 11:00)

- Aleanca Kosovare e Bizneseve dhe Qendra Tregtare "Plus Center “ organizon hapjen e ekspozimit dhe promovimit të prodhimeve vendore në kuadër të “Javëve të Biznesit Kosovar 2018” me moto: Unë Konsumoj Produkte Vendore, Po JU?. (Objekti i Qendrës Tregtare "Plus Center“ ne Ferizaj, ora 12:00)

- Koalicioni i OJQ-ve “Java Kundër Korrupsionit 2018” do të mbajë ngjarjen përmbyllëse të “Javës Kundër Korrupsionit 2018”, ku do të jenë prezent Ambasadorët e Shteteve Anëtare të QUINT, BE dhe Koalicioni i OJQ-ve. (Përpara Teatrit Kombëtar, ora 15:00)

- Fondi për të Drejten Humanitare organizon ligjëratën publike “Sot, 20 vite më parë: Rasti Panda”. (Qendra e Dokumentimit në bibliotekën Hivzi Sulejmani, rruga “Sadik Bekteshi” nr 16, ora 16:30)

- Federata Kosovare e Atletikës organizon manifestimin sportiv të atletikës "Laureatët e vitit – Gala Athletics2018”. (Miracle Beni Dona, Zona Industriale, ora 18:30)

- Shfaqet drama jokonvencionale e Mark Ravenhill lidhur me dy vëllezër identikë të cilët ritakohen pasi që janë rritur ndarazi më Gjermaninë lindore dhe perëndimore. (Ambienti i fondacionit “Shtatëmbëdhjetë”, rruga e Muzeu Etnologjik, ora 20:00)